Sud u Biełharadzie (RF) vynies prysud 22-hadovaj miascovaj žycharcy, jakaja prykuryła cyharetu ad śviečki ŭ carkvie i raźmiaściła fatahrafii va UKantakcie. Jaje pryznali vinavataj u abrazie pačućciaŭ viernikaŭ, ale prysudzili da štrafu ŭ 15 tysiač rasijskich rubloŭ (kala $265), uličyŭšy źmiakčalnyja abstaviny, piša VBS.
Dziaŭčynu, čyjo imia nie nazyvajecca, sudzili pa 148-m artykule Kryminalnaha kodeksa Rasii — publičnyja dziejańni, jakija vykazvajuć vidavočnuju niepavahu da hramadstva, učynienyja ŭ metach abrazy pačućciaŭ viernikaŭ. Niadaŭna pa hetym ža artykule byŭ asudžany jekaciarynburhski błohier Rusłan Sakałoŭski, jaki raźmiaściŭ fota taho, jak łaviŭ pakiemonaŭ u chramie.
Pa viersii śledstva, abvinavačanaja čatyry razy raźmiaściła na svajoj staroncy ŭ sacyjalnaj sietcy UKantakcie fatahrafii, na jakich jana ŭ pravasłaŭnym chramie ŭ centry Biełharada «prykurvaje cyharetu ad śviečki».
«Takija dziejańni śviedčać ab vidavočnaj niepavazie da hramadstva i viernikaŭ, abražajuć ich relihijnyja pačućci», — havorycca ŭ paviedamleńni prakuratury ab rašeńni suda.
U vyniku miravy sud Zachodniaj akruhi horada Biełharada pryznaŭ dziaŭčynu vinavataj i pryznačyŭ joj pakarańnie ŭ vyhladzie štrafu ŭ pamiery 15 tysiač rubloŭ. Sud pry hetym uličyŭ źmiakčalnyja abstaviny.
Dziaŭčynu sudzili pa pieršaj častcy artykuła ab abrazie pačućciaŭ viernikaŭ, maksimalnaje pakarańnie pa jakoj — hod pazbaŭleńnia voli.
Ciapier čytajuć
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie15
Kamientary