Zasnavalnik Masquerade Technologies: My vybrali Facebook, tamu što našy misii padobnyja
Paśla dałučeńnia biełaruskaj kampanii Masquerade Technologies da karparacyi Facebook prykładańnie MSQRD praciahnie raźvivacca i zastaniecca biaspłatnym. Pra heta paviedamiŭ BiełaPAN kiraŭnik i adzin z zasnavalnikaŭ kampanii Jaŭhien Nieŭhień, kamientujučy kuplu kampanii karparacyjaj Facebook.
Pra toje, što Facebook nabyła biełaruskuju kampaniju, stała viadoma viečaram 9 sakavika. Paviedamlałasia taksama, što try zasnavalniki Masquerade Technologies pierajeduć u Łondan.
Dadatak MSQRD byŭ raspracavany za 48 hadzin na minskim chakatonie Garage48 u kancy listapada 2015 hoda, u śniežni staŭ dastupny dla zapampoŭki ŭ AppStore i za paru miesiacaŭ nabyŭ papularnaść siarod miljonaŭ karystalnikaŭ pa ŭsim śviecie, a ŭ mnohich krainach ŭznačaliŭ śpisy samych papularnych prykładańniaŭ u AppStore. MSQRD dazvalaje karystalnikam u režymie realnaha času nakładvać na tvar roznyja maski-filtry i zapisvać fota- i videasełfi. Možna, naprykład, damalavać sabie vielizarnyja vočy ci zajačyja vušy, nakłaści maski Baraka Abamy, Kančyty Vurst abo Leanarda Dy Kaprya. Adna z hałoŭnych asablivaściaŭ servisu składajecca ŭ tym, što jon zachoŭvaje mimiku čałavieka, jaki prymiaraje maski.
Jak raskazaŭ Jaŭhien Nieŭhień, u pierśpiektyvie ŭ dadatku źjaviacca novyja funkcyi, jakija buduć tyčycca nie tolki masak. Praciahniecca praca nad viersijaj prykładańnia dla apieracyjnaj sistemy Android. «My praciahvajem zajmacca Android-viersijaj. Ja dumaju, što ciapier, kali my majem padtrymku Facebook, heta budzie jašče chutčej, pakolki ŭ nas budzie bolš resursaŭ», — skazaŭ Nieŭhień.
U Facebook, pavodle jaho słoŭ, technałohija Masquerade budzie ŭbudavanaja ŭ servis videatranślacyi Facebook Live, veb-viersiju Facebook i inšyja servisy sacsietki. Rola kamandy ŭ novym prajekcie zastaniecca raniejšaj.
Jak zaznačyŭ Nieŭhień, prajekt atrymaŭ «dastatkova» prapanoŭ ab partniorstvie ad bujnych kampanij, adnak jon nie moža vydavać detali pieramovaŭ. Pry hetym kiraŭnik kampanii nazvaŭ «poŭnaj vutkaj» raspaŭsiudžanuju ŭ kancy lutaha infarmacyju ab tym, što Masquerade kupiła karparacyja Apple za 117 młn. dołaraŭ. «Adzin čałaviek sam jaje vydumaŭ, pastaviŭ usich na vušy, i nam potym davodziłasia z usim raźbiracca. Jon navat stvaryŭ niekatoryja prablemy hetym žartam. Tak što nijakaj doli praŭdy ŭ hetym niama, a kamientavać, z kim mienavita my razmaŭlali, my nie možam», — zajaviŭ Jaŭhien Nieŭhień.
Pavodle jaho słoŭ, kamanda prajekta abrała Facebook pa dźviuch pryčynach. Pa-pieršaje, misii Masquerade i Facebook «vielmi padobnyja i navat supadajuć». «Masquerade — heta kampanija, stvoranaja dla znosin ludziej. Jakaja jašče kampanija (akramia Facebook) tak upłyvaje na znosiny ludziej? Ja takich bolš nie viedaju», — adznačyŭ Nieŭhień.
Druhoj pryčynaj jon nazvaŭ dynamičnaje raźvićcio Facebook. «Na samaj spravie isnuje nie takaja vialikaja kolkaść kampanij, jakija tak chutka rastuć», — padkreśliŭ Nieŭhień.
Jon taksama paćvierdziŭ svaje płany pierajechać u Łondan.
Kamientary