Sierena Uiljams viartajecca ŭ vialiki tenis i zhulaje na turniry ŭ Łondanie
Lehiendarnaja amierykanskaja tenisistka, 44‑hadovaja Sierena Uiljams vierniecca ŭ vialiki tenis i vystupić u červieni ŭ parnym razradzie na prestyžnym turniry WTA 500 u łondanskim Queen’s Club. Pra heta abviaścili arhanizatary turniru, piša VVS.
«23‑razovaja pieramožca turniraŭ Vialikaha šlema ŭ adzinočnym razradzie Sierena Uiljams abviaściła siońnia pra svajo viartańnie ŭ prafiesijny tenis; jaje debiut adbudziecca hetym letam na turniry HSBC Championships v Łondanie», — havorycca ŭ paviedamleńni arhanizataraŭ.
Uiljams nie źjaŭlałasia na korcie z momantu parazy ŭ trecim raŭndzie US Open u 2022 hodzie.
Turnir pačniecca 8 červienia. Arhanizatary dali Uiljams uajłd-kard. Miarkujecca, što jana zhulaje ŭ pary z 19‑hadovaj kanadskaj tenisistkaj Viktoryjaj Mboka.
«Queen's Club padajecca idealnym miescam dla pačatku hetaha novaha raździełu. Travianoje pakryćcio padaryła mnie adny z samych značnych momantaŭ u majoj karjery, i ja rada viarnucca da spabornictvaŭ na adnoj z samych znakavych placovak hetaha vidu sportu», — cytujuć arhanizatary samu Uiljams.
Čutki pra viartańnie Siereny pačali cyrkulavać jašče letaś, kali jaje imia źjaviłasia ŭ śpisie hulcoŭ, jakija zarehistravalisia na dopinh-kantrol.
U paniadziełak jana apublikavała ŭ sacsietkach videa, na jakim jana idzie na kort, z podpisam: «Napeŭna, usie ŭžo čuli navinu».
Za 27 hadoŭ vystupleńniaŭ Sierena Uiljams pieramahła na 23 turnirach Vialikaha šlema, i heta — rekord Adkrytaj ery ŭ tenisie, jakaja pačałasia ŭ 1968 hodzie. Da hetaha 24 pieramohi atrymała aŭstralijka Marharet Kort.
Akramia adzinočnych tytułaŭ, Sierena razam ź siastroj Vinus vyjhrała 14 turniraŭ Vialikaha šlema ŭ parnym razradzie. Akramia taho, siostry ŭ pary trojčy pieramahali na Alimpijskich hulniach, a ŭ Łondanie ŭ 2012 hodzie Sierena dadała da hetaj kalekcyi i zołata ŭ adzinočnym razradzie.
Praz try tydni paśla turniru ŭ łondanskim Queen's Club pačniecca Uimbłdon. Kab zhulać i na hetym turniry, kali jana hetaha zachoča, Sierenie znoŭ spatrebicca uajłd-kard, ale, całkam mahčyma, arhanizatary Uimbłdona buduć rady znoŭ ubačyć supierzorku na svaich kortach.
Trochrazovy pieramožca Uimbłdona Džon Makinroj skazaŭ, što heta, na jaho dumku, było b łahičnym nastupnym krokam.
«Kali Sierena Uiljams, najvialikšaja tenisistka ŭsich časoŭ, viartajecca, to jana viartajecca nie dla taho, kab prosta pahulać — jana choča znoŭ vyjhrać turnir-mejdžar, — skazaŭ Makinroj. — Nijakich inšych pryčyn dla jaje viartańnia ŭ tenis ja vykazać nie mahu».
Ciapier čytajuć
Maładuju biełarusku pratrymali ŭ rasijskim SIZA amal 4 hady i apraŭdali. A kampiensacyju dali takuju, nibyta ŭ tvar plunuli3
Kamientary