Debaty: Kandydaty abiacajuć addać nastaŭnikam zarobki milicyi, a dla rasijskich telekanałaŭ uvieści padatki
Dla rasijskich telekanałaŭ, što tranślujucca ŭ Biełarusi, nieabchodna ŭvieści dadatkovy padatak, kab takim čynam stymulavać raźvićcio ajčynnaha telebačańnia, a taksama svajoj kultury i rodnaj movy.
Takoje mierkavańnie vykazali kandydaty ŭ deputaty Pałaty pradstaŭnikoŭ padčas pieršych teledebataŭ, arhanizavanych telekanałam «Biełsat», sajtam Naviny.by i Jeŭraradyjo.
Na dumku patencyjnych deputataŭ, zarobki ŭ nastaŭnikaŭ pavinny być nie mienšyja, čym u milicyjantaŭ i vajskoŭcaŭ, a nacyjanalnaja kultura musić stać pryjarytetnam u palitycy dziaržavy.
Miž tym, heta adzinaje, u čym syšlisia pretendenty na kresła ŭ Avalnaj zale. I choć praŭładnyja kandydaty dyskutavać z apanientami, na žal, admovilisia, tym nie mienš apazicyjanieram było, pra što paspračacca. Vyjaviłasia, što navat unutry demakratyčnaha łahiera niama ahulnaha pohladu na raźvićcio krainy, suisnavańnie biełaruskaj i ruskaj moŭ, kulturu i adukacyju.
Tym bolš, što i kandydaty ŭ pieršych debatach sabralisia absalutna roznych pakaleńniaŭ: ad maci eks-lidara «Maładoha fronta» i byłoha palitviaźnia Paŭła Sieviarynca Taćciany Sieviaryniec, viadomaj televiadučaj i amal kandydata ŭ prezidenty Aleny Anisim i Volhi Damaskinaj z «Ruchu za Svabodu» da maładoha Juryja Stukałava i zusim jašče junaha Jahora Levačova z «Havary praŭdu», jaki zamiest aśpirantury abraŭ palityku.
Jak trapna zaŭvažyła Volha Damaskina: «Choć ni ŭ kaho niama mahčymaści stać deputatam, zatoje važna, u jakoj krainie my pračniomsia 12 vieraśnia».Što b mahło adbycca z krainaj paśla 12 vieraśnia, kali b hałasy ličyli sumlenna, prahnazujem razam z udzielnikami debataŭ i haściami studyi.
Heta byŭ užo druhi vypusk debataŭ. Padčas debiutnaj pieradvybarnaj dyskusii ekśpierty i pradstaŭniki palityčnych siłaŭ krainy abmiarkoŭvali, ci isnuje ŭ Biełarusi realny parłamient i ci jość sens udzielničać u pradkazalnych vybarach.
Ciapier čytajuć
Jak žurnalistka «Našaj Nivy» šukała paru na pravasłaŭnym sajcie znajomstvaŭ. Padkaciŭ i Tałaj12
Kamientary