Lataŭ pad bambiožki ŭ Białhrad, atrymaŭ pryz za vysakarodnuju hulniu: piać faktaŭ pra Uładzimira Samsonava
Majstra małoj rakietki Uładzimir Samsonaŭ zaniaŭ na Alimpijadzie 4-je miesca. U hulni ź japoncam Junam Mizutani jon prajhraŭ ź likam 1-4 i zastaŭsia bieź miedala. Adnak u lubym razie ŭsia Biełaruś pieražyvała za spartsmiena, jaki, niahledziačy na traŭmu, biŭsia da apošniaha.
«NN» sabrała cikavyja fakty ź bijahrafii Uładzimira Samsonava.
30 hadoŭ u sporcie
Na siońnia Uładzimiru Samsonavu 40 hadoŭ. Jon minčuk, a nastolnym tenisam staŭ zajmacca ŭ siem hadoŭ u Centry nastolnaha tenisa ŭ treniera Alaksandra Piatkieviča. Jaho žonka treniravała taksama viadomych siostraŭ Paŭłovič.
Uładzimir Samsonaŭ — redki pa praciahłaści karjery spartyŭny doŭhažychar. Pieršyja jahonyja surjoznyja spabornictvy prajšli… ŭ 1987 hodzie! Heta byŭ junacki čempijanat Jeŭropy ŭ Afinach pa nastolnym tenisie. Samsonaŭ kaža, što byŭ tady našmat mienšy za svaich apanientaŭ. Tym nie mienš uziaŭ bronzu ŭ asabistym turniry.
Adnojčy ŭdaryŭ trenier
Alaksandr Piatkievič u śviežym intervju «Priessbołu» pryznajecca, što adnojčy ŭdaryŭ Uładzimira Samsonava, za što jamu ciapier soramna.
«Za ŭsio žyćcio ja adzin raz Vałodziu ŭdaryŭ. Nie baluča, viadoma. Ale jon pakryŭdziŭsia mocna. I, darečy, da hetaha času nie zabyŭsia. Niejak Vova kaža: «A voś pamiatajecie, vy mianie ŭdaryli? Liču, što heta było niespraviadliva». — «Pamiataju…» Paśla taho vypadku ja padobnaj miery da Vałodzi nie ŭžyvaŭ. Tamu što jaho nielha było čapać. A inšyja chłopcy narmalna ŭsprymali, kali ich łupasili, kab nastroić na hulniu. Nijakich prablem! Ciapier heta ŭspaminaješ i dumaješ: «Boža moj, jakimi ž idyjotami my byli!» Ličyli, što heta piedahahičny pryjom, kab dapamahčy hulcu…»
Ramantyčnaja historyja kachańnia
Žonka Samsonava — sierbka Nataša Nam. Jany paznajomilisia ŭ 1998 hodzie ŭ Białhradzie na tenisnym turniry. Paśla pačałasia vajna ŭ Juhasłavii.
Uładzimir, ryzykujučy ŭłasnym žyćciom, prylacieŭ u Białhrad. Heta było akurat tady, kali horad padviarhaŭsia bambiožkam. U chutkim časie Nataša zmahła źjechać da Uładzimira. Bolš para nie rasstajecca. Samsonaŭ kaža, što z kožnym hodam ich kachańnie stanovicca bolš mocnym.
U pary dvoje synoŭ. U adnym ź intervju spartsmien kazaŭ, što jany dobra razumiejuć biełaruskuju movu. Siamja žyvie ŭ Ispanii, u Hranadzie. U Minsk pryjazdžaje niačasta, kab naviedać baćku.
Byŭ pieršaj rakietkaj śvietu
Samsonaŭ adzin ź niamnohich jeŭrapiejskich majstroŭ małoj rakietki, chto kidaje vyklik azijackaj sistemie nastolnaha tenisa. Kitajcy, japoncy, tajvancy, hankonhcy dziesiacihodździami daminujuć u hetym sporcie. U 1998 hodzie Samsonaŭ zrabiŭ amal niemahčymaje: jon staŭ pieršaj rakietkaj śvietu. Chaj pratrymaŭsia niadoŭha, ale ŭ historyju ŭvajšoŭ nazaŭsiody.
Potym jon na praciahu 15 hadoŭ nie pakidaŭ top-10 najlepšych tenisistaŭ śvietu. Ciapier jon znoŭ siarod najmacniejšych (№9).
Samsonaŭ trochrazovy ŭładalnik Kubka śvietu, šaścirazovy čempijon Jeŭropy. A voś na Alimpijadach, choć i vystupaje ŭžo ŭ šosty raz, da takich viaršyń, jak sioleta, jašče nie ŭźbiraŭsia.
Pryz za vysakarodnaść
Mižnarodny alimpijski kamitet uznaharodziŭ Uładzimira Samsonava pryzam «Fejr płej» za vysakarodnaść u sporcie. U finale adnaho prestyžnaha turnira ŭ Francyi Samsonaŭ sustrakaŭsia z rasiejcam Śmirnovym. Padčas vyrašalnaha rozyhryšu miač čyrknuŭ ab stoł, biełarus užo imknuŭsia pavinšavać supiernika, ale sudździa nie zaŭvažyŭ dotyku i addaŭ bał Samsonavu. Biełarus sprabavaŭ davieści, što nasamreč prajhraŭ, ale sudździa jamu nie daŭ viery.
Paśla hetaha Samsonaŭ demanstratyŭna prajhraŭ dva nastupnyja miačy. Jak kazaŭ trenier Samsonava, takija vypadki dla Uładzimira nie byli redkaściu. Jon nie čaplajecca za sudziejskija pamyłki i nie sprabuje pieramahčy luboj canoj. Ułasnaje dobraje imia dla Samsonava — nie pusty huk. Tamu biełarus i karystajecca ŭ śviecie sportu ŭsichniaj pavahaj.
Ciapier čytajuć
Biełarusy sustrakajuć vyzvalenych palitviaźniaŭ u Vilni FOTY i VIDEA4
Kamientary