Školnica vykinułasia z akna, bo nie pieramahła na alimpijadzie?
U studzieni Mašy spoŭniłasia b 15 hadoŭ.
— Heta vaša dzicia vypała z akna? — z takim pytańniem milicyjanty pastukali ŭ dźviery da žycharki Mahilova pozna viečaram u subotu. Ciotka Mašy [imia dziaŭčynki źmieniena pavodle etyčnych mierkavańniaŭ] kinułasia na kuchniu i ŭbačyła rasčynienaje akno … Jaje plamieńnica vyskačyła z 9-ha paviercha.
Zaraz śledčyja vyśviatlajuć, čamu dziaŭčynka skončyła žyćcio samahubstvam. Što tryvožyła ŭ apošni čas i ci dzialiłasia jana prablemami sa svaimi blizkimi? Pavodle infarmacyi kp.by, Maša vučyłasia ŭ 9-m kłasie mahiloŭskaj himnazii na vydatna, rasła ŭ ščaślivaj siamji.
U subotu dziaŭčynka vystupiła na alimpijadzie, ale, daviedaŭšysia vyniki, źniervavałasia. Školnica raźličvała na pieramohu, adnak apynułasia ŭsiaho tolki ŭ siaredzinie śpisu ŭdzielnikaŭ.
Pakolki dadomu było jechać pozna, a žyvie siamja Mašy ŭ pryharadzie, dziaŭčynka vyrašyła zanačavać ŭ ciotki …
- Ciapier pravodzicca pravierka pa fakcie śmierci 14-hadovaj dziaŭčyny. Pryznačanyja sudova-miedycynskaja, paśmiarotnaja psichia-psichałahičnaja ekśpiertyzy i inšyja vidy ekśpiertnych daśledavańniaŭ. Pavodle papiarednich dadzienych, śmierć padletka nastupiła ad cialesnych paškodžańniaŭ, atrymanych joju ad padzieńnia z 9-ha paviercha, — kamientuje Aksana Salaniuk, aficyjny pradstaŭnik upraŭleńnia Śledčaha kamiteta pa Mahiloŭskaj vobłaści.
«Dzicia pavinna viedać: jano moža pamylacca, ale jaho zaŭsiody padtrymajuć»
Na žal, za minuły tydzień try dziaŭčynki-padletki ździejśnili samahubstva. U paniadziełak, 23 listapada, u Barysavie znajšli paviešanaj 15-hadovuju školnicu. Litaralna praź niekalki dzion skončyła žyćcio samahubstvam dziesiacikłaśnica z Kobrynskaha rajona. Napiaredadni školnica pasvaryłasia z mamaj i vyrašyła źvieści rachunki z žyćciom. A ŭ subotu nie stała Mašy.
— U padletkavym uzroście maładyja ludzi jašče nie darosłyja, ale ŭžo i nie dzieci. Adnak baćki časta žyvuć ujaŭleńniem ab tym, što vychoŭvajuć dziaciej, i jany nie pierabudoŭvajucca, nie hatovyja da taho, što ŭ padletka źjaŭlajecca ŭłasnaje mierkavańnie, zdolnaść spračacca, dakazvać svoj punkt hledžańnia. Bo heta nie pakazčyk taho, što jon stanovicca niepasłuchmianym, niekiravalnym. Heta śviedčyć ab tym, što dzicia pačynaje staleć, — raspaviadaje kp.by namieśnik hałoŭnaha doktara, kiraŭnik Minskaha haradskoha centra pamiežnych stanaŭ Siarhiej Davidoŭski. — Akramia taho, časta darosłyja chočuć, kab dzieci byli lepšyja za ich. Heta značyć, lepš vučylisia, bolš viedali. Pry hetym nie vielmi zadumvajucca nad tym: ci jość naohuł u dziciaci pieradumovy dla hetaha?
Mnohija baćki maksimalisty i svaimi žorstkimi praviłami, patrabavańniami i surovym vychavańniem damahajucca tolki taho, što dzieci pačynajuć ad ich addalacca. Jany prosta bajacca pryznacca ŭ svaich pamyłkach, promachach.
Važna, kab padletak nie bajaŭsia raspaviadać pra svaje niaŭdačy. Jon zaŭsiody źviartaje ŭvahu na toje, jak pavodziać siabie baćki ŭ krytyčnaj situacyi.
Kali łajuć i karajuć — padletak addalajecca, kali słuchajuć i sprabujuć razam znajści vychad, to ŭ nastupny raz jon taksama źvierniecca pa dapamohu.
Treba dać zrazumieć: «Ty možaš pamylicca, ale ciabie zrazumiejuć, padtrymajuć. Hałoŭnaje nie toje, što zdaryłasia, a toje, jak nam razam vyjści ź ciažkaj situacyi».
Tamu nie varta kazać takich asudžajučych fraz: «Jak ty moh heta zrabić? Pra što ty dumaŭ?» Heta tolki ŭzmocnić pačućcio viny, i ŭ nastupny raz padletak začynicca ŭ sabie i ničoha nie raskaža.
Kamientary