U Smalensku asudzili hramadzianina Rasii, jaki ŭ 2020‑m pahražaŭ ustavić pałku śpiecnazaŭcu z v/č 3214, što ŭdzielničaŭ u razhonie pratestaŭ
Sud prymusiŭ vypusknika fakulteta mižnarodnych adnosin BDU Artura Andrejeva zapłacić kala $1400 pakryŭdžanamu Kiryłu Barysiku. Ale kiejs niezvyčajny — rasijski sud vyrašyŭ abaraniać biełaruskaha siłavika ad svajho ž, rasijskaha, hramadzianina.
Safonaŭski rajonny sud Smalenskaj vobłaści Rasii pryznaŭ hramadzianina Rasii Artura Andrejeva vinavatym u pahrozie hvałtu ŭ dačynieńni pradstaŭnika ŭłady (č. 1 st. 318 KK RF) i pryznačyŭ jamu štraf 50 tysiač rasijskich rubloŭ (kala $700 pa ciapierašnim kursie). Jašče 100 tysiač (kala $1400) jon pavinien vypłacić paciarpiełamu jak kampiensacyju maralnaj škody.
Paciarpiełym pa spravie prachodziŭ biełaruski siłavik Kirył Barysik — na momant padziej kamandzir roty śpiecpryznačeńnia v/č 3214 unutranych vojskaŭ MUS Biełarusi. Jon datyčny da hvałtoŭnaha padaŭleńnia mirnych pratestaŭ i fihuruje «paciarpiełym» prynamsi ŭ troch kryminalnych spravach.
Sama padzieja adbyłasia ŭ śniežni 2020 hoda, u razhar represij paśla prezidenckich vybaraŭ. Fota siłavika ŭ bajavoj ekipiroŭcy, jaho pasada, asabisty telefon i adras na toj momant byli apublikavany ŭ telehram-kanale «Karniki Biełarusi».
Čytajcie: Chto tyja śpiecnazaŭcy, što žorstka i sa ździekami zatrymlivali muzykanta Viktara «Mao» Žarkieviča, jaki dniami pamior
Artur Andrejeŭ adpraviŭ Barysiku sms. Rasijski sud pierakazaŭ jaho źmiest tak: «hrupa asob, uklučajučy aŭtara vykazvańnia, adšukajuć adrasata i pakarajuć jaho pałavym aktam u analnuju adtulinu pry dapamozie pałki». Pavodle materyjałaŭ spravy, Barysik mieŭ «realnyja padstavy bajacca» ažyćciaŭleńnia pahrozy z ulikam tahačasnaj palityčnaj abstanoŭki i taho, što jaho asabistyja dadzienyja byli ŭ adkrytym dostupie.
Nie paviedamlajecca, pa čyjoj zajavie była zaviedzienaja sprava. Adnak z tekstu vynikaje jurydyčnaja łohika, jakaja dazvoliła Rasii ŭziacca za hety epizod. Pa-pieršaje, abvinavačany — hramadzianin Rasii, i paviedamleńnie jon, pavodle suda, adpraviŭ, fizična znachodziačysia na terytoryi Chołm-Žyrkaŭskaha rajona Smalenskaj vobłaści. Heta dała rasijskamu sudu terytaryjalnuju jurysdykcyju — čałavieka sudzili tam, dzie adbyłosia dziejańnie i dzie jon žyvie.
Bolš składanym było pytańnie, jak biełaruski siłavik uvohule moža ličycca «pradstaŭnikom ułady» ŭ Rasii. Kab pryraŭniać status biełaruskaha vajennasłužačaha da rasijskaha, sud skarystaŭsia Kanviencyjaj SND ab pravavoj dapamozie: pavodle jaje, hramadzianie adnoj krainy-ŭdzielnicy karystajucca na terytoryi inšych takoj ža pravavoj abaronaj, jak i ŭłasnyja hramadzianie.
Adsiul vysnova suda: biełaruski siłavik, jaki na radzimie maje status pradstaŭnika ŭłady, padlahaje takoj ža abaronie i ŭ Rasii.
Spravu razhladali ŭ asablivym paradku: Andrejeŭ paličyŭ za lepšaje pryznać vinu, tamu poŭnaha razboru dokazaŭ u sudzie nie było.
Hieroja telefonnych źlivaŭ pałkoŭnika Kisiala, jaki zaklikaŭ kalečyć demanstrantaŭ, raptoŭna apuścili na rajonny ŭzrovień12
Kamientary