U Irlandyi budzie praviedzieny paŭtorny referendum? Karektury palityčnaha kursu ŭ vyniku volevyjaŭleńnia suverena — hety padstavovy pryncyp demakratyi — nie adbyvajecca.
Irlandyja vystupaje suprać Lisabonskaj damovy. Paśla 2001 h. heta ŭžo druhi raz, kali irlandcy dajuć admoŭny adkaz na ratyfikacyju eurapiejskaha dakumentu. Paradaksalna, ale Irlandyja — adna z krainaŭ, jakaja ŭ svaich pośpiechach šmat u čym abaviazanaja eŭrapiejskamu prajektu. Ekanamičny ŭzdym sučasnaje Irlandyi, razam z małymi padatkami j spryjalnymi ŭmovami dla pradprymalnictva, u značnaj stupieni byŭ padmacavany šmatmiljardnymi datacyjami z eŭrabiudžetu. Irlandcy heta pamiatajuć i sprabujuć sardečna adździačyć Eŭropie. Hetak, Irlandyja, razam z Brytanijaj i Švecyjaj, adrazu zabiaśpiečyła ŭschodnim eŭrapiejcam nieabmiežavany dostup da rynku pracy. Nasamreč Irlandyja maje ŭsie padstavy, kab być samaj haračaj prychilnicaj eŭraintehracyi. I ŭsio ž vynik hałasavańnia nie pakinuŭ sumnievu ŭ chałodnym staŭleńńni irlandcaŭ da novaje damovy. U čym ža pryčyna hetkaje abyjakavaści?
Kaniečnie, niešta možna rastłumačyć specyfikaj unutrypalityčnaje sytuacyi ci naiŭnaściu niedaśviedčanaha ŭradu, albo prosta śpisać usio na nizkuju aktyŭnaść vybarnikaŭ. Ale ž ci nie zanadta prostym budzie takoje tłumačeńnie? Paśla Francyi j Halandyi irlandzki vynik u čarhovy raz jaskrava demanstruje, što dalejšaja eŭraintehracyja nia maje salidnaje padtrymki siarod eŭrapiejcaŭ. Bruselskija instytucyi nie razhladajucca žycharami Eŭropy jak važnyja j karysnyja, adsiul i skieptyčny adkaz na prapanovy ichnaha ŭzmacnieńnia: dziakuj, ale my chočam spynicca, peraasensavać sytuacyju j paśla pabačyć, što rabić dalej z našaj Europaj.
Žadańnie vybarcaŭ zamarudzić eŭraintehracyju vidavočnaje i lehitymnaje. I ŭsio ž u čarhovy raz mahutnyja palityčnyja bosy ŭsich uzroŭniaŭ i krainaŭ buduć śćviardžać, što abrany kurs na pahłybleńnie eŭraintehracyi słušny j źmienieny nia budzie.
Paśla francuskaha referendumu ja na staronkach “NN” pradkazvaŭ kaniec planaŭ stvareńnia eŭrapiejskaje zvyšdziaržavy. Ale ž ja pamylaŭsia, niedaaceńvajučy ŭpartaść Bruselu. Vidavočna, što palityčnyja eŭraelity robiać usio mahčymaje j niemahčymaje, kab prasoŭvać eŭraintehracyju dalej. Kali treba, u Irlandyi budzie praviedzieny paŭtorny referendum. Kali treba, u Lisabonskaj damovie (byłoj Kanstytucyi) buduć zroblenyja niaznačnyja źmieny, i praces ratyfikacyi budzie raspačaty nanoŭ. Karektury palityčnaha kursu ŭ vyniku volevyjaŭleńnia suverena — hety padstavovy pryncyp demakratyi — nie adbyvajecca.
Takim čynam, palityčnyja elity nadalej ihnarujuć mierkavańnie eŭrapiejcaŭ. Niahledziačy na papularnaść eŭraskieptyčych pohladaŭ, šmat u jakich eŭrapiejskich krainach partyi paźbiahajuć dyskusijaŭ na temy eŭraintehracyi i hetak pazbaŭlajuć vybarcaŭ infarmacyi i elementarnaha palityčnaha vybaru. U vyniku papularnaść nabyvajuć papulisty źleva j sprava, jakija nie curajucca krytyki Bruselu, a tradycyjnyja partyi hublajuć upłyŭ. Vyhladaje, što praces addaleńnia palityčnych elitaŭ ad intaresaŭ prostych eŭrapiejcaŭ praciahvajecca. Eŭrapiejski prajekt, jaki pačynaŭsia jak supolny rynak tavaraŭ i pasłuh, sparadziŭ palityčnaha monstra ź vielizarnymi paŭnamoctvami i nieŭtajmoŭnym apetytam, ale niepadspravazdačnaha samim eŭrapiejcam. Dyk chto pieramoža hetaha monstra?
Kamientary