U jakim stroi Aleksijevič budzie atrymlivać Nobieleŭskuju premiju?
10 śniežnia ŭ Stakholmie maje adbycca ŭznaharodžvańnie Nobieleŭskaj premijaj pa litaratury, jakuju z ruk šviedskaha manarcha atrymaje naša suajčyńnica Śviatłana Aleksijevič.
U čym Śviatłana pojdzie na hety hanarovy pryjom? Niekatoryja akaličnaści «Našaj Nivie» raspavioŭ madeljer Saša Varłamaŭ, jakomu Śviatłana Aleksijevič užo zamaŭlała stroi.
«My supracoŭničajem sa Śviatłanaj užo paŭhoda, ad taho momantu, jak jana stała Aficeram ordena francuzskaj litaratury i mastactva. — raskazaŭ Varłamaŭ i admioŭ zdahadki pra imaviernuju vyšyvanku na Aleksijevič. — Uručeńnie Nobieleŭskaj premii — heta mierapryjemstva, dzie prysutničaje karol i karaleva. Heta najvyšejšaje sasłoŭje, stahodździami vypracavany dres-kod, kala manarchaŭ mohuć znachodzicca tolki ludzi, jakija im adpaviadajuć. Tut nie moža być nijakich vyšyvanak, usio vielmi pratakolnaje».
Saša Varłamaŭ abmiežavaŭsia tolki namiokami na vyhlad stroja Śviatłany Aleksijevič.
«Ja dakładna vam skažu, što heta nie budzie viečarovy stroj. Heta pryncypova — Śviatłana ich uvohule nie nosić.
A hałoŭny jaje kryter u tym, kab u svaim stroi jana mahła havaryć pra bol. Kali sukienka, jak jana kaža, «dla damački, jakaja nie źviedała pakutaŭ», to takuju Śviatłana nie apranie. Pabačycie ŭsio potym», — skazaŭ Saša Varłamaŭ.
Kamientary