Termin realizacyi ŭ Biełarusi astatkaŭ aŭtazapčastak biez dakumientaŭ ab paćviardžeńni adpaviednaści techničnamu rehłamientu «Ab biaśpiecy kołavych transpartnych srodkaŭ» (TR MS 018/2011) pradoŭžany da 1 studzienia 2017 hoda. Ab hetym zajaviŭ siońnia žurnalistam staršynia Dziaržaŭnaha kamiteta pa standartyzacyi Viktar Nazaranka.
«My pracujem pa techrehłamientach na kołavyja transpartnyja srodki, z novaha hoda ŭ hety miechanizm uklučajucca pastaŭščyki aŭtakampanientaŭ, zapasnych častak. Pryniata rašeńnie, što zapasnyja častki, jakija byli zaviezieny da 1 studzienia 2016 hoda, buduć raspradadzieny biez dakumientaŭ ab acency adpaviednaści da 1 studzienia 2017 hoda. Usie, što paśla hetaj daty, - pavinny buduć mieć adpaviednyja siertyfikaty, dekłaracyi, jak heta praduhledžana rehłamientam», - adznačyŭ Viktar Nazaranka.
Jak rastłumačyli ŭ pres-słužbie Dziaržstandartu, rašeńnie ab pradaŭžeńni terminaŭ źmieščana ŭ źmianieńni numar 5 da techničnaha kodeksa ŭstanoŭlenaj praktyki TKP 5.2.26-2014 «Nacyjanalnaja sistema paćviardžeńnia adpaviednaści Respubliki Biełaruś. Paćviardžeńnie adpaviednaści pradukcyi patrabavańniam techničnych rehłamientaŭ Mytnaha sajuza». Praduhledžvajecca mahčymaść realizacyi na terytoryi Biełarusi kampanientaŭ transpartnych srodkaŭ, vyrablenych u krainie abo ŭviezienych pa tavarasupravadžalnych dakumientach na jaje terytoryju da 1 studzienia 2016 hoda, biez dakumientaŭ ab paćviardžeńni adpaviednaści patrabavańniam TR MS 018/2011 i biez markiroŭki znakam JEEK da 1 studzienia 2017 hoda.
«Heta norma raspaŭsiudžvajecca na kampanienty transpartnych srodkaŭ, jakija raniej nie padlahali abaviazkovamu paćviardžeńniu adpaviednaści ŭ Biełarusi da ŭstupleńnia ŭ siłu techničnaha rehłamienta Mytnaha sajuza «Ab biaśpiecy kołavych transpartnych srodkaŭ» (TR MS 018/2011), heta značyć da 1 studzienia 2015 hoda», - rastłumačyli ŭ pres-słužbie Dziaržstandartu.
Pieralik kampanientaŭ, jakija da vypusku ŭ abaračeńnie na terytoryi JEAES pavinny prajści pracedury paćviardžeńnia adpaviednaści patrabavańniam biaśpieki, ustanoŭlenym u hetym dakumiencie, vyznačany techničnym rehłamientam Mytnaha sajuza «Ab biaśpiecy kołavych transpartnych srodkaŭ». Da takich pracedur adnosiacca siertyfikacyja abo dekłaravańnie adpaviednaści niepasredna vytvorcam (jaho aficyjnym pradstaŭnikom) abo imparcioram.-
Kamientary