Styrno ŭłady ŭ chołdynhu «Trajpł» pierajšło 28-hadovamu synu saŭładalnika hrupy kampanij Siarhieju Čyžu. Pra heta raspaviali TUT.BY niekalki krynic.
Nahadajem, hiendyrektar «Trajpła» Juryj Čyž byŭ zatrymany 11 sakavika. Jaho padazrajuć u niavypłacie padatkaŭ u asabliva bujnym pamiery. Staršynia KDB Valeryj Vakulčyk, adkazvajučy na pytańnie pra «spravu Čyža», niadaŭna zajaviŭ žurnalistam, što «niama navat blizka padstaŭ adpuścić jaho pad padpisku ab niavyjeździe».
Pa słovach surazmoŭcy, «paśla zatrymańnia Juryja Sanyča nastupiła niejkaje biezuładździe». «Była paralizavanaja praca šerahu pradpryjemstvaŭ, jakija ŭvachodziać u «Trajpł». «Prastory», pra jakija ŭsie pisali, tolki viarchuška ajśbierha. A jość jašče budoŭla, zavody… Ciapier baćka delehavaŭ paŭnamoctvy synu. Situacyja pastupova pačynaje nie toje kab kardynalna mianiacca, ale vidać śviatło ŭ kancy tunela, da jakoha treba ruchacca», — raspaviała krynica, znajomaja z kiraŭnictvam «Trajpła».
Što tyčycca pierśpiektyŭ «spravy «Trajpła», to surazmoŭca skazaŭ, što «situacyju składana schodu ŭziać i razrulić», tamu što ŭ Juryja Čyža «pasivy pieravyšajuć aktyvy ŭ razy».
«Ciapier funkcyi kiraŭnika pierajšli Siarhieju. U jaho dobraja adukacyja. Niahledziačy na maładość, u syna ŭžo jość kiraŭničy dośvied», — skazała jašče adna krynica.
Da hetaha Siarhiej Čyž byŭ dyrektaram kampanii «Prastor Trejd», jakaja kiruje piaćciu hipiermarkietami Prostore u Minsku. Sa słovaŭ rasijskich krynic, u suviazi z vysokaj zaniataściu Čyža-małodšaha u «Trajple» u «Prastor Trejd» praviedzienyja kadravyja i arhanizacyjnyja pierastanoŭki. Bolš paŭnamoctvaŭ delehavana ciapierašnim i zaprošanym top-mieniedžaram.
Raniej stała viadoma, što Siarhiej Čyž abrany zamiest baćki na pasadu staršyni naziralnaj rady futbolnaha kłuba «Dynama-Minsk».
Pra Siarhieja Čyža viadoma niašmat. Jon naradziŭsia ŭ 1988 hodzie. Paśla zakančeńnia škoły pajechaŭ na vučobu ŭ Anhliju. Spačatku ŭ kaledž pry Łondanskim univiersitecie, zatym — u Oksfardski ŭniviersitet. Da prychodu ŭ «Prastor» pracavaŭ u kampanii «Tadeum», jakaja pastaŭlała pradukty charčavańnia dla sietki hipiermarkietaŭ.
U 2013 hodzie Siarhiej Čyž uvajšoŭ u naziralny saviet Minskaha zavoda pienistych vinaŭ. Heta adbyłosia paśla taho, jak «Trajpł» vykupiŭ pakiet akcyj zavoda.
Uletku 2015 hady syn Čyža adhulaŭ pyšnaje viasielle ŭ kompleksie «Łahojsk». U jakaści chedłajniera na ŭračystaści vystupaŭ Mikałaj Baskaŭ.
U kampanii «Trajpł» admovilisia ad kamientaroŭ.
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?15
Kamientary