Dziaržatamnahlad: Źviestki litoŭskaha boku pra mahčymy čarhovy incydent na Biełaruskaj AES nie paćvierdzilisia

U departamiencie pa jadziernaj i radyjacyjnaj biaśpiecy MNS Biełarusi (Dziaržatamnahladzie) 10 červienia prakamientavali infarmacyju litoŭskaha boku pra čarhovy incydent, jaki nibyta adbyŭsia na budplacoŭcy Biełaruskaj atamnaj elektrastancyi.

«Padčas ažyćciaŭleńnia nahladnych mierapryjemstvaŭ na placoŭcy budaŭnictva Biełaruskaj AES u režymie pastajannaha nahladu i pry praviadzieńni kompleksnaj pravierki Dziaržatamnahlad nie znajšoŭ paćviardžeńniaŭ infarmacyi, ahučanaj pres-sakratarom Departamienta dziaržbiaśpieki Litvy Vitaŭtam Makaŭskasam i Ministram navakolnaha asiarodździa Litvy Kiastucisam Tračekasam ab mahčymym čarhovym incydencie pry budaŭnictvie Biełaruskaj AES», — havorycca ŭ paviedamleńni departamienta.

Niepasredna ad RUP «Biełaruskaja AES» infarmacyja ab incydentach padčas budaŭnictva, jakija ŭpłyvajuć na biaśpieku, taksama nie pastupała, zaznačyli ŭ departamiencie. «Takim čynam, źviestki litoŭskaha boku ab mahčymym čarhovym incydencie pry budaŭnictvie Biełaruskaj AES nie paćvierdzilisia», — skazana ŭ paviedamleńni.

Jak paviedamlałasia raniej, 7 červienia na litoŭskim partale navin delfi.lt była apublikavanaja natatka ab tym, što Departamient dziaržbiaśpieki Litvy praviaraje infarmacyju pra incydent, jaki nibyta adbyŭsia na minułym tydni na placoŭcy budaŭnictva Biełaruskaj AES. Padrabiaznaści hetaha incydentu vydańnie nie pryvodziła.

8 červienia na hetym ža resursie źjaviŭsia kamientar ministra enierhietyki Litvy Rokasa Masiulisa: «Pakul u nas niama detalaŭ ab jašče adnym mahčymym incydencie na AES u Astraŭcy. Adnak infarmacyja, jakaja źjaviłasia, vyklikaje vialikuju zaniepakojenaść u suviazi ź biaśpiekaj budučaj elektrastancyi». Pres-słužba biełaruskaha Minenierha ŭ adkaz na hetyja zajavy litoŭskaha boku paviedamiła, što «zbudavańnie Biełaruskaj AES viadziecca ŭ štatnym režymie» i «nijakich incydentaŭ pry vytvorčaści budaŭniča-mantažnych rabot u nazvany ŭ infarmacyi pieryjad nie było». 8 červienia dyrekcyja BiełAES taksama abvierhła infarmacyi pra incydent.

U hety ž dzień Litva ŭručyła Biełarusi notu z nahody mahčymaha incydentu.

Heta ŭžo druhaja padobnaja situacyja — 5 maja była pieradadziena nota ŭ suviazi z mahčymym incydentam na budaŭničaj placoŭcy ŭ krasaviku, pra jaki paviedamlaŭ sajt telekanała «Biełsat». Paśla hetaha pasoł Litvy ŭ Biełarusi Evałdas Ihntavičus byŭ zaprošany ŭ MZS Biełarusi i biełaruskaje Minenierha. U Ministerstvie enierhietyki dypłamatu prapanavali naviedać placoŭku budaŭnictva stancyi, adnak jon ad hetaha kroku admoviŭsia, spasłaŭšysia na toje, što biaśpieku abjekta pavinny aceńvać prafiesijanały.

• 0
• 0
• 0
• 0
• 0
• 0
• 0
• 0