Dzianis Alejnikaŭ: Biełaruś moža stać suśvietnym centram kampietencyj pa niekatorych napramkach IT-śfiery

Biełaruś moža stać suśvietnym centram kampietencyj pa niekatorych napramkach IT-śfiery. Takoje mierkavańnie vykazaŭ siabra rady pa raźvićci ličbavaj ekanomiki Dzianis Alejnikaŭ na pracoŭnaj sustrečy deputataŭ Pałaty pradstaŭnikoŭ z kiraŭnictvam Administracyi Parku vysokich technałohij, paviedamlaje BiełTA.

«U Biełarusi jość šaniec pazmahacca za zvańnie rehijanalnaha centra kampietencyj. Rehijanalnaha — heta vielmi ścipła skazana. Moža być, i suśvietnaha pa niekatorych napramkach, pa takich jak štučny intelekt, błokčejn, moža, dzieści internet-rečaŭ. Heta pytańni realizacyi, ale ŭmovy siońnia dekretam (pra raźvićcio ličbavaj ekanomiki) stvorany»

, — skazaŭ Dzianis Alejnikaŭ.

Pavodle jaho słoŭ, hety dakumient stavić svajoj zadačaj zrabić Biełaruś najlepšaj u śviecie jurysdykcyjaj dla vysokatechnałahičnych biznesaŭ. Novaja i kankurentnaja pravavaja asnova stvaraje ŭsie ŭmovy, kab kraina mahła pazmahacca z najbujniejšymi suśvietnymi jurysdykcyjami, z takimi hulcami, jak Šviejcaryja, Sinhapur. Jaje meta — pryciahnuć uvahu zamiežnaj vysokatechnałahičnaj hramadskaści, u tym liku za košt analizu i supastaŭleńnia pravavych režymaŭ.

Źjavilisia novyja vidy dziejnaści rezidentaŭ Parku vysokich technałohij. Siarod ich raspracoŭka bijatechnałohij, miedycynskich, avijacyjnych i kaśmičnych technałohij, kibiersport. Rezidenty PVT majuć prava kamiercyjalizavać prahramnyja pradukty: raźmiaščać rekłamu ŭ prahramnym pradukcie, ažyćciaŭlać płatnuju padpisku na pradukt ci lubym inšym sposabam.

«Dekret dazvalaje zaklučyć damovu, u tym liku ekanamičnuju, abmianiaŭšysia SMS. Heta narmalna i ŭ mnohich krainach pracuje, — adznačyŭ Dzianis Alejnikaŭ. — Dekretam praduhledžana, što zaklučyć damovu možna šlacham abmienu lubymi paviedamleńniami ŭ infarmacyjnych sistemach».

Ciapier nie patrabujecca podpisu, navat elektronnaha. U jakaści instrumienta ździajśnieńnia ździełki uviedzieny smart-kantrakt na błokčejn. Biełaruś u hetym płanie abyjšła ŭsie krainy śvietu.

Smart-kantrakt — heta prahramny kod, jaki stvarajecca i vykarystoŭvajecca ŭ błokčejnie dla aŭtamatyzavanaha ździajśnieńnia i (abo) vykanańnia ździełak ci ździajśnieńnia inšych jurydyčna značnych dziejańniaŭ. Taki krok da ličbavaha prava — pravilnaje rašeńnie, upeŭnieny Dzianis Alejnikaŭ.

***

Daviedka: Dzianis Alejnikaŭ — advakat, zajmajecca vyrašeńniem sprečak i kansultavańniem pa inviestycyjnych prajektach z udziełam zamiežnaha kapitału, źjaŭlajecca adnym z aŭtaraŭ dekreta ab raźvićci ličbavaj ekanomiki.

• 0
• 0
• 0
• 0
• 0
• 0