Upieršyniu z kanca XIX stahodździa Vialikabrytanija na praciahu adnaho pracoŭnaha dnia nie vykarystała elektryčnuju enierhiju, dla vytvorčaści jakoj vykarystoŭvaŭsia b kamienny vuhal, paviedamlaje VVS.
Pavodle danych brytanskaha apieratara linij elektrapieradačy (Nacyjanalnaj sietkavaj kampanii), dzień 21 krasavika staŭ pavarotnym momantam u prahramie paetapnaj admovy ad vykarystańnia vuhalu da 2025 hoda.
Vuhal źjaŭlajecca adnoj z samych mocnych krynic zabrudžvańnia siarod vykapniovych vidaŭ paliva. Padatak na vykidy škodnych rečyvaŭ užo pryvioŭ da taho, što vuhalnyja elektrastancyi stali ekanamična niavyhadnymi.
Pastupova Vialikabrytanija pierachodzić na adnaŭlalnyja krynicy enierhii — viecier i soniečnaje śviatło.
Na praciahu vykarystańnia vuhalu nastojvaje pramysłovaść — mienavita tamu całkam admovicca ad vuhalu płanujecca tolki da 2025 hoda.
U śniežni 2015 hoda ŭ Vialikabrytanii zakryłasia apošniaja hłybokaja vuhalnaja šachta Kielinhli, jakaja raźmiaščałasia ŭ Jorkšyry na poŭnačy Anhlii. U joj na 800-mietrovaj hłybini pracavali 450 čałaviek.
Pakul u Brytanii ŭsio jašče praciahvajuć pracavać niekalki vuhalnych karjeraŭ.
U lipieni 2016 hoda śpiecyjalisty Suśvietnaha fondu dzikaj pryrody i inšych arhanizacyj padrychtavali dakład, zhodna ź jakim škoda ad pracy vuhalnych elektrastancyj u Jeŭropie aceńvajecca ŭ 23 tysiač zaŭčasnych śmierciaŭ u hod.
U dakładzie havorycca, što zabrudžanaje vuhalnymi elektrastancyjami pavietra moža raspaŭsiudžvacca na sotni kiłamietraŭ, u tym liku i praź miežy. Takim čynam, faktyčna škodnyja vykidy ŭdychajuć nie tolki žychary dziaržaŭ, dzie znachodziacca hetyja stancyi, ale i žychary susiednich krain.
Na kaniec 2015 hoda ŭ ES pracavali 280 vuhalnych elektrastancyj. Na vuhal u 2015 hodzie pryjšłosia 24% elektraenierhii, što vypracoŭvajecca ŭ ES. Dola vuhalu ŭ enerhietycy Jeŭropy skaračajecca, ale pakul niekatoryja krainy, uklučajučy Polšču i Čechiju, nie płanujuć poŭnaściu admovicca ad hetaha vidu elektraenierhii.
Kamientary