Były naparnik Mataroły: Za siabra budu raŭniać ź ziamloj harady Ukrainy da Kijeva
Zabić miljon ukraincaŭ za kožnaha bajevika «Navarosii» i zraŭniać ź ziamloj harady Ukrainy pahražaje na videa Hivi, były naparnik zabitaha na dniach bajevika Mataroły.
«Hivi» (sapraŭdnaje imia Michaił Tałstych), jak i Mataroła, padniaŭsia da ranhu pałkoŭnika «apałčeńnia DNR» z samaha nizu ijerarchii i časta źjaŭlaŭsia z naparnikam na videarolikach, u suviazi z čym taksama staŭ miedyjnym piersanažam.
Na videa, jakoje patrapiła ŭ interniet učora, jaŭna ŭzrušany «pałkoŭnik» abiacaje žorstkuju pomstu ŭsiamu nasielnictvu Ukrainy.
«Toje, što adbyłosia, suśvietnaje złačynstva. Za heta vielmi mocna pryjdziecca papłacicca. Chto b heta ni zrabiŭ, za heta budzie raspłačvacca ŭsia Ukraina», — kaža bajavik.
Isnuje niekalki viersij zabojstva Mataroły (Arsiena Paŭłava) - śpiecapieracyja ŭkrainskich śpiecsłužbaŭ ci miascovaha ŭkrainskaha padpolla, mižusobnaja baraćba pamiž hrupoŭkami ŭ akupavanych bajevikami rajonach Ukrainy, śpiecapieracyja rasijskich śpiecsłužbaŭ pa źniščeńni zanadta paznavalnaha kamandzira.
«Kožny horad paśla DNR, jaki my vyzvalim, ja budu raŭniać ź ziamloj za hetaha siabra», — zajaviŭ Hivi.
«Adkazvać budzie ŭvieś ukrainski narod. Heta ŭdar pa ŭsioj DNR, pa ŭsich uzbrojenych siłach… Jak kazaŭ adzin čałaviek, za kožnaha zabitaha treba zabić miljon vorahaŭ. My heta zrobim», - zapeŭniŭ jon.
Kamientary