U Homieli z-za deficytu paliva nie pracavali chutkija? Hałoŭny doktar abviarhaje
Hałoŭny ŭrač Homielskaj haradskoj centralnaj palikliniki Viačasłaŭ Jaščanka abvierh infarmacyju ab deficycie paliva dla mašyn chutkaj dapamohi.
Ab tym, što 23 śniežnia mašyny chutkaj dapamohi ŭ Homieli amal paŭdnia zastavalisia biez paliva, žurnalistam paviedamili vadzicieli mašyn nieadkładnaj dapamohi. Pavodle ich słoŭ, z ranicy było vydadziena pa 10 litraŭ bienzinu, a na aŭtamabili, jakija absłuhoŭvajuć palikliniki, paliva nie dali naohuł.
Alaksandr Rohaŭ — dyrektar KUP «Aŭtabaza chutkaj i miedycynskaj dapamohi», da jakoha adnosiacca ŭsie homielskija «nieadkładnyja», rastłumačyŭ zdareńnie «ciažkaj ekanamičnaj situacyjaj u krainie», kancom hoda i tym, što ŭ takoj situacyi vinavataje finansavaje ŭpraŭleńnie. «Vydali bienzin na 50—100 km, dastatkova, kab źjeździć na vykliki. Transpartu palikliniki krychu mienš dali. Kali było štości terminovaje — vadzicieli ŭ haraž pryjazdžali, i my apieratyŭna znachodzili im bienzin. Usie z razumieńniem pastavilisia da situacyi, jana z usimi była ahavorana», — dadaŭ jon.
U svaju čarhu Viačasłaŭ Jaščanka śćviardžaje, što bienzin na źmienu vadzicielam chutkaj vydali poŭnaściu.
«Prosta dajuć zvyčajna pa 25 litraŭ, a siońnia dali pa 15. Piatnaccać litraŭ na našu mašynu — heta rabota na 100 km, na try hadziny raboty hetaha dastatkova, tamu što siaredniadzionny prabieh u nas — 100-120 km na chutkuju. Prosta dali biez zapasu. Pa paliklinikach doza bienzinu była mienšaj — davali tym, kamu treba. Kamu nie chapiła — usich dazapravili», — skazaŭ Jaščanka.
Jon taksama paviedamiŭ, što napiaredadni, 22 śniežnia, było vyrašana pytańnie z naftabazaj. «Z zapraŭkaj našaj słužby biez hrošaj, skažam tak, u kredyt. Na 250 miljonaŭ u nas jość našy kredytorskija mahčymaści», — adznačyŭ hałoŭny ŭrač.
Kamientary