«Vurdałak Taras Šaŭčenka», «Rycary Navarosii Mataroła i Hivi»: antyŭkrainskaja litaratura na Minskim knižnym kirmašy
8 lutaha ŭ budynku «Biełekspa» pačaŭsia štohadovy Minski knižny kirmaš.
Na im pradstaŭlenyja knihi z bolš čym z dvuch dziasiatkaŭ krain. Naturalna, što najlepš pradstaŭlenyja rasijskija vydaviectvy. Niechta pryvioz z Maskvy pieravydańni knih Śviatłany Aleksijevič, Sašy Filipienki i raman «Voziera radaści» Viktara Marcinoviča ŭ rasiejskaj viersii, niechta śviežyja ramany Ludmiły Ulickaj i Maryjam Pietrasian, trecija Styviena Kinha i Džaan Roŭlinh, a kala stenda z knihami pa samaterapii ŭvohule niemahčyma było prabicca.
Adnak jość prynamsi niekalki stendaŭ, jakija śpiecyjalizujucca na prapahandysckaj litaratury. Za nievialikija hrošy — 10 rubloŭ — možna nabyć knihi pa «historyi Navarosii». Na ich vokładkach bajeviki Mataroła i Hivi, abviešanyja ordenami.
Knihu «Danbas: ad Słavianska da Debalcava» napisaŭ rasijski aŭtar Michaił Palikarpaŭ, darečy, uradženiec biełaruskaha Homiela. Jašče ŭ 1990-ja Palikarpaŭ vajavaŭ u Bośnii ŭ składzie «Ruskaha dabraachvotnaha atradu» na baku Sierbii. U tym samym atradzie byŭ i Ihar Hirkin, adzin z stvaralnikaŭ «DNR». Tamu nie dziŭna, što Palikarpaŭ staŭ aŭtaram knihi «Ihar Strałkoŭ: žachi ŭkrainskaj chunty». Ukrainskija ŭłady najčaściej u knizie nazyvajucca prosta «nacystami».
U toj samaj sieryi źjaviłasia jašče vydańnie «Rycary Navarosii» Hienadzia Dubavoha. «Hienadź Dubavy, pazyŭny «Karespandent», na pieradavoj ź pieršych dzion vajny na Danbasie. Vajavaŭ pad kamandavańniem Strałkova, Mataroły, Vikinha. Zaŭsiody ŭ adnoj ruce aŭtamat, u druhoj — kamiera. Vorahi nazyvali jaho «pres-sakratarom» Mataroły, siabry — adnym ź ideołahaŭ narodnaj Navarosii. Hieroi knihi — paplečniki i bajavyja pabracimy Dubavoha, sol ruskaj ziamli, čaścinka jaje dušy: ajciec Viktar i «Dym», Alaksiej Śmirnoŭ i «Hivi», Dzianis Pušylin i «Mataroła», «Kiedr» i Alaksandr Žučkoŭski, «Vikinh» i «Bału», «Bocman» i «Cehła», Ihar Strałkoŭ i «Paet», «Isłam» i Alaksandr Paškoŭ», — havorycca pra knihu.
Pobač lažyć kniha «Lalki i lalkavody ŭkrainskaj palityki». U knizie abiacajuć raskazać pra suviaź ukrainskich čynoŭnikaŭ z zachodnimi śpiecsłužbami, karumpavanaść i nieprafiesijanalizm «ukraelity», a taksama «tajnu kryvych daroh, jakimi pryjšła da ŭłady kryvavaja chunta».
Jašče adna padobnaja kniha źjaviłasia ŭ sieryi «Ruskaje Jevanhielle: duchoŭny materyjalizm» nazyvajecca jana «Ukrainski sindrom». Aŭtary — Ihar i Iryna Hałajevy. Tut taksama ŭsio prosta i šabłonna. Aŭtary śćviardžajuć, što Ukrajina idzie šlacham nacysckaj Hiermanii i chutka raźviaža vajnu pa ŭsim śviecie. Adzin z raździełaŭ knihi pryśviečany «Ruskaj cyvilizacyi» i jaje śviatoj misii ŭ śviecie.
Šyroka pradstaŭlenyja knihi ŭžo niabožčyka Alesia Buziny — «Vurdałak Taras Šaŭčenka», «Sajuz płuha i tryzuba: jak prydumali Ukrainu». Nazvy havorać sami za siabie.
Vydańni ŭ ćviordaj vokładcy abiacajuć raskazać pra daktrynu «ruskaha śvieta». Kniha «Siryjski armahiedon» padkuplaje svaim padzahałoŭkam «IHIŁ — Nafta — Rasija», a na vokładcy krasujucca Pucin i Asad.
I, viadoma, kudy biez teoryj zmovy. Kniha «Hłabalnyja elity ŭ schvatcy z Rasijaj» abaviazkova apaviaduć pra toje, jak masony i bankiry robiać usio mahčymaje, kab Rasija nie ŭstała z kaleń.
Pobač lažać knihi, jakija zdolnyja vas pierakanać, što sapraŭdnyja «aryjcy» žyli na terytoryi sučasnaj Rasii, tamu rasijanie mohuć ličycca ich spadčyńnikami.
Jašče adna charakternaja admietnaść: na takich knižnych razvałach stabilna lažać knihi pra Iosifa Stalina. Naturalna, što pieryjad jahonaha kiraŭnictva razhladajecca vyklučna ŭ pazityŭnych farbach.
Varta adznačyć, što takija prapahandysckija knihi i brašurki kaštujuć našmat tańniej za dobruju mastackuju litaraturu ad inšych rasijskich vydaviectvaŭ.
A voś stend Ukrainy, na žal, pradstaŭleny vielmi biedna. Tam litaralna niekalki dziasiatkaŭ pazicyj. Knih ni pa sučasnaj historyi, ni dobraj ukrainskaj litaratury tam niama. Jość krychu dziciačych knižak, a taksama fotaalbomy pa Kijevie.
P.S. Paśla našaj publikacyi dadzienyja knihi z vystavy prybrali.
Kamientary