Volha Dadykina, staršynia Mušynskaha sielskaha vykankama, što ŭ Amścisłaŭskim rajonie, na pasadzie ŭžo kala 10 hadoŭ. Pakul što jana praciahvaje pracu.
Ale niadaŭna na žančynu zaviali kryminalnuju spravu, joj pahražaje ad 3 da 10 hadoŭ źniavoleńnia.
Dadykinu vinavaciać u tym, što ŭ 2015 i 2016 hadach jana składała na viaskoŭcaŭ administratyŭnyja pratakoły, jakija paśla sama ž i apłačvała.
Čytajcie: Kab palepšyć statystyku, staršynia sielvykankama pad Amścisłavam ciškom składała pratakoły na viaskoŭcaŭ i sama płaciła štrafy
Jak paviedamlaje Kamitet dziaržkantrolu, Dadykina rabiła heta, «kab stvaryć bačnaść aktyŭnaj pracy pa dobraŭparadkavańni nasielenych punktaŭ». Bo inačaj jaje samu mahli b pryciahnuć da adkaznaści za biaździejnaść.
Volha Jaŭhieńjeŭna rastłumačyła «Našaj Nivie» padrabiaznaści absurdnaj historyi.
«Usie pratakoły ja składała za śmiećcie, pobytavyja adkidy, jakija lažać na ŭčastkach, la chat…
2015—2016 hady byli vielmi napružanymi. Pryjazdžali šmat razoŭ sanstancyi, praviarali. Z nas patrabavali štotydzień: što z pratakołami, kolki za tydzień? Prychodziłasia składać.
Kožny kvartał my davali spravazdačy ŭ Mahiloŭ, kolki składziena administratyŭnych pratakołaŭ za pobytavaje śmiećcie. Taki pieryjad byŭ.
Ale pratakoły składalisia nie tajemna. Pryjazdžali sanstancyja i «ekałohija», rabili zaŭvahi. Paśla ja składała pratakoł i paviedamlała čałavieku, što zrabiła, davała jamu pradpisańnie. Paśla pryjazdžali i praviarali — prybrali jany ci nie. Časam prychodziłasia nam samim navat prybirać!» — raspaviadaje Dadykina.
«Dy i sama ja płaciła. «Ekałohija» na mianie składała pratakoły za śmiećcie. Ja płaciła pa 30 bazavych, — uzhadvaje jana. —
Ale viaskoŭcam ja pisała minimalnyja sumy štrafaŭ — 0,1 bazavuju. Tady byli mizernyja zarobki i vypisvać pa maksimumu, viedajecie… Škada było ludziej. Płacić im usio roŭna nie było čym.
Heta rabiłasia nie dla taho, kab kahości pakarać… Chacia pakarać, moža, i varta było. Na tych, na kaho składalisia pratakoły, było za što składać. Heta nie toje, što voś, mnie zachaciełasia i ja skłała…
Časam apłačvała štrafy sama. Bo kali štraf nie apłačany ŭ peŭny termin, sprava idzie ŭ sud. Tamu ja i płaciła, kab na ludziej u sud nie padavali.
Niekatoryja viarnuli hrošy paśla. Niekatoryja — nie».
Kamientary