Dvoje byłych kiraŭnikoŭ Litvy — eks-prezident Vałdas Adamkus i pieršy faktyčny kiraŭnik niezaležnaj Litvy Vitaŭtas Łandśbierhis — patrabujuć «zrabić usio, kab budaŭnictva atamnaj stancyi ŭ Astraŭcy było nieadkładna spyniena».
Jak paviedamlaje Delfi.lt, ich zvarot da ŭrada taksama padpisali kiraŭnik apazicyjnaj partyi Sajuz ajčyny — Litoŭskija chryścijanskija demakraty Habryelus Łandśbierhis, lidar apazicyjnaha Litoŭskaha libieralnaha ruchu Elihijus Masiulis i staršynia Litoŭskaha sajuza sialan i zialonych Ramunas Karbaŭskis.
«U adpaviednaści z hrafikam rabot, Biełaruskuju AES (BAES) namiačajecca padklučyć da elektrasietki ŭžo praz try hady. Niebiaśpiečnaja stancyja budzie padklučana da ŭžo najaŭnych mahutnych linij elektrapieradačy, užo praciahnutych u Visahinas, i tych, jakija płanujecca praciahnuć u Kruonis, tak što vyrablenaja tam elektraenierhija bieskantrolna napoŭnić našu krainu z usialakimi ekanamičnymi i palityčnymi nastupstvami «, — havorycca ŭ zvarocie.
Padkreślivajecca, što ŭ takim vypadku Litva «stanie nie tolki palityčna zaležnaj ad hetaha niebiaśpiečnaha vytvorcy elektraenierhii, ale i na hrošy ad prodažu hetaj elektraenierhii sama budzie finansavać prajekt, niebiaśpiečny i, mahčyma, pahibielny dla Litvy».
«Nie ŭpuskajučy Astravieckuju elektraenierhiju ŭ Litvu i nie kuplajučy jaje, a taksama nie dazvalajučy karystacca reziervovymi mahutnaściami elektraenierhietyčnaj sistemy Litvy, my možam stvaryć dla vykanaŭcaŭ prajekta vielmi ciažka pieraadolnyja pieraškody, uskładnić jaho realizacyju i mahčymaści ŭ płanie akupnaści. Razumiejučy ŭsio heta, my źviartajemsia da urada Litvy i adnačasova da ŭsich mižnarodnych arhanizacyj z patrabavańniem zrabić usio, kab budaŭnictva Biełaruskaj AES u Astraŭcy nieadkładna było spyniena», — havorycca ŭ zvarocie.
Jak adznačajecca ŭ dakumiencie, urad Litvy tym samym pavinien zabiaśpiečyć, kab vypracavanaja na BiełAES elektraenierhija ni pry jakich akaličnaściach nie trapiła ŭ Litvu i praź Litvu, a taksama kab jana nikoli nie pradavałasia na jaje rynku.
U svaju čarhu litoŭski ministr enierhietyki Rokas Masiulis zajaviŭ, što inicyjavanaja kansiervatarami i padtrymanaja niekalkimi partyjami zajava ŭradu Litvy z nahody budaŭnictva BiełAES ź`iaŭlajecca pieradvybarnym palitykanstvam. Pavodle słoŭ Masiulisa, zamiest taho kab šukać vinavatych, palitykam krainy varta było b prajavić adzinstva pry vyrašeńni hetaj prablemy.
«Urad užo davoli daŭno pracuje nad hetym pytańniem, i zroblena ŭžo niamała. Škaduju, što heta pytańnie załučajecca ŭ pieradvybarčy paradak dnia. Zamiest taho kab šukać šlachi, jak prajavić adzinstva pry vyrašeńni hetaha pytańnia, pa jakim va ŭsich palityčnych partyj jość kansensus, heta pytańnie ciapier padymajecca tak, byccam by nijakaha rašeńnia pa hetym pytańni nichto nie šukaje. Jašče bolšaje škadavańnie vyklikaje toje, što jość taki elemient varožaha padbuchtorvańnia, što navat ludzi šanoŭnyja, jak prezident Vałdas Adamkus i spadar Vitaŭtas Łandśbierhis, ŭklučajucca ŭ kampaniju «, — zajaviŭ Masiulis ahienctvu BNS.
Biełaruskaja AES uzvodzicca prykładna za 20 kiłamietraŭ ad Astraŭca (Hrodzienskaja vobłaść) pa prajekcie rasijskaj kampanii «Atambudekspart». Hienieralnym prajekciroŭščykam i padradčykam vystupaje rasijskaja kampanija AAT «NIAEP» — ZAT «ASE». Stancyja budzie składacca z dvuch enierhabłokaŭ sumarnaj mahutnaściu da 2.400 MVt. Uvod u ekspłuatacyju pieršaha błoka zapłanavany na listapad 2018 hoda, druhoha — na lipień 2020-ha.
Ciapier čytajuć
«Pračytajcie jaje historyju». Łukašenku daviałosia apraŭdvacca pierad Pucinym za hieorhijeŭskija stužki7
Kamientary