Paśla źmieny ŭrada ŭ Čechii pałova krain pakinuła inicyjatyvu pa zakupcy bojeprypasaŭ dla Ukrainy
Kolkaść krain, jakija finansujuć češskuju inicyjatyvu pa zakupcy bojeprypasaŭ dla Ukrainy, značna skaraciłasia — roŭna ŭdvaja. Pra heta paviedamiŭ prezident Čechii Pietr Pavieł u intervju Financial Times.
Pavodle słoŭ češskaha prezidenta, ciapier u prajekcie ŭdzielničajuć tolki 9 dziaržaŭ, u toj čas jak raniej ich było 18.
Heta vyklikaje zaniepakojenaść adnosna budučyni inicyjatyvy, bo jana adyhryvała važnuju rolu: zabiaśpiečvała da pałovy ŭsich artyleryjskich bojeprypasaŭ dla Ukrainy. Pavieł padkreśliŭ, što takuju padtrymku składana chutka zamianić inšymi krynicami.
Skaračeńnie ŭdzielnikaŭ inicyjatyvy źviazvajuć u tym liku z palityčnymi źmienami ŭ Čechii paśla viartańnia na pasadu premjer-ministra Andreja Babiša. Toj zajaviŭ, što jahony ŭrad robić pryjarytetam unutranyja patreby krainy, asabliva na fonie ekanamičnych ciažkaściaŭ i rostu vydatkaŭ na enierhanośbity.
Pavodle niekatorych krynic, častka krain nie choča finansavać inicyjatyvu, kali jana nie maje vyraznaj i stabilnaj padtrymki z boku kiraŭnictva krainy-arhanizatara.
Tym nie mienš, prajekt nadalej praciahvaje dziejničać, i jaho budučyniu płanujuć abmiarkoŭvać na chutkim samicie NATA ŭ Ankary. Pietr Pavieł adznačyŭ, što pytańnie raźmierkavańnia finansavaj nahruzki pamiž sajuźnikami stanovicca ŭsio bolš aktualnym.
Pry hetym, niahledziačy na palityčnyja sprečki, raniejšyja apytańni pakazvali, što bolšaść žycharoŭ Čechii padtrymlivaje praciah hetaj inicyjatyvy.
Ciapier čytajuć
«My dajom Štatam toje, što jany chočuć». Rasijski kanał apublikavaŭ videa, jakoje nazyvajuć zapisam Ryžankova schavanaj kamieraj u mašynie4
Kamientary
Prahrama pracuje, jakaja jašče "vyraznaja i stabilnaja padtrymka" im patrebnaja? Vyhladaje prosta jak admazka, kab hrošaj nie davać