«Bicie ŭ sercy ich, bicie miačami». Jak biełaruskaja «Pahonia» praviała pieršy siezon u polskaj futbolnaj lizie
«Pahonia» stała pieršym u najnoŭšaj historyi Biełarusi futbolnym kłubam, jaki vystupiŭ u aficyjnym čempijanacie inšaj krainy. Kamanda mihrantaŭ z Varšavy try hady damahałasia prava na ŭdzieł u polskim turniry. Telekanał «Biełsat» pahutaryŭ z adnym z kiraŭnikoŭ kamandy Illoj Šyłam pra značeńnie prajektu dla dyjaspary, biudžet kłuba i staŭleńnie da biełarusaŭ polskich fanataŭ, jakija słaviacca ahresiŭnymi pavodzinami.
Bolš za stahodździe tamu kłasik našaj litaratury Maksim Bahdanovič pisaŭ pra chałodnuju zbroju, jakaja pavinna była dapamahčy biełarusam nie stacca čužyncami i zachavać svaju identyčnaść u składanych umovach. Siońnia biełarusy Varšavy dziela hetaj mety vykarystoŭvajuć skurany miač i sport. Biełaruski futbolny kłub «Pahonia», składzieny z amataraŭ, paŭstaŭ u 2022 hodzie i ŭžo ŭ spartovym siezonie 2025/2026 paŭnavartasna zhulaŭ u aficyjnych spabornictvach.
Futbolny kłub — heta najpierš placoŭka dla zachavańnia identyčnaści
Adzin z pradstaŭnikoŭ rady dyrektaraŭ kamandy Illa Šyła svoj raskaz pačynaje z razvažańnia pra toje, što futboł uvohule vielmi mocna źviazany ź identyčnaściu čałavieka. Jon zhadvaje, što častkova heta tłumačycca sacyjalnymi ŭmovami, u jakich sport raźvivaŭsia na radzimie futbołu, u Vialikabrytanii.
«U pačatku minułaha stahodździa ŭ Anhlii adbyvałasia bujnaja urbanizacyja. Ludzi pierajazdžali ź viosak i miastečak u vialikija harady, dzie dałučalisia da futbolnych kłubaŭ. Heta dapamahała im znachodzić svaju identyčnaść. Heta dapamahała zavodzić znajomstvy i kantakty ŭ novych nieviadomych umovach», — kaža Šyła.
Jon ličyć, što siońnia pierad biełaruskim futbolnym kłubam staić prykładna takaja samaja zadača. Dla mnohich biełarusaŭ pierajezd u Varšavu — heta vymušanaja emihracyja, strata zvyčajnaj ruciny dy adnosin. Takim čynam, «Pahonia» moža stać dla mnohich takim samym miescam dla zachavańnia identyčnaści, siabroŭstva i dapamohi ŭ niaprostych umovach žyćcia nie ŭ svajoj krainie.
Sam Šyła ŭ junactvie byŭ talenavitym spartoŭcam. Jon zajmaŭsia futbołam u škole salihorskaha «Šachciora» i padavaŭ vialikija nadziei. Adnak u vyrašalny momant zamiest sportu chłopiec abraŭ navučańnie i vypraviŭsia pa viedy ŭ Polšču pa Prahramie Kalinoŭskaha.
«U Salihorsku, kali ty vychodziš u dvor, u ciabie jość vybar — čym zajmacca. U starejšyja hady — heta ałkahalizm. U junyja hady — futboł, jaki pastupova pieraciakaje ŭ horadzie dla mnohich u ałkahalizm. Tak pracuje miascovy futboł», — zhadvaje junactva ŭ Salihorsku Illa Šyła.
Takim čynam, mužčyna radujecca svaim rašeńniam, jakija spačatku vyratavali jaho ad ałkaholu, a potym i ad prafiesijnaha futbołu, jaki znoŭ-taki viadzie da ałkaholu.
