Virus Zika, jaki, jak ličyłasia, niebiaśpiečny dla novanarodžanych, zdolny vyklikać zapaleńnie mozhu i ŭ darosłych. Da takoj vysnovy pryjšli miedyki z Francyi, paviedamlajuć infarmahienctvy.
Vypadak uździejańnia virusa Zika na darosłaha čałavieka byŭ zafiksavany paśla abśledavańnia 81-hadovaha mužčyny, jaki raniej ździejśniŭ padarožža pa krainach Akijanii.
U pacyjenta byŭ dyjahnastavany mieninhaencefalit. Hetaje zachvorvańnie spačatku vyklikaje zapaleńnie hałaŭnoha mozhu, a zatym moža paškodzić śpinny mozh i pryvieści da paraliču. Miedyki ličać, što mieninhaencefalit moh vyklikać virus Zika, usie inšyja pryčyny — virusnaha i bakteryjalnaha pachodžańnia — vyklučanyja.
Adznačajecca, što špitalavany mužčyna raniej mieŭ mocnaje zdaroŭje, pieradumoŭ dla padobnaha zachvorvańnia nie było.
Raniej ličyłasia, što virus Zika ŭjaŭlaje niebiaśpieku dla ciažarnych žančyn, pakolki moža vyklikać mikracefaliju (pamianšeńnie mozhu) ŭ novanarodžanych. Vakcyny ad virusa da hetaha času niama.
Kamientary