Alaksandr Łukašenka svaim ukazam №286 ad 25 lipienia znoŭ padoŭžyŭ terminy budaŭnictva žylla dla vajskoŭcaŭ i abjektaŭ dla Ministerstva abarony, jakoje ažyćciaŭlajecca ŭ ramkach inviestycyjnaha prajekta kampanii «Trajpł».
Terminy zaviaršeńnia budaŭnictva nieabchodnych vajennamu viedamstvu abjektaŭ nieruchomaści pieraniesieny z 2016 na 2019 h., uvod u ekspłuatacyju žyłych damoŭ, uklučajučy damy padvyšanaj kamfortnaści i typavych spažyvieckich jakaściaŭ, a taksama abjektaŭ inžyniernaj, transpartnaj i sacyjalnaj infrastruktury da ich — z 2025 na 2030-y, słužbovaha žylla dla vajskoŭcaŭ (100 tys. kv. m) — z 2019 na 2022 hod.
Pieršapačatkova ukazam №337 ad 2008 hoda kampanija «Trajpł» pavinna była ŭ 2009—2015 hadach pabudavać dla biełaruskich vajskoŭcaŭ 210 tys. m2 žylla, ale paźniej abjom byŭ skarekciravany, bo skaraciłasia kolkaść vajskovych čaściej, pieradysłakacyju jakich pavinna zabiaśpiečyć kampanija Juryja Čyža i Uładzimira Japryncava. Heta voinskija čaści ŭ Minsku i ŭ Minskim rajonie, pieradysłakacyju jakich kampanija pavinna ažyćciavić za košt ułasnych srodkaŭ, a zatym biazvypłatna pieradać dziaržavie zbudavanaje žyllo. U jakaści kampiensacyi za heta «Trajpł» atrymaŭ prava zabudavać vyzvalenyja vajskoŭcami ziamielnyja ŭčastki.
Pavodle dadzienych za minuły hod, «Trajpł» dla vajskoŭcaŭ pabudavaŭ dva 83-kvaternyja słužbovych žyłyja damy ŭ Hrodnie (u 2010 i 2011 hadach), 108-kvaternyja damy ŭ Lidzie (u 2012 hodzie) i Baranavičach (2013 hod), try 40-kvaternyja damy ŭ Marjinaj Horcy (u 2012 i 2015 hadach), a taksama 72-kvaterny dom u Žodzinie (u 2015 hodzie).
U pierśpiektyvie kampanija płanuje pabudavać jašče adzinaccać damoŭ na adnu tysiaču kvater. Słužbovaje žyllo mohuć atrymać vajskoŭcy, jakija prachodziać słužbu ŭ Vałožynie, Słonimie, Asipovičach, Kałodziščach, Breście, Barysavie, Starych Darohach, Navahrudku, Fanipali.
Imavierna, płany pa ŭvodzie žylla adkarektavali nie tolki zatrymańni Juryja Čyža i Uładzimira Japryncava, ale i ahulnaja niespryjalnaja situacyja na rynku budaŭnictva i nieruchomaści.
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?15
Kamientary