Kalakin: Jeŭrasajuz – heta pryhožaja kazka, ale biez Rasii my nie vyžyviem
Staršynia partyi «Spraviadlivy śviet» Siarhiej Kalakin na kanfierencyi «BiełaRuski dyjałoh» u Maskvie vykazaŭsia ŭ klučy, što intehracyja z Rasijaj – heta abjektyŭny praces.
«Davajcie ŭjavim sabie, što zaŭtra kažuć: «My intehracyju spyniajem». Što budzie ź Biełaruśsiu praź miesiac, kali 80% usioj pradukcyi, jakuju my vyrablajem, spažyvaje rasijski rynak i pryblizna 70% syraviny, jakuju my pierapracoŭvajem, my atrymlivajem z Rasii. Ekanamičnaja intehracyja ŭ bližejšy hady nam budzie nieabchodnaja dla raźvićcia ekanomiki. Usiakija mary ab ustupleńni ŭ Jeŭrapiejski Sajuz — heta dobra, pryhoža, ale heta pakul kazki. Jeŭrasajuz chaj pieravaryć toje, što jon užo pryniaŭ da siabie», — skazaŭ Kalakin.
My patelefanavali Siarhieju Kalakinu, kab spytacca, ci ličyć jon, što Biełaruś nie ŭ stanie vyžyć biez Rasii?
«Biezumoŭna. Kali my admovimsia ad rasijskaha rynku i rasijskaj syraviny, to Biełaruś pamre ŭ vielmi chutki termin. Tak histaryčna skłałasia. 80% syraviny my možam pradać tolki Rasii, Jeŭropie jana nie patrebnaja».
Adnak pa aficyjnych źviestkach na dolu Rasii prychodzicca nie 80, a 40% ekspartu našaj pradukcyi. Na Jeŭrapiejski Sajuz – navat bolš.
«Heta samapadman. Hetyja 60% u značnaj stupieni składajucca ź pierapracavanych rasijskich naftapraduktaŭ, jakija my ekspartujem u ES plus kalijnyja ŭhnajeńni. Voś i ŭsio. Kali prybrać naftavy składnik, to ličby buduć zusim inšyja. Nafty ž u nas svajoj niama. Moža, ja krychu nie maju racyju, ale biez hetaj nafty kala 70% našaha ekspartu ŭ ES laśnie».
Što tyčycca mahčymaści ŭstupleńnia Biełarusi ŭ Jeŭrapiejski sajuz, to Kalakin nie ličyć svaje słovy krytykaj.
«Heta fantastyka. U ahladnaj budučyni Jeŭrasajuz bolš nie prymie nivodnuju krainu. Heta dobraja mara «Biełaruś u ES», ale joj nie nakanavana spraŭdzicca. Kab pierajści nam na standarty ES, nam patrebna niekalki dziasiatkaŭ hadoŭ. Ja, biezumoŭna, vystupaju za intehracyju intehracyj. My nie pavinny byli ŭsie jajki składvać u adzin košyk. Treba imknucca dyviersifikavać svoj ekspart, palityku. Raźvićcio pavinna iści na niekanfrantacyjnaj asnovie. Adnak ja kažu pra siońniašniaje žyćcio. Na žal, tak skłałasia. Heta i histaryčny etap – naša žyćcio ŭ Savieckim Sajuzie. Tam my ŭsio vyrablali nie dla siabie, a pradavali vialikaj krainie. Pieraaryjentavać našu vytvorčaść z Rasii na ES prosta niemahčyma. Kali było b mahčyma, to my daŭno pradavali traktary, aŭtamabili ŭ Jeŭropu. Ale ž nie pradajem».
Kamientary