У Гомелі з-за дэфіцыту паліва не працавалі хуткія? Галоўны доктар абвяргае
Галоўны ўрач Гомельскай гарадской цэнтральнай паліклінікі Вячаслаў Яшчанка абверг інфармацыю аб дэфіцыце паліва для машын хуткай дапамогі.
Аб тым, што 23 снежня машыны хуткай дапамогі ў Гомелі амаль паўдня заставаліся без паліва, журналістам паведамілі вадзіцелі машын неадкладнай дапамогі. Паводле іх слоў, з раніцы было выдадзена па 10 літраў бензіну, а на аўтамабілі, якія абслугоўваюць паліклінікі, паліва не далі наогул.
Аляксандр Рогаў — дырэктар КУП «Аўтабаза хуткай і медыцынскай дапамогі», да якога адносяцца ўсе гомельскія «неадкладныя», растлумачыў здарэнне «цяжкай эканамічнай сітуацыяй у краіне», канцом года і тым, што ў такой сітуацыі вінаватае фінансавае ўпраўленне. «Выдалі бензін на 50—100 км, дастаткова, каб з'ездзіць на выклікі. Транспарту паліклінікі крыху менш далі. Калі было штосьці тэрміновае — вадзіцелі ў гараж прыязджалі, і мы аператыўна знаходзілі ім бензін. Усе з разуменнем паставіліся да сітуацыі, яна з усімі была агаворана», — дадаў ён.
У сваю чаргу Вячаслаў Яшчанка сцвярджае, што бензін на змену вадзіцелям хуткай выдалі поўнасцю.
«Проста даюць звычайна па 25 літраў, а сёння далі па 15. Пятнаццаць літраў на нашу машыну — гэта работа на 100 км, на тры гадзіны работы гэтага дастаткова, таму што сярэднядзённы прабег у нас — 100-120 км на хуткую. Проста далі без запасу. Па паліклініках доза бензіну была меншай — давалі тым, каму трэба. Каму не хапіла — усіх дазаправілі», — сказаў Яшчанка.
Ён таксама паведаміў, што напярэдадні, 22 снежня, было вырашана пытанне з нафтабазай. «З запраўкай нашай службы без грошай, скажам так, у крэдыт. На 250 мільёнаў у нас ёсць нашы крэдыторскія магчымасці», — адзначыў галоўны ўрач.
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі2121
Каментары