Ekśpiert: U najbližejšyja hady Minsk naŭrad ci stanie suśvietnaj šopinh-stalicaj

Bujnyja handlova-zabaŭlalnyja centry, jakija pavinny być adkryty ŭ stalicy ŭ najbližejšyja miesiacy, stymulujuć prychod u Biełaruś suśvietnych brendaŭ, adnak u najbližejšyja niekalki hadoŭ Minsk naŭrad ci stanie suśvietnaj šopinh-stalicaj. Takoje mierkavańnie vykazaŭ dyrektar departamienta kansałtynhu i daśledavańniaŭ kampanii Colliers International u Biełarusi Dzianis Čaćvierykoŭ.

«Jašče adzin-dva hady tamu čakałasia, što da kanca 2016 hoda ŭ Minsku pavinny pabudavać 17 handlovych i handlova-zabaŭlalnych centraŭ sukupnaj arendnaj płoščaj 415 tys. kv. m. Adnak u pačatku hoda stała zrazumieła, što ŭ 2016 hodzie možna čakać tolki kala 250 tys. kv. m, — adznačyŭ ekśpiert. — Ale i heta akazałasia niepadjomnaj płankaj. Pakul jakasnaha raźvićcia rynak nie atrymaŭ, kali nie ličyć, viadoma, adčuvalnaha źnižeńnia stavak arendy i vysokaha ŭzroŭniu vakantnaści starych i niaŭdała raźmieščanych handlovych centraŭ».

Pavodle słoŭ Čaćvierykova, kali ŭ pačatku hoda havorka išła ab 150—170 tys. kv. m niezapoŭnienych płoščaŭ, to zaraz možna dadać jašče kala 100 tys. «Na rynku ŭzraśli ryzyki realizacyi prajektaŭ, što ŭpłyvaje na mahčymaści adkryćcia abjektaŭ u zajaŭlenyja terminy. Za pieršaje paŭhodździe byli ŭviedzieny tolki try adnosna bujnyja abjekty sumarnaj arendnaj płoščaj 40,7 tys. kv. m, siarod jakich možna vyłučyć «Hłobus Park» za miežami haradskoj rysy i «Civali-Mebla» na vulicy Prytyckaha», — skazaŭ ekśpiert.

Pry hetym znakavyja dla Minska handlovyja centry Galleria Minsk, Dana Mall i Green City pakul nie prymajuć naviedvalnikaŭ. «Uličvajučy biahučuju stupień hatoŭnaści abjektaŭ i stan uzajemaadnosin z arandatarami, vysokaja vierahodnaść, što da kanca hoda poŭnaściu adkryjecca TRC Galleria Minsk. Mahčyma, całkam abo častkova zapuścicca Dana Mall. A voś žychary Kamiennaj Horki, chutčej za ŭsio, tak i nie trapiać u handlovy centr Green City da novaha hoda», — ličyć Čaćvierykoŭ. Pakul nie jasna, ci budzie ŭviedzieny ŭ stroj handlovy centr «Je-Sici» ŭ Kamiennaj Horcy, a «Vitalur» u Brylevičach i zusim admoviŭsia ad realizacyi prajekta dvuchpaviarchovaha handlovaha centra na vulicy Karalinskaj, choć jaho płanavali ŭvieści da kanca hoda.

Deviełapiery novych abjektaŭ užo sutyknulisia z deficytam arandataraŭ. «Brendavych apierataraŭ na ŭsich nie chapaje. Tamu treba pryciahvać novych dla horada i krainy apierataraŭ. U hetym i zaklučajecca zadača i adzin z hałoŭnych elemientaŭ sacyjalnaj karysnaści novych bujnych mołaŭ. Vialikim patencyjałam pa pryciahnieńni suśvietnych brendaŭ šmat u čym vałodaje TRC Galleria Minsk dziakujučy svajmu miescaznachodžańniu, jakaści budaŭnictva i napaŭnieńniu. U pryvatnaści, fłahmanskija kramy tut adkryjuć Reserved i Koton, pra što niadaŭna abodva zajavili aficyjna. Mižnarodnyja sietki paciahnuć za saboj i nacyjanalnych rytejleraŭ. Takoje susiedstva idzie na karyść roźničnym prodažam», — ličyć Čaćvierykoŭ.

Źjaŭleńnie bujnych abjektaŭ taksama moža stymulavać pierajezd apierataraŭ, adnak, na dumku ekśpierta, heta nie vyjdzie za ramki zvyčajnaj ratacyi. «Ciapier nie adbyvajecca ŭsieahulnaha kidańnia arandataraŭ z abjekta na abjekt. Tak, rytejlery zakryvajuć kramy ŭ niepapularnych i sastarełych abjektach i pierajazdžajuć u bolš jakasnyja handlovyja centry. Ale ratacyja arandataraŭ adbyvajecca zaŭsiody — heta narmalny praces navat dla stabilnaha pieryjadu ŭ ekanomicy. Heta moža być karysna jak samim roźničnym sietkam, tak i handlovym centram», — skazaŭ dyrektar departamienta.

Pavodle jaho słoŭ, apieratary zabaŭlalnych centraŭ adčuli pavyšany popyt deviełapieraŭ i ŭłaśnikaŭ abjektaŭ. U Minsku adkryvajucca novyja bujnyja dziciačyja centry, muziei navuki, centry virtualnaj realnaści. Deviełapiery, jakija imknucca pryciahnuć naviedvalnikaŭ na abjekt, usio čaściej źviartajuć uvahu na novyja farmaty i padychody.

Mižnarodnyja apieratary volnaha času i zabaŭ surjozna razhladajuć mahčymaść adkryćcia ŭ stalicy bujnych (na niekalki tysiač kvadratnych mietraŭ) dziciačych centraŭ, novych kinateatraŭ, u tym liku farmatu IMAX. «Takaja aktyŭnaść, jakaja nazirajecca ŭśled za bumam novych mižnarodnych sietak fastfudu, dazvalaje spadziavacca, što Minsk usio-tki ruchajecca ŭ bok raźvićcia spažyvańnia i stanie ŭ chutkim časie jeŭrapiejskaj stalicaj, u jakoj kožny moža pasprabavać na sabie apošnija pavievy ŭ śfiery volnaha času i zabaŭ», — zajaviŭ pradstaŭnik kampanii Colliers International.

• 0
• 0
• 0
• 0
• 0
• 0
• 0
• 0