Ciapier Illa źjaŭlajecca raspracoŭščykam i biznesoŭcam. Mnohija viedajuć jaho praz klininhavuju kampaniju «Čysty kit», choć heta daloka nie adzinaja sprava, jakoj zajmajecca salihorac. U junactvie mužčyna byŭ viadomym aktyvistam «Maładoha frontu».
Pošuki 80 000 złotych i chatniaha stadyjona. Siezon vydaŭsia jarkim, ale niaprostym
Startavy futbolny siezon dla «Pahoni» vydaŭsia dosyć ciažkim. Arhanizataram kamandy treba było zapuścić usie pracesy dziejnaści z nula, a ni ŭ kaho faktyčna nie było adpaviednaha dośviedu. Zatoje było šmat entuzijazmu. Illa Šyła paraŭnoŭvaje hetu historyju z hulnioj u «futbolny mieniedžar», tolki na bolš vysokim uzroŭni.
Rašeńnie z dazvołam na ŭdzieł u čempijanacie biełarusy atrymali ŭ 2025 hodzie vielmi pozna. Faktyčna ŭžo pačynalisia spabornictvy, da jakich supierniki rychtavalisia ŭsio leta. Futbolnaja fiederacyja Mazavieckaha vajavodstva praz 3 hady sprobaŭ znajšła mahčymaść zarehistravać «Pahoniu» i zajavić u nižejšuju lihu Polščy, adkul pačynajuć usie novyja kamandy. Jana nosić nazvu «Kłas B» i faktyčna źjaŭlajecca aficyjnym 9‑m dyvizijonam. Da prykładu, u Biełarusi isnuje ŭsiaho 3 futbolnyja dyvizijony.
Niečakana składanym momantam stała aficyjnaja rehistracyja hulcoŭ. Navat niahledziačy na toje, što polskaja futbolnaja fiederacyja pajšła nasustrač biełarusam. Było zroblena vyklučeńnie dla ŭdziełu zamiežnikaŭ i nie hramadzian ES u kamandzie. Pavodle aficyjnaha rehłamientu tolki 3 čałavieki ŭ składzie mohuć być bieź jeŭrapiejskaha pašpartu. Adnak niavyrašanym zastałosia pytańnie mahčymaści hulni dla ludziej ź mižnarodnaj abaronaj i prytułkam u Polščy.
Reč u tym, što ŭsie hulcy pavinny atrymać licenziju ŭ śpiecyjalnaj mižnarodnaj prahramie, to-bok faktyčna nakiravać zapyt u «Biełaruskuju fiederacyju futboła». Častka hulcoŭ tak i nie zmahła za hod uziać udzieł u matčach, bo nie choča i nie moža nakiravać zapyt u spartovy orhan, zaležny ad biełaruskaj dziaržavy. Polskaja fiederacyja pakul na zdoleła vyrašyć hetuju niaprostuju dylemu, ź jakoj jašče nikoli nie sutykałasia ŭ svajoj historyi.
Jašče adnym vyklikam staŭ pošuk srodkaŭ dla ŭdziełu ŭ spabornictvach. Apłata vydatkaŭ na arendu placovak dla matčaŭ i trenirovak, pierajezdaŭ i ekipiroŭki vymahała vialikich vysiłkaŭ. Šyła kaža, što za siezon biudžet skłaŭ prykładna 80 000 złotych (kala 21 500 dalaraŭ).
Hrošy kamanda atrymała ad hałoŭnaha sponsara «Pahoni» — budaŭničaj kampanii TLBud, kampanii «Čysty kit» i adnoj biełaruskaj meblevaj firmy. Taksama častku hrošaj futbalisty zakłali z ułasnaj kišeni. Illa Šyła sa śmiecham zhadvaje, što polski brovar Warka navat prysłaŭ «Pahoni» 2 skrynki piva, adhuknuŭšysia na dopis kamandy ŭ Instagram.
