Łyžnik Siarhiej Dalidovič: Historyja majoj siamji składanaja. Maci, baćka i brat pamierli ad ałkahalizmu
Redakcyja haziety «Priessboł» pryznała łyžnika Siarhieja Dalidoviča «Čałaviekam 2017 hoda» ŭ biełaruskim sporcie. 44-hadovy Siarhiej atrymaje bronzu Sočy-2014 z-za dyskvalifikacyi rasiejcaŭ, a ŭletku 2017 hoda jon praz kraŭdfandynh sabraŭ hrošy na Alimpijadu-2018.
— Sakret vašaha spartyŭnaha daŭhalećcia jakraz u dobrych hienach?
Napeŭna. Choć historyja majoj siamji składanaja. Maci, baćka i brat pamierli ad ałkahalizmu. Ale heta zdaryłasia ŭžo potym. Začaty ja byŭ z dobrymi hienami. Da 35 hadoŭ baćka nie braŭ u rot ni kropli, nie kuryŭ. Ale niejak farbavaŭ cysterny sa smałoj, šabašyŭ: hrošaj nie było. Kali vyłaziŭ, łopnuła lampačka, i smała zaharełasia. Technika biaśpieki była parušanaja. Tata atrymaŭ bolš za sorak adsotkaŭ apiokaŭ. Byŭ na miažy žyćcia i śmierci. Paśla hetaha pajšło-pajechała, i ŭsio vyliłasia ŭ ałkahalizm. Hetak ža i maci. Kali ja adjazdžaŭ z Oršy, prablemy ŭ siamji ŭžo mielisia. Ale ja byŭ lubimym synam, mianie heta nie zakranuła. Starejšy brat pamior u 44 hady. Baćka — u 58, maci — u 60.
Spačatku ja pa-varjacku złavaŭsia, saromieŭsia hetaha. A potym prosta znoŭku palubiŭ baćkoŭ i zrazumieŭ, što ad mianie ničoha nie zaležyć. Pakul čałaviek sam nie voźmiecca za siabie… Usie sproby vypravić byli marnymi. Ja pozna zrazumieŭ i pryniaŭ usie, im hadoŭ dziesiać zastavałasia. U ich było svajo žyćcio, u mianie — svajo. Pryjazdžaŭ u Oršu, dapamahaŭ.
Ale z trynaccaci hadoŭ nivodnaj majki mnie nichto nie kupiŭ — usio sam.
Nie curaŭsia nijakaj raboty. Kali pastupaŭ u instytut, niejak padyšoŭ mužyk i kaža: chočacie zarabić pa sorak rubloŭ? Treba cehłu skłaści. Ludzi ciapier nie pamiatajuć, što na miescy «Arena-Sici» ŭ Minsku raniej baraki byli. A niekatoryja dobryja damy stajać na miescy raniejšych zvałak. Cahliny byli ź dzirkami. Čatyry ci piać hadzin pracavali. Na nastupny dzień treba zdavać padciahvańnie — a ja nie mahu na turnik zabracca. Palcy byli rastapyrany. Ale ja atrymaŭ sorak rubloŭ. Kupiŭ na Kamaroŭcy štany — i adčuŭ ščaście. Hatovy byŭ i na nastupny dzień pryjści. Tak što caniu toje, što ŭ mianie jość.
Kamientary