Ekśpierty pra vizit Łukašenki ŭ Turcyju: Pošuk novych rynkaŭ zbytu i miratvorčaja misija

Vizit Alaksandra Łukašenki ŭ Turcyju na samit Arhanizacyi isłamskaha supracoŭnictva źviazany ŭ pieršuju čarhu z pošukam novych rynkaŭ zbytu. Takoje mierkavańnie vykazaŭ palitołah Valer Karbalevič.

Łukašenka nakiravaŭsia z rabočym vizitam u Turcyju 13 krasavika. Pavodle źviestak pres-słužby prezidenta, jon voźmie ŭdzieł u samicie Arhanizacyi isłamskaha supracoŭnictva, jaki projdzie 14 krasavika ŭ Stambule pad devizam «Adzinstva i salidarnaść u imia spraviadlivaści i miru», i vystupić na im z pramovaj. Prahrama rabočaha vizitu taksama praduhledžvaje šerah dvuchbakovych sustreč i pieramovaŭ ź lidarami zamiežnych krain.

U Arhanizacyju isłamskaha supracoŭnictva ŭvachodziać 57 dziaržaŭ, status naziralnikaŭ majuć Rasija, Bośnija i Hiercahavina, Centralna-Afrykanskaja Respublika, a taksama šerah arhanizacyj, u tym liku AAN i Ruch niedałučeńnia.

Jak zaznačyŭ Valer Karbalevič, Biełaruś apošnimi hadami sprabuje šukać novyja rynki zbytu, tamu aktyŭny ŭdzieł Łukašenki ŭ roznych forumach — nie navina.

«Jon i da ŠAS, i da BRIKS choča niejak pryviazacca, ciapier voś — da isłamskich dziaržaŭ», — skazaŭ palitołah.

«Da taho ž jość peŭnyja prablemy z zachodnim śvietam: u Jeŭropu ž jon nie jeździć, jaho tudy nie zaprašajuć. A kudyści jeździć treba. I jon jeździć ź vialikim zadavalnieńniem na roznyja forumy, kali jość takaja mahčymaść», — ličyć Karbalevič. Na jaho dumku, udzieł u samicie Łukašenka pasprabuje vykarystać dla aktyvizacyi supracoŭnictva ź isłamskimi krainami. «Heta mahčymaść jašče raz zaśviacicca, skazać, što my aktyŭna chočam supracoŭničać», — zaznačyŭ palitołah.

Pry hetym jon miarkuje, što Maskva, u jakoj zaraz napružanyja adnosiny sa Stambułam, nie stanie vykazvać niezadavolenaści pajezdkaj Łukašenki ŭ Turcyju. «Stambuł — heta tolki miesca praviadzieńnia forumu, tut nikudy nie dzieniešsia. Nie dumaju, što ŭ Rasii buduć niejkija pytańni z nahody hetaj jaho pajezdki», — vykazaŭ mierkavańnie Karbalevič.

Palitołah Dzianis Mieljancoŭ, naadvarot, ličyć, što Kreml niehatyŭna ŭsprymie vizit Łukašenki ŭ Stambuł, chacia publična niezadavolenaść jon raskryvać nie stanie.

«Kreml naohuł niezadavoleny lubymi krokami Biełarusi, jakija choć niejak vybivajucca z rečyšča rasijskaj źniešniaj palityki. Pakolki ŭ nas, jak u sajuznych dziaržaŭ, jość damoŭlenaść kaardynavać źniešniepalityčnuju dziejnaść, Kreml čakaje, što Biełaruś budzie da litary vykonvać usie ŭzhadnieńni i prytrymlivacca tych pazicyj, jakich prytrymlivajecca Rasija. A kali Biełaruś sprabuje hulać niejkuju svaju hulniu, heta sparadžaje ŭ Maskvy niehatyŭnyja emocyi, jakija časam vypluchvajucca ŭ presu, ale čaściej za ŭsio nie», — ličyć palitołah.

Na dumku Mieljancova, udzieł u samicie Arhanizacyi isłamskaha supracoŭnictva Łukašenka vykarystoŭvaje dla taho, kab nahadać pra hatoŭnaść Biełarusi vystupać miratvorcam va ŭrehulavańni roznych kanfliktaŭ, u tym liku pamiž Rasijaj i Turcyjaj, pra što ŭžo zajaŭlałasia raniej.

«Tut splalisia ŭsie hetyja prablemnyja momanty, jakija naša ŭłada, mabyć, choča raśsiačy adzinym rucham cieła. Biełaruski prezident pajechaŭ z tym, kab danieści biełaruskaje bačańnie situacyi.

Trochi zhasaje ŭžo hety imidž niejtralnaj placoŭki i miratvorca, tamu jaho treba pastajanna padmacoŭvać, samit daje takuju mahčymaść», — adznačyŭ Mieljancoŭ. Da taho ž, dadaŭ jon, heta budzie, chutčej za ŭsio, prosta vystup, rytoryka «pra mir va ŭsim śviecie», jakaja nie abaviazvaje Biełaruś ni da čaho kankretnaha.

«Naturalna, paśla takich vizitaŭ i zajaŭ biełaruskaha lidara ŭ Maskvie skryhočuć zubami, ale ničoha publična zrabić nie mohuć, bo reahavać niehatyŭna — heta dać padstavu papraknuć siabie ŭ supraćdziejańni mirnaha ŭrehulavańnia», — ličyć palitołah.

Varta zaznačyć, što raniej Łukašenka zaklikaŭ Rasiju i Turcyju pajści na sastupki dziela adnaŭleńnia dobrych adnosin. Vystupajučy 12 śniežnia 2015 hoda ŭ Ašchabadzie na mižnarodnaj kanfierencyi z nahody 20-hodździa niejtralitetu Turkmienistana, jon zajaŭlaŭ: «Treba pieraadoleć usialakija nahniatańni žarściaŭ i znajści mahčymaść zrabić dla pačatku chacia b paŭkroku nasustrač adzin adnamu. I prablema vyrašycca. Adnoviacca tyja dobryja, blizkija adnosiny, jakija byli pamiž hetymi narodami i dziaržavami i abaviazkova buduć».

• 0
• 0
• 0
• 0
• 0
• 0
• 0
• 0