«Ułada — ty pačvara!». Byŭ vieteran ci nie, a ideołahi zastalisia biez pracy
Infarmacyjnaja prastora, dzie łoviać naviny žychary Homielu, katory tydzień zaprudžana malkami i ščupakami pra «veterana, jaki płača». Dzie nie tycnieśsia — a tam abo pra veterana sa ślazami na vačach, abo pra represii. Ujavicie — ułada represavała svaich ža ideolahaŭ, i z-za čaho? Adnaho dopisu ŭ sacyjalnaj sietcy.
Voś hetaha, na Dzień pieramohi: «Hańba! Pakinuli Kaściukoŭku bieź śviatkavańnia Dnia pieramohi! Siońnia mnie było soramna za našu ŭładu: na płoščy pasiołka Kaściukoŭka siadzieŭ veteran vajny i płakaŭ, płakaŭ ad kryŭdy. Ja praviała jaho da abeliska, jon pakłaŭ kvietki i pajšoŭ dachaty. Hańba nam usim! Ułada — ty pačvara!!!»
O tak vykazała svajo abureńnie žycharka pasiołka Kaściukoŭka, jaki ciapier uklučany ŭ miežy horadu nad Sožam. Jak heta častka Čyhunačnaha rajonu Homielu, to ŭłady kažuć, što ŭsich veteranaŭ zaprasili śviatkavać 9 traŭnia u Horad. Adkul ža ŭziaŭsia toj veteran, jaki siadzieŭ na płoščy i płakaŭ? Ułady, pa ich słovach, nia viedajuć. Dyj naohuł śćviardžajuć, što brachnia heta ŭsio i varožyja intryhi. A tym nia mienš, ideolahaŭ miascovych pavykidali z pracy z-za «veterana, jaki płakaŭ». I ideolaha Čyhunačnaha rajonu Alenu Švanskuju, i namieśnika staršyni Homielskaha harvykankamu, Aksanu Rudzianok. Ich načalnikam dali vymovy.
Jak tak? Ułady stajać na svaim — veterana nie było!
Maŭlaŭ, tych veteranaŭ u Kaściukoŭcy — šeść čałaviek, i ŭsia hetaja nievialikaja pastva idealahična dahledžanaja i pry spravie, nikim nie pakryŭdžanaja. Maŭlaŭ, usich naviedali «pa miescy žycharstva», i nichto pa vulicy nie chadziŭ i nia płakaŭ!
Jaki ŭsio-tki pahanieńki i niaŭdziačny narodziec dastaŭsia ŭ spadčynu ad saŭka našaj uładzie! Vertykal naša tak starałasia, kab Dzień pieramohi pryjšoŭ u kožny dom — i parady pa televizary, i mitynhi la pomnikaŭ, i vajennyja śpievy z kožnaha prasa. Liberalnaja supolnaść ad hetaha šału płakała i ŭciakała ŭ lasy ci na leciščy smažyć šašłyki, ci na reki — kab vyłavić na złość uładzie apošniaha karasia. Takija vysiłki byli prykładzienyja, kab śviata atrymałasia, a ŭsio ž niezadavolenyja zastalisia!
Publičnyja rozhi dla vinavatych — za što? Čaho ideolahaŭ paskidali z kresłaŭ za pusty miech?
Tym časam žančyna, jakaja tak pakryŭdziła svaim dopisam ułady, zalahła na dno. Ale pieradaje adtul, što byŭ, byŭ veteran! Moža być, jana taksama zajmieła prablemy. A ŭłada — svajo: «Veterana nie było!»
Kali veterana nie było — a ideolahaŭ zvolnili, to daješ veterana pad kožnuju biełaruskuju ŭstanovu! Kali ŭłada takaja chutkaja i nierazborlivaja na represii da svaich, to čamu b nie skarystać heta?
Naprykład, prapanuju fłeš-mob «Płača veteran» z zapisami ŭ sacyjalnych sietkach takoha kštałtu: «Idu ŭčora, a pad paliklinikaj siadzić veteran i płača — jamu nie zrabili renthien! Ułady — vy pačvary!!!» «A ja ŭčora idu — a pad upraŭleńniem sacyjalnaj abarony siadzić i płača veteran — jamu nie dali pensii, ułady — vy pačvary!!!» «Bačyła veterana, jaki płakaŭ kala ŭpraŭleńnia adukacyi — jaho prosta nie puścili ŭ budynak, ułady — vy pačvary!!!»
Možna napisać pra jakuju-niebudź pradavačku, jakaja abličyła vas, i napisać, što pobač stajaŭ veteran i płakaŭ. «Upraŭleńnie handlu — vy pačvary!!!» Ci na pravadnicu ŭ ciahniku. Ci na milicyjanera jakoha-niebudź.
Mo, niekali ŭ sacyjalnych sietkach źjavicca post, jak na hanku kala administracyi prezydenta siadzieŭ i płakaŭ veteran. Ci navat niekalki.
Kab nie płacić padatak na sabak, minčuki pačali zdavać ich u punkty adłovu25
Kamientary