Alaksandr Łukašenka prakamientavaŭ situacyju z Andrejem Fomačkinym, jaki razharnuŭ na cyrymonii adkryćcia Paralimpijady-2016 u Rya rasijski ściah. Jon adznačyŭ, što ŭchvalaje hety krok, jaki źjaŭlajecca prajavaj «salidarnaści i pratestu suprać niespraviadlivaści».
«Heta było rašeńnie na samym vysokim uzroŭni. Heta naša pazicyja, dziaržaŭnaja, u tym liku i prezidenta Biełarusi», — adznačyŭ Alaksandr Łukašenka.
Jon raspavioŭ, što niezadoŭha da Paralimpijady byŭ u ludziej z abmiežavanymi mahčymaściami i nie ličyć ich invalidami «ci ludźmi z abmiežavanymi mahčymaściami abo zdolnaściami — jany bolš za nas mohuć».
«Nielha kryŭdzić takich ludziej. Hetyja ludzi i tak pakryŭdžanyja. I raz dazvolili takim ludziam spaborničać, navošta my ich hnabim?» — ličyć Łukašenka.
Kiraŭnik Biełarusi taksama zajaviŭ, što vielmi zasmučany — jak «amal spartsmien» i jak kiraŭnik Nacyjanalnaha alimpijskaha kamiteta. Jon vykazaŭsia za čyściniu sportu, ale ličyć, što kali kahości vinavaciać va ŭžyvańni dopinhu, to nieabchodnyja dokazy.
«Kali my vinavacim niejkuju krainu, pierš za ŭsio našu Rasiju, heta ž našy braty — heta niuans važny, dyk pakładzicie na stoł fakty! Navošta vy ž usich hurtam ŭziali i źmiali?» — zadaŭsia pytańniem Łukašenka.
«My nie viedajem, što adbyvajucca ŭ hetych WADA (antydopinhavym ahienctvie). U kaho tam prybiralščyca išła, chvastom uzmachnuła, i z prabirki ŭsio — niama čaho spytać, voś niadaŭna pra amierykancaŭ pisali. A voś u biełaruskich i rasijskich spartoŭcaŭ nie zmachnuła: pravieryli — praślazilisia. A jak pravieryć iścinu? A nijak, i budźcie zdarovyja. Kažuć — idzicie ŭ sud, a sudździ chto? Voś i ŭsia demakratyja», — emacyjna vykazaŭsia kiraŭnik dziaržavy.
Pavodle słoŭ Łukašenki, voś heta ŭsio i źjaŭlajecca pryčynaj padtrymki našych paralimpijcaŭ, jakija zrabili ŭsio «absalutna zakonna».
«Čamu ŭ našych invalidaŭ adabrali dva ściahi rasijskija pry vychadzie na stadyjon? Invalidaŭ skrucili, ściahi zabrali. Nu dobra, što mužyki praduhledzieli i pad cialniaškaj byŭ zapasny rasijski ściah, jaki naš funkcyjanier i razharnuŭ… Heta salidarnaść. Heta pratest suprać niespraviadlivaści», — adznačyŭ Łukašenka.
Nahadajem, na cyrymonii adkryćcia Paralimpijady-2016 u Rya-de-Žaniejra pradstaŭnik biełaruskaj spartyŭnaj delehacyi Andrej Fomačkin pranios rasijski ściah. Za heta jon byŭ pazbaŭleny akredytacyi. Jak paźniej raskazała pres-sakratarka kiraŭnika Biełarusi Natalla Ejsmant, akcyja była padtrymana Alaksandram Łukašenkam.
Čytajcie taksama: Šef biełaruskaj misii na Paralimpijadzie: «My aburanyja ŭčynkam Fomačkina»
Ciapier čytajuć
«Miesiačny płaciež paciahnie na 340 rubloŭ». Što budzie ŭ Biełarusi z mabilnym internetam?15
Kamientary