Taćciana Kim raspaviała, jakim biznesam zaniałasia b siońnia, kali b joj było 18 hadoŭ

Taćciana Kim, jakaja zajmaje 23‑ie miesca ŭ rejtynhu 155 miljarderaŭ Rasii pa viersii Forbes za 2026 hod z bahaćciem $8,1 młrd, padzialiłasia bačańniem taho, jak by jana pačynała svoj šlach, kali b joj zaraz było 18 hadoŭ.

Kim zajaviła, što kali b zaraz joj było 18 hadoŭ, to jana pajšła b pracavać u ličbavyja płatformy, bo za imi budučynia i «ŭžo sučasnaść».

Pavodle jaje słoŭ, siońnia paroh uvachodu ŭ biznes radykalna źniziŭsia — dastatkova mieć smartfon, a markietpłejsy dajuć hatovuju infrastrukturu, dostup da miljonaŭ klijentaŭ i instrumienty dla maštabavańnia.

Taćciana Kim adznačyła, što ŭ 18‑hadovym uzroście pačała b nie z napisańnia biznes-płana, a z troch najvažniejšych rečaŭ.

1. Atrymańnie viedaŭ — navat kali zdajecca, što jany «nie pra hrošy». Navučańnie i adukacyja nieabchodny niezaležna ad taho, što mienavita čałaviek vyvučaje, kaža jana.

2. Pošuk idei, jakaja «zapalvaje» — pradukt abo pasłuha pavinny palahčać žyćcio i vyrašać realnyja prablemy ludziej vakoł, a nie być vynikam niejkaj «vialikaj biznes-idei».

3. Hatoŭnaść pamylacca — vyrašeńnie prablem, jakija ŭźnikajuć z-za pamyłak, źjaŭlajecca, na jaje dumku, najlepšaj inviestycyjaj u svaju budučyniu.

«Na samaj spravie kožnaja pamyłka — heta ŭrok. Kryzis — krynica bolšaha rostu, čym u ciabie byŭ da jaho. Važna znajści punkt apory, sabracca i ŭziać kantrol nad situacyjaj. Ja nie kryzis-mieniedžar pa paklikańni, ja bolš lublu raźvivać i prymnažać, ale žyćcio navučyła: z samaj składanaj situacyi možna vyjści z novymi siłami. Darečy, vielmi karysna vieści ŭłasny «dziońnik pamyłak» — zapisvać, što pajšło nie tak, i vysnovy. Praz hod vy ździviciesia, nakolki hetyja zapisy kaštoŭniejšyja za luby padručnik», — kaža zasnavalnica Wildberries.

Pradprymalnica taksama zaŭvažyła, što biznes — heta nie šlach adzinočki, i kamanda adyhryvaje vialikuju rolu.

Pry vychadzie na ličbavyja płatformy Kim raić nie sprabavać kankuravać z hihantami ŭ masmarkiecie, a šukać svaju mikranišu z addanaj aŭdytoryjaj (naprykład, ekskluziŭnyja tavary, piersanalizavanyja padarunki abo adzieńnie dla sabak redkich parod).

Pry hetym krytyčna važna vučycca finansavaj i jurydyčnaj hramatnaści, razumieć padatki.

Taćciana Kim pryznałasia, što nie čakała b «idealnaha momantu», a sprabavała b roznyja nišy, šukała b nastaŭnika i nie bajałasia b zadavać «durnyja» pytańni.

Jana ŭpeŭniena, što hrošy ŭ biznesie — heta nie meta, a instrumient:

«Kali ty stvaraješ kaštoŭnaść — hrošy prychodziać. Nie naadvarot. Ja časta daju ŭ prykład našych najlepšych sieleraŭ: tyja, chto ščyra lubić svaju spravu i dumaje pra klijenta, zaŭsiody abychodziać tych, chto pryjšoŭ tolki zarabić lohkija hrošy. Davier — heta samy darahi aktyŭ, i na jaho budaŭnictva sychodziać hady, zatoje jon prynosić stabilny dachod na doŭhim adcinku. Ale naiŭna dumać, što biez uliku raschodaŭ i dachodaŭ možna pabudavać ustojlivy biznes. Viadzicie najpraściejšuju tabličku z samaha pieršaha dnia — heta vychavaje ŭ vas zvyčku da finansavaj prazrystaści, bieź jakoj niemahčymy maštab».

Kim dadała, što zapuścić paśpiachovuju spravu možna ŭ lubym uzroście — jak u 18, tak i ŭ 50 hadoŭ, hałoŭnaje — ryzykavać i rabić toje, što prynosić zadavalnieńnie.

• 0
• 0
• 0
• 0
• 1
• 0
• 0
• 0