Nie abminuli biełaruski kłub i kurjoznyja situacyi. Pakul polskaja fiederacyja vyrašała ŭsie jurydyčnyja detali dla ŭdziełu futbalistaŭ u čempijanacie, kamanda prapuściła niekalki startavych turaŭ. Chłopcy tak i nie zdoleli pierajhrać tyja matčy, choć i damovilisia z supiernikami. Vyjšaŭ praduhledžany rehłamientam 30‑dzionny termin i ŭ vyniku kamanda atrymała šerah «techničnych parazaŭ». Niahledziačy na składanaści «Pahonia» skončyła siezon na davoli vysokim 5‑m miescy ŭ turnirnaj tablicy. Kamanda zdabyła 45 bałaŭ i zdoleła zabić ažno 80 hałoŭ u 23 matčach.
Kastryčnickija viečary ŭ Ažaravie Mazavieckim
Biełarusam, jakija stracili dom, akazałasia niaprosta znajści «chatni stadyjon». Pieršuju častku čempijanatu pryjšłosia hulać za miežami Varšavy — u Ažaravie Mazavieckim. Illa Šyła kaža, što heta byŭ nie tolki składany łahistyčny momant, ale i vyklik dla zaŭziataraŭ.
«Ciažka było ŭjavić, što niechta ŭ kastryčniku budzie dabiracca ŭviečary ŭ Ažaraŭ, kab pazaŭzieć za nas. Heta prosta šalona, ale takija ludzi byli. Na mianie ledź nie pakryŭdziŭsia adzin čałaviek, u jakoha ja zapytaŭsia, dla čaho jon pryjechaŭ na poźni matč u takuju dalačyń», — zhadvaje kiraŭnik futbolnaha kłuba.
Naprykancy hoda ŭ biełaruskaj kamandy, zdajecca atrymałasia znajści prystanišča. Ciapier futbalisty pravodziać matčy ŭ varšaŭskaj Prazie — na stadyjonie «Bliskavicy» na vulicy Kaviačynskaj, 44. Vierahodna, mienavita tam možna budzie pabačyć matčy «Pahoni» u nastupnym siezonie.
Razvažajučy pra raźvićcio kamandy, Illa Šyła kaža, što «Pahonia» stała bolš prafiesijna stavicca da spabornictvaŭ. Na pačatku siezonu hulcy źbiralisia tolki na matčy, ale ŭžo bližej da Kaladaŭ raspačalisia štotydniovyja treniroŭki. Hałoŭnym trenieram kamandy staŭ znakamity bieraściejski futbalist Vital Hajdučyk. Najbolš zapomniŭsia jon vystupami za barysaŭski «BATE» u Lizie čempijonaŭ. Spartsmien pahulaŭ suprać takich zorak jak Nejmar, Chavi, Injesta, a ciapier sprabuje zrabić zorak z samych zvyčajnych biełarusaŭ dyjaspary.
Palaki staviacca pryjazna, a ŭ Biełarusi adznačyli Instagram ekstremisckim statusam
Šyła adznačaje, što «Pahonia» stanovicca ambasadaram Biełarusi ŭ futbolnym śviecie, a miascovyja kamandy i zaŭziatary davoli pryjazna staviacca da kłuba. Jon kaža, što ni razu za ŭsie matčy kamanda nie sutyknułasia z prajavami dyskryminacyi ci abrazaŭ. Chutčej možna było sustreć pryjaznaje staŭleńnie, i ŭ tym liku kamandzie ŭdałosia naładzić niebłahija adnosiny z supiernikami pa lizie. Možna było zaŭvažyć, jak miascovyja z pavahaj staviacca da taho, što biełarusy zdoleli arhanizavacca i stvaryć svaju kamandu ŭ niespryjalnych umovach.
Nie abminuła kłub uvahaj i biełaruskaja dziaržava. Sacyjalnyja sietki «Pahoni» byli pryznanyja «ekstremisckimi materyjałami». Chacia sam kłub takoha statusu dahetul nie maje. Kali raptam sud Čyhunačnaha rajona Homiela prymie takoje rašeńnie — moža adbycca cikavy precedent, bo biełarusy vystupajuć u aficyjnych spabornictvach pad ehidaj Polskaj fiederacyi futboła i faktyčna UEFA. Cikava, jak na takoje adreahuje mižnarodny orhan.
