Kanfiskujuć mašynu, dom, hrošy: supracoŭnika MNS pa chabary prysudzili da 10 hadoŭ

Vitala Tułaja, pieršaha namieśnika načalnika Minskaha haradskoha ŭpraŭleńnia MNS Biełarusi, pryznali vinavatym u tym, što jon atrymaŭ ad byłych supracoŭnikaŭ MNS u jakaści chabaru 23 tysiačy dołaraŭ.

Pavialičyć

Sutnaść mnie zrazumiełaja, vinu nie pryznaju. Abvinavačvańnie pabudavana na pakazańniach dvuch zacikaŭlenych ludziej, jakija mianie abyłhali. <…> Dzie hetyja hrošy? Ja nie baču ich. Dajcie choć u rukach patrymać, — kazaŭ padčas sudu Vital Tułaj.

Siońnia sud Leninskaha rajona Minska pastaviŭ kropku ŭ jaho spravie i abviaściŭ prysud. Supracoŭnik MNS pryznany vinavatym pa č. 2, č. 3 art. 430 «Atrymańnie chabaru» i prysudžany da 10 hadoŭ pazbaŭleńnia voli. Akramia taho, u jaho kanfiskujuć majomaść: niedabudavany dom u Minskim rajonie, kvateru, aŭtamabil, 76 tysiač dołaraŭ i 11,5 tysiačy jeŭra. Pa pryhavory suda jamu na praciahu 5 hadoŭ zabaroniena zajmać kirujučyja pasady, taksama jon pazbaŭleny zvańnia «pałkoŭnik». Pa art. 429 KK «Niezakonnaje ŭdzieł u pradprymalnickaj dziejnaści» Vital Tułaj byŭ apraŭdany.

Druhi fihurant spravy Siarhiej Pałanievič prysudžany da 2,5 hadoŭ abmiežavańnia voli.

Nahadajem, kajdanki na Tułaja nadzieli ŭ kafe 23 śniežnia 2015 hoda. U toj dzień jon sustrakaŭsia z byłymi kalehami z MNS, jakija arhanizavali ŭłasnuju firmu pa ŭstanoŭcy pažarnych apaviaščalnikaŭ. Pa viersii dziaržabvinavaŭcy Cimafieja Konada, fihurant kryminalnaj spravy byŭ zatrymany z dokazami złačynstva. Jak nastojvaje sam Vital Tułaj, heta byŭ nie chabar, hrošy jon uziaŭ u pazyku na darahuju apieracyju dla žonki.

Byłoha pieršaha namieśnika načalnika Minskaha haradskoha ŭpraŭleńnia MNS Biełarusi abvinavacili ŭ tym, što jon braŭ hrošy ad kiraŭnikoŭ firmaŭ dla vyrašeńnia pytańniaŭ, jakija ŭvachodziać u jaho kampietencyju. A taksama zajmaŭsia niezakonnaj pradprymalnickaj dziejnaściu: uvioŭ u skład zasnavalnikaŭ adnoj ź firmaŭ svajho cieścia i atrymlivaŭ ad hetaha prybytak.

Padčas sudovych pasiadžeńniaŭ Tułaj usio admaŭlaŭ, ale pry hetym nie chavaŭ: ź lipienia 2014 hoda pa śniežań 2015 hoda jon kožny miesiac atrymlivaŭ pa 10 miljonaŭ ad śviedki Mukavozčyka, kab pieradać cieściu. Nibyta heta byli dyvidendy, bo cieść i Mukavozčyk pracavali razam u adnoj firmie, a cieść pažyły čałaviek, i hrošy było zručna pieradavać praz Tułaja.

Usiaho suma chabaraŭ skłała 23 tysiačy dołaraŭ.

— Miarkujučy pa sumach, ja padpolny miljanier, — iranizavaŭ padčas sudu Tułaj.

Darečy, były kiraŭnik Vitala Tułaja ciapier taksama za kratami. U 2015 hodzie Dźmitryj Biahun uznačalvaŭ Minskaje haradskoje ŭpraŭleńnie MNS, zatym pajšoŭ na pavyšeńnie i staŭ namieśnikam ministra pa nadzvyčajnych situacyjach. U sakaviku prezident raspavioŭ, što Biahun zatrymany pry atrymańni chabaru.

Prysud u dačynieńni da Vitala Tułaja nie ŭstupiŭ u zakonnuju siłu i moža być abskardžany.

• 0
• 0
• 0
• 0
• 0
• 0
• 0
• 0