«Pryhožaja dziaŭčyna dadałasia ŭ siabry i adrazu prapanavała virtualny seks». Jak palittechnołah ledź nie staŭ achviaraj ašukancaŭ

«Učora zapyt na siabroŭstva ŭ fejsbuku mnie dasłała pryhožaja dziaŭčyna Hanna — studentka z Francyi. Zvyčajna pierad tym, jak dadać kahości, ja vyvučaju profil čałavieka, hladžu, ci jość u nas ahulnyja znajomyja i hetak dalej. Zamiežnikaŭ dadaju redka, ale ŭ hety raz pahartaŭ profil Hanny, acaniŭ jaje fotazdymki — pryhožaja dziaŭčyna! Chaj, padumaŭ, budzie. Tym bolš u nas, na dziva, byŭ ahulny siabar — žurnalist Vasil Siamaška», — uzhadvaje palittechnołah Siarhiej Marcaleŭ, jaki niekali ŭznačalvaŭ vybarčy štab Mikoły Statkieviča.

Paśla hetaha dziejańni novaj znajomaj raźvivalisia imkliva. Kamunikacyja pačałasia z taho, što Hanna padzialiłasia svajoj bijahrafijaj: raskazała, što jana fłarystka, paralelna vučycca. I adrazu ž paśla hetaha pasprabavała vyśvietlić źviestki pra Siarhieja.

Nie saromiejučysia, dziaŭčyna pacikaviłasia, nakolki dobra jaje surazmoŭca zarablaje. A paśla prapanavała virtualny seks.

— Ja — amatarka virtualnaha seksu, kali pierad taboj jość veb-kamiera, kali łaska ŭklučy jaje. Zojmiemsia spravaj.

— Nie mahu, ja zaraz pracuju.

— Vyjdzi ŭ prybiralniu.

— Nie, ja zaniaty.

— Nu ty što, zusim u prybiralniu nie chodziš? Moža, atrymajecca praz 5 ci 10 chvilinak?

Pryblizna tak vyhladaŭ dyjałoh Hanny i Siarhieja. Pierapiska viałasia na anhlijskaj movie. Paśla troch admovaŭ mužčyny, Hanna ź im raźvitałasia. Jašče praz 10 chvilinak hety profil u sacyjalnaj sietcy biasśledna źnik. Na žal, razam ź im «vyparyłasia» i poŭnaja pierapiska, skrynšoty jakoj Siarhiej nie paśpieŭ zrabić — zastalisia tolki jaho adkazy.

Pavialičyć

«Ja čytaŭ pra takija razvody. Machlary dadajucca ŭ siabry praz fejsbuk ci ŭ skajpie, paśla prosiać uklučyć vebku — spačatku sami paŭstajuć na ekranie aholenymi, dalej prosiać zrabić toje ž samaje achviaru. Uvieś praces fiksujecca na videa, za jakoje vymahajuć tysiačy dalaraŭ.

Kali hrošaŭ nie pastupaje — pahražajuć zahruzić kantent na jutub i razasłać kachanym, svajakam, siabram. Ja byŭ u temie, tamu tolki śmiajaŭsia z našaj pierapiski. Akramia taho, ja maju niehatyŭny vopyt adsutnaści pryvatnaha žyćcia. 24 hadziny ŭ sutki pad videanazirańniem, 5 miesiacaŭ u SIZA KDB [«Siarhiej abvinavačvaŭsia ŭ arhanizacyi masavych biesparadkaŭ padčas vybaraŭ 2010 hoda —»NN»]. Tak što ad kamier maju ŭstojlivy imunitet», — kaža Siarhiej.

Mužčynu pašancavała: jon byŭ padrychtavany i nie paddaŭsia naporu. Nie dajšło da ŭklučeńnia veb-kamiery i ŭ žurnalista Vasila Siamaški: jon ščyra nie razumieje tych, chto moža atrymlivać asałodu ad virtualnaha seksu.

Adnak śvietu viadomy sotni vypadkaŭ, amatary takoha seksu lohka išli na padman — hienitalii biedakoŭ zdymalisia bujnym płanam, i paśla im ŭ žachu prychodziłasia płacić machlaram sotni i tysiačy dalaraŭ.

Zamiest pryhožych dziaŭčat pa druhi bok veb-kamiery siadziać surovyja mužyki, jakija prosta ŭklučajuć narezku z pornarolikaŭ. Lepš za ŭsio taki vid biznesu raźviŭsia ŭ arabskich krainach. Ale achviaraj ašukancaŭ moža stać pradstaŭnik luboj dziaržavy — aściarožna.

• 0
• 0
• 0
• 0
• 0
• 0
• 0
• 0