Były prezident ZŠA padaŭ pazoŭ u fiederalny sud Vašynhtona na Ministerstva justycyi ŭ sprobie zabłakavać publikacyju aŭdyjazapisaŭ i rasšyfrovak svaich pryvatnych razmoŭ ź bijohrafam, zapisanych u 2016—2017 hadach, piša Bi-bi-si.
Pieradača materyjałaŭ Miniustam jurydyčnamu kamitetu Pałaty pradstaŭnikoŭ i kansiervatyŭnamu fondu Heritage Foundation zapłanavana na 15 červienia.
Hetyja zapisy fihuravali ŭ rasśledavańni śpiecprakurora Robierta Chura, jaki ŭ 2023 hodzie vyvučaŭ abychodžańnie Bajdena z sakretnymi dakumientami: eks-prezident padazravaŭsia ŭ nienaležnym abychodžańni z sakretnaj infarmacyjaj. U vyniku Chur admoviŭsia vystaŭlać kryminalnyja abvinavačvańni.
U pazovie Bajden abvinavačvaje Ministerstva justycyi ŭ «nieapraŭdanym uvarvańni ŭ pryvatnaje žyćcio byłoha prezidenta».
«Kožny amierykaniec, uklučajučy dziejnaha abo byłoha vice-prezidenta, maje prava na niedatykalnaść pryvatnych razmoŭ, jakija jon viadzie va ŭłasnym domie», — napisali advakaty Bajdena, majučy na ŭvazie hutarki Bajdena ŭ 2016—2017 hadach ź piśmieńnikam Markam Zvoniceram, jaki pracavaŭ ź im nad dvuma miemuarami.
Jak śćviardžajecca ŭ pazovie, pry administracyi Bajdena Miniust sam damahaŭsia zachavańnia materyjałaŭ u tajamnicy, nazyvajučy ich abaronienymi ad publikacyi ŭ ramkach zakona ab svabodzie infarmacyi. Adnak paśla viartańnia Donalda Trampa ŭ Bieły dom viedamstva źmianiła pazicyju i abjaviła, što pieradaść materyjały kamitetu Kanhresa.
Advakaty Bajdena śćviardžajuć, što zapyt kamiteta nosić farmalny charaktar i vykarystoŭvajecca tolki dla abychodu fiederalnych abmiežavańniaŭ na publikacyju padobnych materyjałaŭ.
Były prezident patrabuje pryznać zapyt Kanhresa niesapraŭdnym i nazaŭsiody zabaranić pieradaču zapisaŭ kamitetu.
Miniust ZŠA pazoŭ pakul nie prakamientavaŭ.
«Nie majuć hramadskaj cikavaści»
Zapisy byli zrobleny doma ŭ Džo Bajdena bolš za dziesiać hadoŭ tamu ŭ chodzie pracy nad jaho miemuarami «Promise Me, Dad: A Year of Hope, Hardship, and Purpose», apublikavanymi ŭ 2017 hodzie.
Kniha raskazvaje pra rašeńnie Bajdena ŭdzielničać u prezidenckaj honcy na fonie ciažkaj chvaroby jaho starejšaha syna Bo Bajdena, jaki zmahaŭsia z rakam mozhu.
Paśla zapisy apynulisia ŭ rasparadžeńni śpiecprakurora Robierta Chura ŭ ramkach rasśledavańnia ab chałatnym abychodžańni z dakumientacyjaj.
Chur vyvučyŭ hetyja materyjały, a taksama asabista pravioŭ z Bajdenam piacihadzinnaje intervju.
U vynikovym dakładzie Kanhresu, apublikavanym u 2024 hodzie, śpiecprakuror pryjšoŭ da vysnovy, što składu złačynstva niama.
Adnak pry hetym jon apisaŭ tahačasnaha 81‑hadovaha prezidenta jak «simpatyčnaha, dobranamieranaha padžyłaha čałavieka z drennaj pamiaćciu».
Paśla padačy pazovu pradstaŭnik Bajdena Ci Džej Dakło zajaviŭ, što ŭ chodzie supracoŭnictva sa śledstvam Chura eks-prezident pradastavić zapisy tolki pry ŭmovie, što jany nie patrapiać u publičnaje pole.
«Sam Miniust raniej kazaŭ, što hetyja zapisy nie majuć hramadskaj cikavaści, — adznačyŭ Dakło. — Toje, što adbyvajecca zaraz, — heta nie pra prazrystaść. Heta pra palityku».
«Kali Ministerstva justycyi atrymlivaje padobnuju asabistuju infarmacyju ŭ ramkach kryminalnaha rasśledavańnia, na viedamstva kładziecca asablivaja adkaznaść pa abaronie jaje ad razhałošvańnia», — dadali jurysty eks-prezidenta ZŠA.
Kamientary
Chto hetuju łuchtu piša? Złačynstva jość, ale z-za ŭzrostu i prablem z pamiaćciu pryciahnuć da adkaznaści naŭrad ci atrymajecca.