Deputat Marzaluk: Kolki zapłacili Ministerstvu kultury, kab jano źmianiła miežy achoŭnaj zony ŭ Kurapatach?
Pieradača «Sprava prancypu» na telekanale ANT 6 sakavika była pryśviečanaja biahučaj hramadska-palityčnaj situacyi ŭ krainie. U pieršaj častcy abmiarkoŭvali skandalny Dekret №3.
Bolšaść ekśpiertaŭ syšlisia ŭ mierkavańni, što pastanova nieidealnaja, jana patrabuje šmat udakładnieńniaŭ, a niekatoryja navat prapanavali prypynić dziejańnie. Takija šou redka byvajuć vypadkovymi i acenki tam hučać padrychtavanyja. Tamu, možna mierkavać, niešta ŭ hetym płanie źmienicca.
U druhoj pałovie havorka išła pra supraćstajańnie va ŭročyščy Kurapaty. Admietna, što viadučy Vadzim Hihin nie zaprasiŭ nikoha z tych ludziej, što abaraniali Kurapaty na praciahu dvuch tydniaŭ.
Historyk-archivist Uładzimir Adamuška adznačyŭ, što z «pieśni słovaŭ nie vykinieš, historyju my pavinny ŭsprymać takoj, jakaja jana jość». «Acenačnaja ličba achviar represij za 1917 — 1953 hady składaje kala 600 tysiač čałaviek. Heta niemaleńkaja ličba», — adznačyŭ Adamuška.
Hihin udakładniŭ, što heta nie ličba zahibłych u hety pieryjad, a taksama tych, chto byŭ asudžany da roznych terminaŭ źniavoleńnia, vysłany, raskułačany i h.d.
«Što tyčycca Kurapataŭ, to na siońnia ŭžo dakazana, što na hetym miescy adbyvaŭsia rasstreł achviaraŭ palityčnych represij. Ale heta nie adzinaje takoje miesca ŭ Biełarusi. Na siońnia viadoma adzinaccać takich miescaŭ, dzie heta adbyvałasia. U Słucku, Červieni, Minsku, Mazyry i h.d.», — kaža Adamuška.
Viadučyja ANT Vadzimi Hihin i Viačasłaŭ Bandarenka pahadzilisia, što na miescy Kurapataŭ pavinien być miemaryjał achviaraŭ palityčnych represij. «U Rasii jość Butaŭski miemaryjał. Tam staić kaplička, ludzi tudy iduć», — ličyć Hihin.
Vielmi rezkuju pazicyju zaniaŭ deputat Pałaty pradstaŭnikoŭ Ihar Marzaluk: «Ja chacieŭ by skancentravacca na pravavym aśpiekcie. U 2004 hodzie była zaćvierdžanaja achoŭnaja zona vakoł uročyšča Kurapaty pastanovaj Savieta ministraŭ. U mianie pytańnie: kolki kaštavała pamianiać miežy achoŭnaj zony? Tam, dzie ciapier staviać biznes-centr, tam niama pachavańniaŭ. Ale achoŭnaja zona nie prachodzić pa miažy pomnika, jość standarty. Mnie cikava, chto nacisnuŭ na Ministerstva kultury? Ja nie vieru ŭ altruizm. Heta pytańnie da Śledčaha kamiteta».
Marzaluk ličyć, što ŭ Biełarusi pavinna być try miescy miemarylizacyi: Kurapaty, Chatyń, Biaroza-Kartuzskaja.
Pad sumnieŭ toj fakt, što ŭ Kurapatach lažać mienavita achviary stalinskich represij stavili redaktar «Imachakłaba» Alaksiej Dziermant i kamunist Hieorhij Atamanaŭ. Jany sprabavali źbić hutarku na toje, što ludziej u Kurapatach rasstrelvali nacysty.
«Pa-mojmu, historykam usio jasna, — rezka absiok Dziermanta Hihin. — Možna spračacca, ci pad hetym drevam, ci pad tym. Ale ŭ Biełarusi pry Stalinie rasstrelvali ludziej. Kropka. U Kurapatach, ci ŭ inšym miescy, ale ŭ ich pavinien być pomnik, jaki ŭšanoŭvaje ich pamiać».
Paśla hetaha surazmoŭcy pierajšli na krytyku «Maładoha fronta», jaki, nibyta sastryhaje palityčnyja bonusy z supraćstajańnia ŭ Kurapatach. Najbolš radykalnyja navat prapanoŭvali «adabrać» Kurapaty ŭ apazicyi.
«Admyvaŭ haŭno z unitazaŭ, my tam jak samyja končanyja». Błohier Vadzim Vadimati Jermašuk — pra toje, jak žyŭ u kałonii ŭ «nizkim statusie»25
Kamientary