U Biełarusi raspracavali ŭnikalnuju mabilnuju prahramu dla ludziej z aŭtyzmam

17 śniežnia ŭ Nacyjanalnym aeraporcie Minsk prajšła prezientacyja ŭnikalnaj prahramy dla dziaciej i darosłych z aŭtyzmam i abmiežavańniami ŭ maŭleńni — «Kamunikatar DAR». 

Heta biaspłatnaja prahrama dla sistemy Android, raspracavanaja mižnarodnaj dabračynnaj hramadskaj arhanizacyjaj (MDHA) «Dzieci. Aŭtyzm. Baćki» pry padtrymcy hienieralnaha partniora prajekta — kampanii velcom. Jaje płanujecca ŭkaranić u minskim aeraporcie ŭ miežach prahramy pa zabieśpiačeńni biezbarjernaha asiarodździa.

Dyrektar MDHA «Dzieci. Aŭtyzm. Baćki» Taćciana Jakaŭleva nazvała «Kamunikatar DAR» «doŭhačakanym vynikam vialikaj pracy mnohich ludziej». «Inkluzija — uklučeńnie ŭ socyum raniej nieprykmietnaj častki našaha atačeńnia — z kožnym dniom stanovicca bolš adkrytaj dla abmierkavańniaŭ. Heta suśvietnaja tendencyja, Biełaruś nie adstaje. Mižnarodnyja technałohii karekcyjnaj pracy ŭžo pačynajuć pracavać u nas u Minsku, i «Kamunikatar DAR» adyhraje ŭ hetym pracesie vyrašalnuju rolu», — zaznačyła jana. 

Pavodle słoŭ Jakaŭlevaj, MDHA «Dzieci. Aŭtyzm. Baćki» pracuje ŭ ciesnym supracoŭnictvie ź dziaržaŭnaj sistemaj adukacyi. «Vielmi važna, što pytańni inkluziŭnaj adukacyi ŭžo razhladajucca na samym vysokim, respublikanskim uzroŭni», — padkreśliła dyrektar arhanizacyi. 

Sa svajho boku načalnik adździeła karparatyŭnych kamunikacyj velcom Viačasłaŭ Śmirnoŭ paviedamiŭ, što «Kamunikatar DAR» raspracavany biełaruskimi śpiecyjalistami i ŭnikalny dla krain SND. 

«Dla nas, jak dla apieratara suviazi, vielmi važna, što hety prahramny pradukt pryznačany dla płanšetaŭ i mabilnych telefonaŭ, a značyć — dazvalaje vykarystać pieravahi najnoŭšych technałohij. My ŭpeŭnienyja, što kamunikatar pryniasie pazityŭnyja źmieny ŭ žyćcio kožnaha karystalnika, i razam z tym dapamoža dzieciam z aŭtyzmam być pačutymi našym hramadstvam», — zaznačyŭ Śmirnoŭ. 

Pavodle infarmacyi kiraŭnika hrupy raspracoŭščykaŭ, dyrektara minskaj kampanii «Vajmiks» Dzianisa Tałstašova, novy prahramny pradukt pabudavany na papularnaj u śviecie sistemie alternatyŭnaj kamunikacyi i padobny da zamiežnych anałahaŭ, ale nie paŭtaraje ich. «Naš pradukt daje karystalnikam značna bolš mahčymaściaŭ, bo prajekt viadzie hramadskaja arhanizacyja, jakaja abjadnoŭvaje dobra znajomyja z prablemaj aŭtyzmu siemji», — dadaŭ Tałstašoŭ. «Meta našaj sumiesnaj pracy — stvareńnie jakasnaha i zručnaha instrumienta znosinaŭ ludziej, jakija nie razmaŭlajuć», — padkreśliŭ jon. 

Navučycca vykarystańniu kamunikatara i pryjomam alternatyŭnaj kamunikacyi śpiecyjalisty i baćki zmohuć na viebinarach prajekta «Inkluzija anłajn», jaki realizuje MDHA «Dzieci. Aŭtyzm. Baćki». 

«My praviadziom viebinary ź biełaruskimi śpiecyjalistami i, pakolki ŭ našaj krainie amal niama analitykaŭ pavodzinaŭ, zaručylisia zhodaj śpiecyjalistaŭ ź inšych krain», — raskazała kiraŭnik prajekta «Inkluzija anłajn», udzielnik savieta MDHA «Dzieci. Aŭtyzm. Baćki» Iryna Dziarhač. Pavodle jaje słoŭ, metavaja hrupa namnoha šyrejšaja, čym śpiecyjalisty i baćki vučniaŭ z aŭtyzmam. «Mietodyki pracy, što prymianiajucca dla karekcyi aŭtyzmu, efiektyŭnyja i pry pracy ź inšymi parušeńniami», — dadała jana.

• 0
• 0
• 0
• 0
• 0
• 0
• 0
• 0