Infarmacyja pra spravazdačy Kramlu jašče bolš źmienšyła pieradvybarčyja rejtynhi partyi Orbana

Zhodna sa śviežym apytańniem kampanii 21 Kutatokozpont, partyju Madźjara «Cisa» ciapier padtrymlivajuć 56% vybarščykaŭ, jakija vyznačylisia z vybaram, a partyju Orbana «Fides» — 37%, paviedamlaje Bloomberg. Try tydni tamu suadnosiny składali 53% da 39%. Hetyja danyja padobnyja da vynikaŭ, apublikavanych na minułym tydni aŭtarytetnaj sacyjałahičnaj słužbaj Median, jakaja zafiksavała pieravahu «Cisy» na 23 pracentnyja punkty.

Zvodny vynik apytańniaŭ na 28 sakavika, jaki publikuje Politico, daje 50% suprać 39%: choć u im «Cisa» lidziruje ŭžo bolš za hod, u kancy sakavika jaje padtrymka stała raści i dasiahnuła 50‑pracentnaj adznaki.

Madźjar zaklikaje vybarščykaŭ zabiaśpiečyć jaho partyi supierbolšaść u parłamiencie, kab nie tolki adchilić Orbana z pasady premjera, ale i razburyć usiu sistemu, u jakoj toj u značnaj stupieni pastaviŭ pad kantrol sudy, ŚMI i mnohija dziaržaŭnyja instytuty. Apytańnie Median pakazvaje, što «Cisa» zmoža atrymać dźvie traciny miescaŭ u parłamiencie, apytańnie ž Kutatokozpont daje joj krychu mienš miescaŭ.

Pry najaŭnaści supierbolšaści ŭ parłamiencie «Cisie» nie treba budzie šukać padtrymki ŭ inšych deputataŭ, kab, jak abiacaŭ Madźjar, adchilić staŭlenikaŭ Orbana — vyšejšych sudździaŭ i hienieralnaha prakurora, a taksama, mahčyma, prezidenta.

Orban pabudavaŭ svaju kampaniju na abvinavačvańniach na adras Ukrainy i Jeŭrasajuza, jakija nibyta pazbaŭlajuć Vienhryju hrošaj i biaśpieki. Pry hetym jon pastajanna błakuje inicyjatyvy ES pa padtrymcy Ukrainy i sankcyjach suprać Rasii. U apošnija tydni vyśvietliłasia, što ministr zamiežnych spraŭ Vienhryi Pieter Sijarta rehularna stelefanoŭvaŭsia z kiraŭnikom MZS RF Siarhiejem Łaŭrovym i raskazvaŭ jamu, što abmiarkoŭvałasia na pasiadžeńniach ministraŭ krain ES. Časam jon heta rabiŭ prosta padčas pierapynkaŭ u takich pasiadžeńniach.

Sijarta taksama prasiŭ rasijan padrychtavać dla jaho infarmacyju, jakuju jon moh by vykarystoŭvać dla błakiroŭki antyrasijskich sankcyj. U Maskvie, u svaju čarhu, prasili jaho prałabijavać źniaćcie sankcyj — u pryvatnaści, ź blizkaha da Pucina miljardera Ališera Usmanava i jaho svajakoŭ.

Za čas vajny va Ukrainie Sijarta 22 razy sustrakaŭsia z rasijskimi lidarami, nieadnojčy jeździŭ u Maskvu i Orban. Zhodna z zapisami telefonnych razmoŭ, jakija trapili ŭ presu, vienhierski ministr taksama abmiarkoŭvaŭ z namieśnikam ministra enierhietyki Rasii Paŭłam Sarokinym błakavańnie sankcyj ES suprać rasijskaha cieniavoha fłotu.

• 4
• 0
• 0
• 0
• 0
• 0
• 0
• 0