Dačka hienierała na adkryćci vystavy pra biełarusaŭ u armii Andersa: Heta zbližaje polski i biełaruski narody
U minskim muziei vajny adčyniłasia i ciaham miesiaca budzie pracavać vystava pra biełarusaŭ u Armii Andersa. Na vystavie pradstaŭleny historyi zvyčajnych ludziej, jakija ŭdzielničali ŭ bajach pa vyzvaleńni Italii ad nacystaŭ i hinuli pad Monte-Kasina.
Siarod histaryčnych kaštoŭnaściaŭ na vystavie možna pabačyć uniformy, ryštunak, aryhinalnyja zdymki i dakumienty.
Vystava stała mahčymaj dziakujučy sumiesnaj pracy muzieja vajny, ambasady Respubliki Polščy ŭ Minsku i biełaruskaha historyka i kalekcyjaniera Ihara Mielnikava.
Adkryćcio vystavy naviedała šmat pasłoŭ jeŭrapiejskich krain, namieśnica ministra zamiežnych spraŭ Biełarusi Alena Kupčyna i namieśnik ministra kultury Biełarusi Vasil Černik. Ale hałoŭnym hościem była dačka hienierała Andersa Hanna Maryja — sienatarka, upaŭnavažanaja ŭ pytańniach mižnarodnaha dyjałohu kancylaryi staršyni Rady ministraŭ Polščy. U svajoj pramovie jana padziakavała biełaruskamu boku za zaprašeńnie:
«My sustrakajemsia tut, u 77-uju hadavinu pačatku Druhoj suśvietnaj vajny, kab ušanavać pamiać tych, chto, niezaležna ad palityčnych pohladaŭ, nacyjanalnaści dy vieravyznańnia zmahaŭsia za svabodu i pieramohu nad fašysckimi zachopnikami. Pierad ustupleńniem u Druhi polski korpus u 1939—1941 hadach jany zaznali represii stalinskaha tatalitaryzmu. Niahledziačy na heta, a moža, jakraz tamu jany nie vahajučysia adstojvali svabodu i prava čałavieka na mirnaje žyćcio», — skazała Hanna Maryja Anders.
«Imiony kala 200 uradžencaŭ Biełarusi vysiečanyja na kamiennych plitach pad Monte-Kasina, što biassprečna źjaŭlajecca dokazam ich achviarnaści i mužnaści. Jak polski palityk i pradstaŭnica polskich uładaŭ, liču svaim abaviazkam ušanavać pamiać tych, chto pralivaŭ kroŭ u šerahach polskaha vojska, niezaležna ad pachodžańnia, nacyjanalnaści i vieravyznańnia. Jak dačka hienierała Uładzisłava Andersa, ja chaču pierš za ŭsio padziakavać sałdatam, jakija byli ź im padčas Druhoj suśvietnaj vajny, tym bolš, što siońnia z nami ich blizkija i naščadki», — skazała jana.
«Dziakuj biełarusam za pamiać, adkrytaść, dobryja słovy i ščyraść. Ja ŭpeŭniena, što takija ŭračystaści jak heta, zbližajuć palakaŭ i biełarusaŭ i paŭpłyvajuć na toje, što adnosiny pamiž našymi krainami, jakija zaraz narmalizujucca, buduć jašče lepšymi», — vykazała spadziavańnie Hanna Maryja Anders.
Namieśnik ministra kultury Biełarusi Vasil Černik u svajoj pramovie taksama padkreśliŭ pra daŭniaje braterstva dvuch narodaŭ:
«Ciažkaja dola vypała na polski i biełaruski narody padčas Druhoj suśvietnaj vajny: strata miljonaŭ čałaviečych žyćciaŭ na frantach i ŭ akupacyi, razbureńnie i spaleńnie haradoŭ dy viosak. Niahledziačy na heta, narody Polščy i Biełarusi ŭźnialisia na ŭzbrojenuju baraćbu i zmahli viarnuć sabie volu i niezaležnaść. Siońnia nas jadnaje pamiać ab vajnie i podźvihach našych narodaŭ», — skazaŭ Černik.
Vystavu možna naviedać z 2 vieraśnia pa 2 kastryčnika. Cana kvitkoŭ: dla darosłych — 7.00 BYN / 70 000 BYR, dla školnikaŭ, navučencaŭ PTV i SSNU, VNU — 3.50 BYN / 35 000 BYR.
Kamientary