Kiraŭnictva śpiecvučelni ŭ Mahilovie zatrymana za žorstkaje źbićcio padletkaŭ, jakija sprabavali ŭciačy

Niepaŭnaletni navučeniec Mahiloŭskaha śpiecvučylišča zakrytaha typu №2 trapiŭ u balnicu ź pierałomam pazvanočnika. Jašče piaciora atrymali cialesnyja paškodžańni. Jak stała viadoma TUT.BY, 26 listapada šaściora chłopcaŭ źbiehli sa śpiecvučelni. Ich znajšli i viarnuli va ŭstanovu, a paśla, pa słovach maci adnaho z uciekačoŭ, źbili. U dačynieńni da dyrektara śpiecvučylišča i jaho namieśnika zaviedziena kryminalnaja sprava za pieravyšeńnie słužbovych paŭnamoctvaŭ. Mužčyny zatrymanyja i ŭziatyja pad vartu.

— Kryminalnuju spravu pa č. 3 art. 426 KK RB rasśleduje USK pa Mahiloŭskaj vobłaści. Śledstva vyjaviła, što abvinavačvanyja, vyśviatlajučy ŭ šaściarych vychavancaŭ ustanovy adukacyi, jakuju jany ŭznačalvajuć, abstaviny i pryčyny samavolnaha sychodu z terytoryi vučylišča, źbili niepaŭnaletnich, a zatym arhanizavali niezakonnaje ŭtrymańnie ich u pakoi, abmiažoŭvajučy tym samym svabodu, — raspaviała TUT.BY aficyjny pradstaŭnik abłasnoha USK Aksana Salaniuk.

Šaściora padletkaŭ atrymali traŭmy. U balnicy apynuŭsia 16-hadovy ŭradženiec Čerykava Andrej. Jaho maci, Alena Ščaŭlikava, raspaviała TUT.BY, što pra traŭmu syna daviedałasia ad miedykaŭ:

— A 7-j viečara 28 listapada mnie patelefanavała miedsiastra, skazała: «Vy viedajecie, što ŭ vašaha Andreja surjoznaja traŭma pazvanočnika? Treba vašu zhodu na kampjutarnuju tamahrafiju». Ja skazała, što zhodnaja na ŭsio, što treba majmu dziciaci.

Na pytańnie ab tym, adkul u Andreja traŭma, miedsiastra, kaža mama, adkazała: źbili. Alena stała telefanavać u śpiecvučelniu, dzie paśla mnostva zvankoŭ na roznyja numary telefonaŭ joj adkazała adna z supracoŭnikaŭ administracyi (imia, proźvišča i pasada viadomyja redakcyi sa słoŭ maci. — Zaŭvaha. TUT.BY).

— Ja joj skazała: «Rastłumačcie mnie, kali łaska, što zdaryłasia. Čamu majo dzicia ź pierałomam pazvanočnika znachodzicca ŭ špitali, a ja pra heta ničoha nie viedaju? Ja ž nie pazbaŭlena baćkoŭskich pravoŭ». A jana mnie: «A vy viedajecie, što byli ŭcioki 26 listapada?» Ja skazała: «Pasłuchajcie, siońnia ŭžo dvaccać vośmaha, čamu vy mnie nie paviedamili adrazu?» Na što i adkazała: «A što b heta źmianiła?» — kaža Alena Ščaŭlikava.

Na čarhovuju prośbu rastłumačyć, adkul usio ž taki ŭ padletka traŭma, supracoŭnica administracyi, pa słovach maci, skazała: «Ucioki byli, płaty ž vysokija».

U śpiecvučylišča 16-hadovy Andrej trapiŭ 26 kastryčnika. Jany z adnakłaśnikami ŭskryli čužuju mašynu, dastali panel pryboraŭ, prychapili z saboj kałodu ihralnych kart. Padletkaŭ prysudzili da paŭhoda abmiežavańnia volnaha času — z 21.00 da 07.00 jany pavinny byli znachodzicca doma. Andrej režymu nie trymaŭsia, tamu inśpiektar pa spravach niepaŭnaletnich nakiravaŭ materyjały ŭ sud, kab źmiaścić padletka ŭ śpiecustanovu. Z 12 kastryčnika chłopiec znachodziŭsia ŭ pryjomniku-raźmierkavalniku ŭ Minsku, a 26-ha kastryčnika jaho pieraviali ŭ Mahiloŭ. Heta značyć, u SPTV №2 Andrej prabyŭ miesiac.

Žančyna znoŭ patelefanavała ŭ balnicu. Miedsiastra paviedamiła mamie, što padletka dapytvajuć milicyjanty, i prapanavała patelefanavać joj na mabilny krychu paźniej, kab pahavaryć z synam.