Što dalej?
Ciapier pierad arhanizatarami «Pahoni» staić niaprostaja zadača padrychtavacca da nastupnaha siezonu. Siarod rečaŭ, jakija buduć pryjarytetnymi dla kamandy, Illa Šyła nazvaŭ pabudovu supolnaści vakoł kamandy.
Kažučy pra mety kamandy, mužčyna adznačaje, što stvareńnie supolnaści ludziej było pieršapačatkovaj metaj «Pahoni».
«Na žal, u minułym hodzie prychodziłasia šmat času vydatkavać, kab naładzić usie pracesy i prosta dahulać siezon, jaki zabraŭ šmat siłaŭ», — kaža Šyła.
Jon ličyć, što novy hod budzie bolš pryjazny i cikavy dla zaŭziataraŭ. Płanujecca šerah publičnych mierapryjemstvaŭ, kab pradstavić kłub biełarusam Varšavy i nie tolki. Dla hetaha kamanda pasprabuje naładzić žyvyja tranślacyi z kožnaha matču z udziełam kamientataraŭ.
Ciapier futbolny kłub znachodzicca ŭ pošukach partnioraŭ, jakija b napoŭnili biudžet kamandy na nastupny siezon. Arhanizatary chočuć, kab kłub staŭ bolš adkrytym i prazrystym. Illa Šyła adznačaje, što vydatna mieć bujnoha sponsara, ale dla realizacyi mety kamandy i biaśpieki — najlepiej mieć šmat «drobnych fundataraŭ». Jany b adčuvali svaju prynaležnaść i adkaznaść za los prajektu. Pakul što chłopcy razvažajuć, što mohuć prapanavać uzamien na ŭkładańni. Ci heta budzie ŭdzieł u pryniaćci rašeńniaŭ, vyznačeńni hulcoŭ ci navat udziele ŭ treniroŭkach.
Kłub anansuje zapusk ułasnaha sajta, dzie možna budzie sačyć za vynikami, čytać apošnija naviny kamandy, nabyć jaje mierč, a taksama dałučycca da dziejnaści «Pahoni» navat z samych dalokich punktaŭ śvietu. Jaho raspracavaŭ brat Illi — Ivan Šyła.
Futbolny kłub zaprašaje ŭsich achvotnych pryjści na treniroŭki, jakija prachodziać pa aŭtorkach. Uziać udzieł možna pavodle papiaredniaj damoŭlenaści praz Instagram. Taksama «Pahonia» budzie zacikaŭlenaja ŭ vałanciorach, jakija mohuć realizavać lubyja svaje śmiełyja žadańni ŭ miežach prajektu.
Upieršyniu kamanda mihrantaŭ zajaviła pra siabie ŭ 2022 hodzie. Tady «Pahonia» uziała ŭdzieł u Kubku Polščy pa futbole ŭ Mazavieckim vajavodstvie. Svoj šlach tady kłub pačaŭ z upeŭnienaj pieramohi 4:0, a matč sabraŭ niekalki sotniaŭ zaŭziataraŭ na trybunach. Anłajn-tranślacyju pahladzieli niekalki tysiačaŭ čałaviek. U tym liku da stvareńnia inicyjatyvy spryčynilisia try supracoŭniki telekanała «Biełsat».
Byłaja palitźniavolenaja ź Biełarusi trapiła ŭ zbornuju Polščy pa futbole siarod emihrantaŭ
Novy kanflikt vakoł «Pahoni». Litoŭcy vinavaciać biełaruski futbolny kłub u kradziažy ich simvoliki
Biełaruski futbolny kłub budzie hulać u adnoj ź minornych lih Polščy
«Heta našy ci nie?» U Polščy taksama možna narvacca na prablemy praź bieł-čyrvona-bieły ściah
Kamientary