17 maja u Bresckim abłasnym krajaznaŭčym muziei prajšła impreza pad nazvaj «Ok, Google: SSSR?».
Mierapryjemstva było praviedziena ŭ miežach «Nočy muziejaŭ». Ścieny muzieja azdobili savieckimi ahitacyjnymi płakatami, a haściej sustrakali družyńniki.
U dziciačaj art-zonie pakazvali savieckija multfilmy, pravodzili majstar-kłas pa vyrabie karablikaŭ z papiery. Darosłym prapanoŭvali zhulać u šaški i damino. Taksama možna było zdać makułaturu i atrymać za heta knihu. Pracavaŭ i cyrulnik, jaki rabiŭ usim achvotnym pryčoski ŭ styli 60-70-ch hadoŭ.
Pa muziejnych załach maršyravaŭ pijanierski atrad, jaki śpiavaŭ pijanierskija pieśni i skandavaŭ łozunhi, nakštałt «Budź hatovy — zaŭsiody hatovy».
«U hetym hodzie kruhłaja data raspada Savieckaha Sajuza i my vyrašyli trochi ab im uzhadać. Uzhadać u kulturna-pobytavym płanie, biez palityki. Chacieli pakazać niekatoryja elemienty i aśpiekty žyćcia savieckaha čałavieka 1960-70-ch hadoŭ»,— paviedamiŭ «Našaj Nivie» Alaksiej Miciukoŭ, dyrektar Bresckaha abłasnoha krajaznaŭčaha muzieja.
Na pytańnie, ci nie źjaŭlajucca palitykaj pijaniery, jon adkazaŭ tak:
«Ja i sam byŭ pijanieram. Ničoha drennaha ŭ hetym nie baču».
Noč muziejaŭ — mižnarodnaja akcyja, prymierkavanaja da Mižnarodnaha dnia muziejaŭ, padčas jakoj možna ahledzieć muziejnyja ekspazicyi nočču. U hetuju noč mnohija muziei adkryty dla naviedvalnikaŭ paśla zachodu sonca i amal da ranicy. Asnoŭnaja meta akcyi - pakazać resurs, mahčymaści, patencyjał sučasnych muziejaŭ, pryciahnuć u muziei moładź.
Upieršyniu «Noč muziejaŭ» była praviedziena ŭ Bierlinie ŭ 1997. Mižnarodny dzień muziejaŭ — štohadovaje śviata, jakoje adznačajecca 18 maja.
Kamientary