— Ja pierš za ŭsio spytała: «Andrej, što ty narabiŭ?» Jon adkazaŭ: «Uciok». Ja spytała navošta. A jon adkazvaje: «Mam, tam žyć było nievynosna. Nas pastajanna źbivali. Nam usio zabaranili: zvanki, listy, pieradačy». Ja spytała, čamu jon mnie raniej nie skazaŭ pra heta, choć u listach pisaŭ: «Ja vytrymaju». Syn skazaŭ, što listy čytali — i nie adpravili b, kali b takoje napisaŭ. Pa telefonie jon taksama ničoha nie moh skazać, bo ŭvieś čas pobač znachodziŭsia supracoŭnik, kantralavaŭ, — pieradaje słovy syna Alena.

Padletak raspavioŭ maci, što ŭcioki jany ździejśnili 26 listapada paśla abiedu: adzin navučeniec adciahnuŭ uvahu achoŭnika, a šaściora pabiehli. Jany ruchalisia ŭ bok mikrarajona Kazimiraŭka, kali ich złavili. Andrej byŭ apošnim.

Mama pierakazvaje słovy syna: ich pryvieźli nazad va ŭstanovu, pa adnym zavodzili ŭ baćkoŭski pakoj — i źbivali troje supracoŭnikaŭ vučylišča. Potym, kaža, uciekačoŭ pakinuli stajać u hetym baćkoŭskim pakoi na ŭsiu noč pry ŭklučanym śviatle.

— Jak skazała mnie śledčy, heta adziny pakoj na terytoryi ŭstanovy, dzie niama videakamier, — praciahvaje žančyna. — Syn raspavioŭ, što jaho spačatku adzin raz udaryli, jon upaŭ. A potym, kali ŭdaryli ŭ śpinu, jamu zabaleła, jon zakryŭ jaje rukami. Bili dvoje, nahami. Ranicaj u paniadziełak, mnie śledčy raspaviała, hetych šaściarych pa rasparadžeńni dyrektara asobna ad usich paviali na śniadanak, kab astatnija dzieci ich nie bačyli. I tolki ŭ aŭtorak, kali syn, jak jon tłumačyŭ mnie, užo nie moh iści — tak jamu było baluča! — jaho pavieźli ŭ balnicu. Pry hetym adzin z supracoŭnikaŭ administracyi (imia, proźvišča i pasada viadomyja redakcyi sa słoŭ maci. — Zaŭvaha. TUT.BY) papiaredziŭ dziaciej: «Heta tolki pačatak dla vas». A synu skazaŭ, što jon simulant.

U balnicy zrabili zdymak: u Andreja — zakryty pierałom pieršaha pazvanka pajaśničnaha adździeła. Padletak u špitali ŭžo treci tydzień, chutka jaho vypišuć — daŭžej trymać u stacyjanary nie mohuć. Jamu nakładuć harset, zahipsujuć — i adpraviać nazad u vučylišča.

— Syn siońnia patelefanavaŭ i ledź nie płača. Ja bajusia za jaho zdaroŭje. I nie viedaju, kudy źviartacca. Naša advakat skazała, što kali budzie zaklučeńnie sa špitala ab tym, što syn nie moža ŭtrymlivacca ŭ vučyliščy, to mahčymaja zamiena pakarańnia na chatni režym u suviazi z traŭmaj, — płača žančyna.

Pakul u lakarni joj skazali, što pytańnie treba vyrašać ź miedsiastroj vučylišča. Ale hetamu śpiecyjalistu ŭ maci, pa jaje słovach, viery niama: syn, pavodle słoŭ Aleny, kazaŭ, što miedsiastra zahadvała jamu zamaŭčać, kali chłopčyk davaŭ pakazańni.

— Ja vielmi chaču, kab syna pieraviali na chatni režym, tamu što heta ŭsio ž taki traŭma chrybietnika. Ci mała chto jaho šturchnie, ci mała sam dzie ŭpadzie. Dzicia invalidam moža zastacca, — uschvalavana kaža maci. — Ale daravać im usim [kiraŭnictvu śpiecvučylišča] — nie daruju. Jany navat prabačeńnia nie paprasili. Niachaj sud vyrašaje, jak ich pakarać. Chaj im budzie takoje pakarańnie, kab jany vyprabavali toje, što majo dzicia vyprabavała.

Pa słovach Aleny Ščaŭlikavaj, astatnija piaciora padletkaŭ nie tak mocna źbity. Zaraz jany znachodziacca ŭ vučyliščy pad kruhłasutačnym nahladam inśpiektaraŭ pa spravach niepaŭnaletnich, kab, jak skazała mamie śledčy, jany mahli davać pakazańni i na ich nichto z supracoŭnikaŭ vučylišča nie moh cisnuć.

— Vypadak ŭciokaŭ 26 listapada byŭ, bolš ja ničoha vam prakamientavać nie mahu, — skazała ŭ razmovie z TUT.BY namieśnik dyrektara pa vychavaŭčaj rabocie SPTV № 2 Ała Dzikava. — I nichto prakamientavać nie zmoža.

Na infarmacyju pra zdareńnie adreahavała Minadukacyi: va ŭstanovie patłumačyli, što padletak złamaŭ chrybietnik, zvaliŭšysia sa ściany pry sprobie ŭciokaŭ.

• 0
• 0
• 0
• 0
• 0
• 0
• 0
• 0