«Savuškaŭ pradukt» niečakana trapiŭ u čorny śpis Raśsielhasnahladu
Ad siońniašniaha dnia Raśsielhasnahlad uvodzić abmiežavańni na pastaŭki ŭ Rasieju małočnaj i miasnoj pradukcyi čarhovych biełaruskich pradpryjemstvaŭ. Jak paviedamlajecca, suprać ich budzie dziejničać režym uzmocnienaha labaratornaha kantrolu. U «čornym śpisie» — adzin ź flahmanaŭ małočnaj haliny «Savuškaŭ pradukt».
«Raśsielhasnahlad» udakładniaje, što čarhovyja sankcyi vyklikanyja novymi vypadkami vyjaŭleńnia antybijotykaŭ i patencyjna niebiaśpiečnych dla zdaroŭja mikraarhanizmaŭ.
Aproč zhadanaha bieraściejskaha vytvorcy, zabarona datyčycca pradukcyi Skidzielskaj ptuškafabryki (paŭtornaje vyjaŭleńnie ŭ miasie reštkaŭ tyłmikazinu, enraflaksacynu i cypraflaksacynu), AAT «Aleksandryjskaje» (paŭtornaje vyjaŭleńnie ŭ miasie reštkaŭ enraflaksacynu), AAT «Małočny śviet» (paŭtornaje vyjaŭleńnie ŭ suchoj małočnaj syrovatcy reštkaŭ linkamicynu), Rahačoŭskaha małočnakanservavaha kambinatu (vyjaŭleńnie ŭ pradukcyi reštkaŭ antybijotykaŭ).
Rasiejskaja vietsłužba pastaviła na ŭzmocnieny labaratorny kantrol pastaŭki pradukcyi zvyš dziasiatka pastaŭščykoŭ, papiaredziŭšy, što ŭ vypadku paŭtornaha vyjaŭleńnia niebiaśpiečnych rečyvaŭ i mikraarhanizmaŭ budzie vymušanaja ŭvieści zabaronu na pastaŭki. Siarod ich ahrakambinat «Zara», Baranavickaje rajpa, «Biełarusnafta-Asobina», Vierchniadźvinski masłasyrzavod, Maładečanski małočny kambinat, AAT «Małočnyja horki», AAT «Babulin harłač», Salihorskaja ptuškafabryka, AAT «Smalavičy brojler».
Akramia taho, Raśsielhasnahlad paviedamiŭ pra vypadki falsyfikacyi pradukcyi Vierchniadźvinskaha masłasyrzavodu i Dziatłaŭskaha syrarobnaha zavodu.
Kiraŭnictva viedamstva źviarnułasia da biełaruskaha boku z prośbaj pryniać zachady dla niedapuščeńnia pastavak u Rasieju tavaraŭ z parušeńniem veterynarna-sanitarnych patrabavańniaŭ i normaŭ Eŭrazijskaha ekanamičnaha sajuzu, patrabujučy pravieści raśśledavańnie kožnaha parušeńnia.
U Ministerstvie sielskaj haspadarki i charčavańnia Biełarusi nieadnarazova zajaŭlali, što pretenzii Rasiei da biełaruskaj pradukcyi nadumanyja i zychodziać ad labistaŭ tamtejšych vytvorcaŭ.
Kamientary