Labiedźka: Nam nie patrebny kvoty ad Łukašenki

Demakratyčnyja partyi pakidajuć za saboj prava źniaćcia svaich kandydataŭ, u vypadku admovy ŭładaŭ uklučyć pradstaŭnikoŭ apazycyi ŭ skład učastkovych vybarčych kamisij. Tym časam Eŭropa razhortvaje svaju hałoŭnuju hulniu hetaha palityčnaha sezonu. Jana chacieła b pryznać Łukašenku pa varyjancie Alijeva, i stavić tolki dźvie ŭmovy: kab u pałatu prajšli niekalki apazycyjanieraŭ z ADS i kab Kazulin vyjšaŭ na svabodu. Adzin z polskich dypłamataŭ skazaŭ aŭtaru hetych radkoŭ, što bolšaść krainaŭ syšlisia ŭ nieabchodnaści «padać Biełarusi jasny syhnał»...

«Ja siońnia viarnuŭsia sa Strasburha, dzie vystupaŭ z dakładam na siesii PASIE, i my damovilisia, što i adziny śpis patencyjnych kandydataŭ u deputaty, i śpis tych, kaho my prapanoŭvajem uklučyć u vybarčyja kamisii buduć pieradadzienyja i ŭ Palityčny kamitet, i ŭ padkamitet pa Biełarusi dla taho, kab jany vykonvali funkcyju łakmusavaj papiery. Nas uvieś čas pytali, jakija krytery adznaki vybaraŭ? Vielmi prosta. Voś 110 proźviščaŭ patencyjnych kandydataŭ – kolki ich zarehistravana? Voś śpis tych, kaho my prapanoŭvajem uklučyć u vybarkamy – kolki ich uklučana? I tady vielmi prosta rabić manitorynh taho, što adbyvajecca. My pryniali rašeńnie ab abmiežavanym udziele ŭ vybarčaj kampanii. Kali našych ludziej nie budzie ŭ składzie akruhovych i ŭčastkovych vybarčych kamisij, to my pakiniem za saboj prava źniać kandydataŭ z adzinaha śpisu», -- paviedamiŭ staršynia Abjadnanaj hramadzianskaj partyi Anatol Labiedźka.

Palityk nazvaŭ vybarčuju kampaniju biez uklučeńnia apazicyi ŭ skład vybarkamaŭ «łachatronam».

«Na minułych prezidenckich vybarach 120 tysiač čałaviek uvachodziła ŭ skład akruhovych i ŭčastkovych vybarčych kamisij, ź ich tolki 1 čałaviek pradstaŭlaŭ apazicyjnuju partyju. Heta značyć, što 119 tysiač 999 čałaviek pradstaŭlali intaresy adnaho kandydata – Alaksandra Łukašenki, i tolki adzin pradstaŭlaŭ dvuch demakratyčnych kandydataŭ – Alaksandra Milinkieviča i Alaksandra Kazulina. U hetaj situacyi niemahčyma prymać udzieł u vybarach – heta sapraŭdny łachatron. Kali heta budzie paŭtareńnie prezidenckaj kampanii ci blizkaje da taho, to, viadoma, u nas jość i palityčnaje i maralnaje prava źniać kandydataŭ», -- adznačyŭ palityk.

Što datyčna prysutnaści nazirańnia za vybarami, to lider AHP adznačyŭ, što palityčnyja partyi nie vitajuć pryjezdu na adzin dzień mižnarodnych naziralnikaŭ u Biełaruś. «My padtrymlivajem ideju doŭhaterminovaha nazirańnia», -- adznačyŭ palityk.

Lider Partyi kamunistaŭ Biełaruskaj Siarhiej Kalakin ličyć, što rašać pytańnie ab dalejšym udziele ŭ vybarach kandydaty palityčnych partyj pavinnyja, u tym liku, paśla acenki «fona vybarčaj kampanii».

«Akramia pytańnia ŭklučeńnia pradstaŭnikoŭ apazicyi ŭ kamisii, važna taksama, ci pačnuć patencyjnych kandydataŭ presinhavać na pracy, ci pačnuć presavać ludziej, jakija pojduć źbirać za ich podpisy. Heta budzie ahulny fon, jaki my pavinnyja budziem uvažliva adsočvać i prymać rašeńnie», -- zajaviŭ lider Partyi kamunistaŭ Biełaruskaj.

Pa mierkavańni namieśnika staršyni Partyi BNF Viktara Ivaškieviča, demakratyčnyja kandydaty siońnia pavinnyja pravodzić vybarčuju kampaniju tak, jak jana pavinnaja prachodzić u demakratyčnych krainach, niehledziačy na ŭsie abmiežavańni biełaruskaha CVK.

«Našyja kandydaty nie pavinnyja źviartać uvahu na abmiežavańni z boku CVK. My pavinnyja de-fakta pravodzić kampaniju tak, jak my patrabujem ad uładaŭ. My budziem raspaŭsiudžvać infarmacyjnych materyjałaŭ stolki, nakolki ŭ nas chopić resursaŭ, a nie kolki nam dazvolić CVK. My budziem pravodzić mitynhi i sustrakacca z vybarščykami tam, dzie zachočam, a nie na tych pustkach, kudy nas budzie pasyłać vykankam», -- adznačyŭ Viktar Ivaškievič.

«Dla nas absalutna nieprymalna, što niekatoryja pradstaŭniki mižnarodnych arhanizacyj i palityčnych elit roznych krain viaduć zakulisnyja hutarki ab tym, što prysutnaść 3-4 pradstaŭnikoŭ z adzinaha śpisu kandydataŭ ad apazicyi možna abmieńvać na častkovaje abo poŭnaje pryznańnie vybarčaj kampanii. My kažam kateharyčna - nie. Nam nie patrebnyja nijakija kvoty ad Łukašenki. Nam treba tolki adno - adkrytyja, svabodnyja, sumlennyja vybary», -- dadaŭ lider AHP Anatol Labiedźka.

Tym časam u sieradu stała viadoma, što polskija dypłamaty, jakija pracujuć u Bruseli, imknucca pierakanać svaich kalehaŭ pa ES źniać ci chacia b značna pasłabić palityčnyja i ekanamičnyja sankcyi suprać Łukašenki. Ich hałoŭny dovad – jakija-niebudź abmiežavalnyja miery suprać Miensku daremnyja, a zadača numar adzin - «vyrvać Biełaruś z ruk Maskvy».

Adzin z polskich dypłamataŭ u Strasburhu skazaŭ aŭtaru hetych radkoŭ, što bolšaść krainaŭ syšlisia ŭ nieabchodnaści «padać Biełarusi jasny sihnał, što ŭ vypadku kali pa vynikach vybaraŭ u pałatu pradstaŭnikoŭ trapiać pradstaŭniki apazicyi, Biełarusi budzie prapanavana viarnucca ŭ Radu Jeŭropy». U toj ža čas, skazaŭ jon, nichto nie vieryć, što «Łukašenka stanie demakratam». A taksama jość «peŭnyja maralnyja miežy, jakija Eŭropa nie piarojdzie». Ź jahonych słovaŭ, «vyzvaleńnie Kazulina i vybary» heta ŭmovy-minimum, biez vykanańnia jakich ź Biełaruśsiu nichto nie stanie razmaŭlać, u tym liku pa pytańni dałučeńnia da prajektu tranzitu kaśpijskaj nafty va Ŭschodniuju Jeŭropu.

• 0
• 0
• 0
• 0
• 0
• 0
• 0
• 0