Aleh Hajdukievič: Ni adna partyja ŭ hetaj krainie nie vystavić stolki kandydataŭ, kolki vystaviła ŁDP
Libieralna-demakratyčnaja partyja na parłamienckich vybarach vyłučaje kandydataŭ na kožnym z 110 arhanizavanych u krainie vybarčych akruh.
Pra heta zajaviŭ pieršy namieśnik staršyni partyi Aleh Hajdukievič 9 lipienia na pres-kanfierencyi, pryśviečanaj prezientacyi patencyjnych kandydataŭ ad partyi ŭ stalicy i Minskaj vobłaści.
«Ni adna partyja ŭ hetaj krainie nie vystavić stolki kandydataŭ, kolki vystavili my», — zajaviŭ Hajdukievič.
Pavodle jaho słoŭ, 17 patencyjnych vyłučencaŭ u parłamient taksama zarehistravali inicyjatyŭnyja hrupy i paralelna vyłučajucca šlacham zboru podpisaŭ, u tym liku sam Aleh Hajdkievič.
Ad ŁDP majuć namier, u pryvatnaści, vyłučacca staršynia partyi Siarhiej Hajdukievič (u Minskaj vobłaści), artyst humaryst Jaŭhien Kryžanoŭski (u Viciebskaj vobłaści), viadomy artyst i mieniedžar cyrka Sierž Bandarčuk (u Minsku).
Na dumku Hajdukieviča, ułada sama zacikaŭlenaja ciapier, kab vybary prajšli demakratyčna i sumlenna, pieradaje BiełaPAN.
Na dumku Hajdukieviča, «niama krainy śvietu, dzie niama administracyjnaha resursu, bo partyja ŭłady ŭsiudy jość». «Ale ja baču vialikija źmianieńni, pačynajučy jašče z prezidenckaj kampanii, pa vybarčym zakanadaŭstvie i jaho prymianieńni — svabody stała značna bolš. Nidzie nie zaminajuć źbirać podpisy, naohuł nidzie, takoha raniej nie było. Nijakich pieraškod. Akramia niezaležnych ŚMI, jakija zaŭsiody aśviatlali, my bačym, jak pamianiałasia staŭleńnie dziaržaŭnych ŚMI, idzie aśviatleńnie davoli roŭnaje», — adznačyŭ Hajdukievič.
«Što da parłamienckaj kampanii, ja vieru i spadziajusia — ułada pavinna być zacikaŭlenaja ŭ tym, kab hetyja vybary prajšli maksimalna demakratyčna. Čamu? Hladzić usia Jeŭropa, hladziać ZŠA, my pavinny ŭsio ž taki naładžvać ź imi ŭzajemaadnosiny. Ja zhodny, što heta naša nacyjanalnaja sprava, što samaje hałoŭnaje, kab hetyja vybary byli ŭnutry lehitymnyja. Ale ŭłada sama zacikaŭlenaja zaraz, kab vybary prajšli demakratyčna, u adpaviednaści z zakanadaŭstvam», — dadaŭ jon.
«Što da zakanadaŭstva, mianiać jaho nie treba, treba, kab jano vykonvałasia. U nas adna ŭmova na hetych vybarach: vykonvajcie zakon ad nizu da vierchu», — skazaŭ Hajdkievič.
«Ja pierakanany, što, jaki b ni byŭ resurs, Łukašenka vyjhravaŭ usie prezidenckija vybary, heta praŭda. I ŭ 2001-m Hančaryk nie moh stać prezidentam, i ŭ 2006-m Milinkievič nie moh stać prezidentam, i ŭ 2010-m piatnaccać voś hetych «kłoŭnaŭ», tym bolš nichto ź ich nie moh stać prezidentam, u 2015 i-m my pryznajem, što prezident vybary vyjhraŭ», — zajaviŭ jon.
Kamientary