Zaŭtra Minski haradski sud razhledzić skarhi troch fihurantaŭ «spravy hraficistaŭ»
18 sakavika Minski haradski sud razhledzić skarhi troch fihurantaŭ «spravy hraficistaŭ» — Viačasłava Kasinierava, Maksima Piakarskaha i Vadzima Žaromskaha.
Pačatak suda — u 11.00. Skarhi buduć razhladać u apielacyjnym paradku, z ulikam źmianieńniaŭ u niekatoryja kodeksy Respubliki Biełaruś, paviedamlaje pravaabarončy sajt spring96.org.
Troje maładych ludziej byli zatrymany ŭ žniŭni 2015 hoda. Ich abvinavacili ŭ naniasieńni ŭ Minsku hrafici «Biełaruś maje być biełaruskaj» i «Revalucyja śviadomaści, jana ŭžo idzie…», a taksama ŭ paškodžańni dvuch biłbordaŭ z sacyjalnaj rekłamaj z vyjavaj supracoŭnikaŭ milicyi. Spačatku im vystavili abvinavačańnie pa č. 2 art. 339 KK (chulihanstva, učynienaje hrupaj asobaŭ), jakaja praduhledžvaje pakarańnie da šaści hadoŭ pazbaŭleńnia voli. Kala miesiaca ŭsie troje znachodzilisia pad aryštam, zatym ich vyzvalili pad padpisku ab niavyjeździe. Biełaruskija pravaabaroncy hatovy byli pryznać hraficistaŭ palitviaźniami ŭ vypadku pakarańnia ich realnymi terminami źniavoleńnia. Paźniej abvinavačańnie ŭ dačynieńni da Piakarskaha pierakvalifikavali z art. 339 na art. 341 KK (apahańvańnie zbudavańniaŭ i psavańnie majomaści), astatnim fihurantam artykuł ab chulihanstvie pakinuli, adnak kvalifikavali ich dziejańni jak psavańnie majomaści.
Materyjalnuju škodu za psavańnie biłbordaŭ abvinavačvanyja całkam vypłacili.
Kamientary