Zaraz rasiejski aroł nacelicca dźviuma hluhami. Piša ŭ svaim błohu Alaksandar Kłaskoŭski.
Chtości prahnazuje, što novy prezydent i novaśpiečany premjer abaviazkova sutyknucca łbami. Kali sami i nia chočuć, dyk kłany ich uciahnuć u klinč. I voś tady, maŭlaŭ, dla biełaruskaha aficyjnaha kiraŭnika nadydzie čas pałavić rybku ŭ mutnaj rasiejskaj vadzie. Namiakajuć, što nievypadkova kupiŭ kvateru ŭ Trajeckim adzin maskoŭski televiadoŭca z reputacyjaj pijar-kilera. I što cieraz łorda Beła abmiarkoŭvajecca nibyta zusim nia toj plan, pra jaki huduć prafany.
Pa mnie, dyk hetyja peryjadyčnyja hipotezy pra novy pachod na Maskvu — sa sfery nienavukovaj fantastyki. Zaraz biełaruskamu kiraŭniku nie da taho. Tut by acaleć, kab nie zadušyli hazavymi koštami dy nie zasmaktali paŭzučaj inkarparacyjaj.
Palitolah Valer Karbalevič miarkuje tak: "Ci budzie kankurencyja miž dvuma rasiejskimi liderami, ci nia budzie jaje — heta mała paŭpłyvaje na dačynieńni Maskvy ź Mienskam. Chutčej tut buduć mieć upłyŭ hieapalityčnyja čyńniki, i ŭ pryvatnaści — praces ruchu Ŭkrainy ŭ NATO. Voś na hetym tle Łukašenka moža toje-sioje vyjhrać. U Rasiei ž paśla straty pazycyjaŭ ziuhanaŭcami ŭ jaho niama surjoznaha idealahičnaha apiryšča. Sproby zhulać na mahčymych supiarečnaściach miž Miadźviedzievym i Pucinym ničoha nie daduć".
Jak bačym, pierasiedzieć Pucina Łukašenku pakul što nie pašenciła. Pałkoŭnik KHB, jaki ničoha nie zabyvaje, zastajecca pry ŭładzie. Ź inšaha boku, da ŭłady prychodzić čałaviek, jaki nie adzin hod faktyčna stajaŭ na čale "Hazpromu". I jaki peŭna ž budzie hnuć liniju na paśladoŭnaje ŭvasableńnie "eŭrapiejskaj formuły", što dla Biełarusi na śmierć padobnaja.
Karaciej, perspektyva mieć stasunki z "Pućviedzievym" Łukašenku naŭrad ci padajecca ružovaj. Zaraz rasiejski dźviuchhałovy aroł z symbalu moža pieratvarycca ŭ realnaha mutanta, jaki pačnie dziaŭbci dźviuma hluhami.
Ciapier čytajuć
U Drazdach vystavili na prodaž katedž z rekordnaj canoj — $7,5 miljona ŠMAT FOTA1
Kamientary