U Minsku sudziać byłoha hałoŭnaha śledčaha stalicy, jaki 10 hadoŭ chavaŭsia ŭ Rasii
U Minskim abłasnym sudzie pačaŭsia praces u dačynieńni da byłoha namieśnika načalnika papiaredniaha śledstva HUUS Minharvykankama Hieorhija Žuka.
Pałkoŭnik milicyi abvinavačvajecca ŭ tym, što ŭ 2005 hodzie atrymaŭ chabar u 80 tysiač dołaraŭ (č. 3 art. 430 KK). Pasada kiraŭnika tady była vakantnaj, tamu abaviazki načalnika vykonvaŭ Žuk. Viadoma, što ŭ hetym ža hodzie jon pajšoŭ na piensiju. Na toj momant jamu było 50 hadoŭ.
Pavodle viersii śledstva, supracoŭnik milicyi ŭziaŭ hrošy ad pradprymalnika, kab pravierki jaho biźniesu spynilisia i kryminalnaja sprava ŭ dačynieńni da jaho była spynienaja. Viadoma, što try čałavieki, jakija ŭdzielničali ŭ pieradačy chabaru, užo asudžanyja Viarchoŭnym sudom.
Žuk ŭvieś hety čas chavaŭsia ŭ Rasii. Jon byŭ abvieščany ŭ mižnarodny vyšuk. U 2015 hodzie byŭ zatrymany na terytoryi RF i ŭ kastryčniku ekstradavany ŭ Biełaruś i źmieščany ŭ SIZA Viciebska.
Padsudny vinu nie pryznaje. Śćviardžaje, što pradprymalniki, jakija prachodziać pa spravie jak śviedki, dali suprać jaho iłžyvyja pakazańni.
Hienieralnaja prakuratura zajaviła isk ab spahnańni z Žuka 80 tysiač dołaraŭ — dachodu, atrymanaha złačynnym šlacham.
Kali vina byłoha supracoŭnika MUS budzie dakazanaja, jamu pahražaje ad 5 da 15 hadoŭ pazbaŭleńnia voli z kanfiskacyjaj majomaści.
Kamientary