Jašče adna dyktatura zachistałasia

Užo treci dzień zimbabvijski CVK ustrymlivajecca ad abviaščeńnia vynikaŭ prezydenckich i parlamenckich vybaraŭ. Siońnia ŭviečara stała viadoma, što za začynienymi dźviarami iduć intensiŭnyja dyplamatyčnyja pieramovy z metaju znajści hanarovaje vyjście dla Roberta Muhabe — čałavieka, jaki 28 hadoŭ kiravaŭ krainaj žaleznaj rukoj, zachoŭvajučy demakratyčnuju formu, ale biaźlitasna dyskredytujučy ci vyniščajučy apanentaŭ.

Afrykanskaha dyktatara pachavała ekanomika. Paśla ŭviadzieńnia Zachadam ekanamičnych sankcyj inflacyja ŭ krainie dasiahnuła 100 000 pracentaŭ, a datacyj ad Čavesa i Mbeki akazałasia zamała dla padtrymańnia sacyjalnaj stabilnaści.

U vyniku Muhabe prajhraje vybary svajmu daŭniamu praciŭniku, lideru kaalicyi Ruch za demakratyčnyja pieramieny, prafsajuznamu bosu Morhanu Cvanhiraj.

Pavodle vynikaŭ paralelnaha padliku hałasoŭ pavodle pratakołaŭ učastkovych kamisij, praviedzienaha chaŭrusam 25 hramadzkich i carkoŭnych arhanizacyj, Cvanhiraj nabraŭ 49,4 % hałasoŭ suprać 41,8 % u Muhabe. Jašče 8% adjeŭ zimbabvijski Kazulin — były ministar finansaŭ Muhabe, jaki pierajšoŭ u apazycyju. Cikava, što apošniaha Muhabe nazvaŭ niajnačaj jak «žabaj», a Cvanhiraj — «maryjanetkaj». Heta fenamenalnaja pieramoha va ŭmovach dyktatu dziaržaŭnych ŚMI i manapalizacyi siłavych strukturaŭ prychilnikami Muhabe. Na minułych vybarach Muhabe ŭdałosia apiaredzić Cvanhiraj.

Apazycyja, zdajecca, vyjhraje taksama bolšaść miescaŭ u parlamencie.

Pavodle infarmacyi z paŭdniovaafrykanskich dyplamatyčnych krynicaŭ, učora ŭnačy paplečniki Muhabe painfarmavali dyktatara, što jamu nie ŭdałosia nabrać bolšaści hałasoŭ. Paśla 3-dzionnaha pramarudžvańnia Centravybarkam mieŭ namier vydać vyniki ŭłasnaha padliku: ź ich vynikaje, što Muhabe sabraŭ tolki 42 % hałasoŭ proci 48 % u Cvanhiraj. Heta aznačaje nieabchodnaść praviadzieńnia druhoha turu vybaraŭ, u jakim Muhabe nia maje šancaŭ na pieramohu.

Zakulisnymi pieramovami ab biaskroŭnaj pieradačy ŭłady zaniałasia Paŭdniovaja Afryka — najbolšy susied Zimbabve. Miarkujecca, što Muhabe budzie zabiaśpiečany pažyćciovy imunitet, a kiraŭničaja partyja Afrykanski sajuz narodu Zimbabve (Patryjatyčny front) atrymaje pasadu vice-prezydenta.

Takoje vyjście mnohim afrykancam padajecca dobrym kampramisam. Jany jašče pamiatajuć, jak paślavybarčyja sutyčki ŭ Kienii niadaŭna zabrali bolš za 1000 žyćciaŭ.

Muhabe pačynaŭ svaju karjeru jak šanavany lider nacyjanalna-vyzvolnaha ruchu. Adnak praha ŭłady vymušała jaho šukać sumnieŭnych sajuźnikaŭ — ad Karei da Kitaju. Taksama dziela ŭtrymańnia ŭłady ŭ sastarełych rukach jon nie curaŭsia raspalvańniem varožaści da apazycyi i mienšaściaŭ, u tym liku biełych, u jakich jon kanfiskavaŭ ziamlu, što pryviało da poŭnaha razvału sielskahaspadarčaj vytvorčaści.

Suprać jaho vystupała šyrokaja kaalicyja siłaŭ, jakaja ŭklučała nia tolki palityčnyja partyi, ale i katalickuju carkvu.

I ŭłady Paŭdniovaj Afryki, i Zimbabve pakul asprečvajuć infarmacyju pra pieramovy, adnak krynicy ŭ amerykanskim pasolstvie ŭ Charare pieradajuć, što nieŭzabavie čakajecca zvarot Roberta Muhabe da krainy.

• 0
• 0
• 0
• 0
• 0
• 0
• 0
• 0