Razžałavany dekan ź jurfaka BDU Šydłoŭski znajšoŭsia ŭ niečakanym miescy
Kandydat jurydyčnych navuk, dacent BDU Andrej Šydłoŭski, jaki addaŭ univiersitetu 27 hod žyćcia (ale ŭźlacieŭ tolki paśla palityčnych čystak u 2021-m) i byŭ cicha vystaŭleny za varoty praz padazreńni ŭ karupcyi, adšukaŭ novuju rabotu — u darožna-budaŭničym treście.
Proźvišča Andreja Šydłoŭskaha źjaviłasia na sajcie minskaha Darožna-budaŭničaha tresta №5.
Kampanija ŭvachodzić u chołdynh «Biełaŭtador», zajmajecca budaŭnictvam daroh i šmat hadoŭ stabilna stratnaja. U treście stanam na pačatak 2026 hoda pracujuć 606 čałaviek — u 2021 było 780.
Andrej Šydłoŭski staŭ tam namieśnikam dyrektara pa jurydyčnych pytańniach.
Ź jahonym prychodam kolkaść supracoŭnikaŭ arhanizacyi, jakija majuć druhuju stupień vyšejšaj adukacyi, vyrasła minimum na 15% pavodle ŭnutranaj statystyki.
Fota novaha mieniedžara jašče nie zahruzili na sajt arhanizacyi, tamu možna zrabić vysnovu, što ŭładkavany Šydłoŭski niadaŭna. Prynamsi paru miesiacaŭ siadzieŭ biez raboty paśla svajoj biassłaŭnaj adstaŭki ź jurydyčnaha fakulteta BDU — biez uračystaha raźvitańnia i biez kvietak.
Nahadajem, minimum sa śniežnia 2025‑ha Andrej Šydłoŭski nie dekan jurydyčnaha fakulteta BDU, jaki ŭznačaliŭ u razhar palityčnych čystak u 2021-m.
Cicha źniaty, Šydłoŭski taksama vylecieŭ z akademičnaj śfiery, u jakoj pracavaŭ usio darosłaje žyćcio.
Pa mierkavańni, pryniatym na samim jurydyčnym fakultecie, karjera dekana-danosčyka skončyłasia ŭ momancie, kali na jaho ŭłasnyja finansavyja ekśpierymienty z buchhałteryjaj fakulteta danieśli pakryŭdžanyja.
Čytajcie taksama: «Atačyŭ siabie danosčykami». Raskazvajem pra dekana jurfaka BDU, sa studentam jakoha dvojčy zapisali videa ŭ duchu siłavikoŭ
***
Andrej Šydłoŭski ŭ 1998 hodzie z adznakaj skončyŭ jurydyčny fakultet BDU, u 2002‑m abaraniŭ dysiertacyju na temu «Instytut pryznačeńnia pakarańnia ŭ kryminalnym pravie Respubliki Biełaruś: sistemna-funkcyjanalny analiz».
Doŭhi čas Šydłoŭski byŭ namieśnikam dekana jurfaka BDU pa vučebna-vychavaŭčaj častcy (z 2006‑ha da 2020-ha). Paśla hod zajmaŭ pasadu pieršaha namieśnika dyrektara Instytuta pierapadrychtoŭki i pavyšeńnia kvalifikacyi sudździaŭ, rabotnikaŭ prakuratury, sudoŭ i ŭstanoŭ justycyi BDU. A ŭ vieraśni 2021‑ha viarnuŭsia na jurfak, užo dekanam. Jon zamianiŭ Taćcianu Michalovu, jakaja choć i ŭdzielničała ŭ represijach suprać studentaŭ, ale nie ščyravała ŭ hetym.
Kamientary