Hrupa architektaraŭ z Armienii, Aŭstryi, Biełarusi, Hruzii, Hiermanii, Vienhryi, Małdovy, Ukrainy i Rasii vystupiła ŭ abaronu minskaha kvartała Asmałoŭka.
Jak paviedamiŭ kaardynatar hramadskaj kampanii «Hienpłan — dla minčan!» Dzianis Kobrusieŭ, mižnarodnaja hrupa niezaležnych historykaŭ mastactva, architektaraŭ i architekturnych krytykaŭ, u fokusie daśledavańniaŭ jakich znachodzicca architektura savieckaha madernizmu, nakiravała list u Ministerstva kultury Biełarusi z padtrymkaj idei zachavańnia minskaha kvartała Asmałoŭka i nadańnia jamu statusu historyka-kulturnaj kaštoŭnaści.
U ramkach prajekta «Pierasoŭnaja akademija», arhanizavanaha partałam transit.at, Instytutam Hiote i Ministerstvam zamiežnych spraŭ Hiermanii, hrupa daśledčykaŭ u vieraśni 2016 hoda naviedała biełaruskuju stalicu, u tym liku Asmałoŭku. Daśledčykaŭ, jak adznačajecca ŭ zvarocie, «ździviła unikalnaja atmaśfiera hetaj histaryčnaj, sacyjalnaj i kulturnaj miaściny». Aŭtary lista taksama adznačajuć, što «ŭ inšych haradach byłoha Savieckaha Sajuza takich kvartałaŭ ŭžo nie zastałosia, na ich miescy razharnułasia budaŭnictva šmatpaviarchovych budynkaŭ».
List u padtrymku zachavańnia Asmałoŭki padpisali: Ruben Areŭšacian (Armienija), Alaksandr Burłaka (Ukraina), Michael Hiebalcbierhier (Aŭstryja), Mikałaj Jerafiejeŭ (Rasija), Dora Chiehij (Vienhryja), Haha Kiknadzie (Hruzija), Volfhanh Kil (Hiermanija), Jonas Kioninh (Hiermanija), Štefan Rusu (Małdova), Chiedvih Saksienhubier (Aŭstryja), Hieorh Šalhamier (Aŭstryja), Volha Šparaha (Biełaruś), Kaj Fiokler (Hiermanija), Dźmitryj Zadoryn (Biełaruś/Niderłandy).
«Asmałoŭku možna adnieści da važnych dla našaha siońniašniaha žyćcia miaścin, tamu što jana stvarałasia nie dla uvasableńnia ŭłady, a dla zručnaha žyćcia haradžan, dla ich sumiesnaha žyćcia i sumiesnaha adpačynku. Takoj jana zastajecca i siońnia, čaho nie mahli nie zaŭvažyć ŭdzielniki «Pierasoŭnaj akademii» i što stała matyvam dla napisańnia lista ŭ padtrymku zachavańnia hetaha kvartała», — adznačyła Volha Šparaha.
«List mižnarodnaj hrupy architektaraŭ i mastactvaznaŭcaŭ ŭ padtrymku Asmałoŭki vielmi kaštoŭny, bo jon padmacoŭvaje mierkavańnie i miascovych žycharoŭ, i hramadskich aktyvistaŭ pra ŭnikalnaść hetaha kvartała i važnaść jaho zachavańnia. U toj čas jak haradskija ŭłady pierakonvajuć nas u advarotnym: što nazvany kvartał nie maje histaryčnaj i kulturnaj kaštoŭnaści, što jaho treba źnieści, uščylnić, rekanstrujavać, całkam źmianiŭšy i h.d. My spadziajomsia, što list dapamoža — ci paŭpłyvaje — na Ministerstva kultury, kali jano budzie razhladać pytańnie ab nadańni Asmałoŭcy statusu historyka-kulturnaj kaštoŭnaści», — skazaŭ Kobrusieŭ.
Pasiadžeńnie mižviedamasnaha savieta pry Ministerstvie kultury, na jakim płanujecca razhledzieć pytańnie nadańnia kvartału Asmałoŭka statusu historyka-kulturnaj spadčyny, moža prajści ŭ listapadzie.
Jak paśla kanca śvietu. Ahrasiadzibu ŭ Salihorskim rajonie zaniesła ziamloj3
Kamientary