Iryna Čarniaŭka pra Knyša i Korbut: Paklop rujnuje žyćcio taksama, jak jaho rujnuje hvałt

Pamiatajecie ŭ «House of cards» scenu, dzie Kłer u teleintervju abvinavačvaje hieroja vajny, niadaŭna atrymaŭšaha ŭznaharodu — što ŭ studenckim minułym jon jaje zhvałciŭ. Apafiejoz spraviadlivaści: hieroja pazbaŭlajuć uznaharod, sadziać, jon hublaje siamju.

Vielmi vierahodna, što hety epizod budavaŭsia na całkam realnaj historyi, katoraja skončyłasia ŭ ZŠA litaralna paŭhoda tamu. Ale apafiejoz byŭ zusim inšy: 8,4 miljona dalaraŭ štrafu «achviara» pavinna zapłacić za paklop, pryčym ź ich tolki 3,4 miljona kampiensacyja abvinavačanamu, a 5 miljonaŭ — pakarańnie ad štata, tamu što, jak skazaŭ sudździa, «My pavinnyja pierakanacca, što takoje bolej nie paŭtorycca».

A jak usio pačałosia. U 2013-m hodzie žančyna napisała ŭ svaim błohu, što 27 hod tamu jaje zhvałciŭ były sakurśnik pa vajskojvaj akademii Vestpojnt paśla studenckaj viečarynki. Na momant publikacyi abvinavačany ŭžo byŭ hierojem, mieŭ bajavyja ŭznaharody, pracavaŭ u Pientahonie i rychtavaŭsia da surjoznaj pasady. Naturalna, što pasadu na takim skandalnym tle jamu ŭžo nie dali, bliskučaja karjera skončyłasia skomkana. Ale armiejskaje śledstva pačało pošuk dokazaŭ i vielmi surjozny — padrabiazna raspytali błohierku, abvinavačanaha, praz stolki hod znajšli i apytali prykładna 30 čałaviek tych, chto byŭ na viečaryncy, chto žyŭ u kampusie, prajechalisia pa maršrucie, spraŭdzili, ci isnavaŭ aŭtamabil, u katorym byccam by adbyŭsia hvałt. I vyśvietliłasia, što ŭsio, nu prosta ŭsio — niapraŭda. Nivodnaja detal apoviedu nie paćviardžajecca. Navat nie spraŭdziŭsia taki momant ź jaje pakazańniaŭ, byccam by jon pabačyŭ z darohi, jak jana sama idzie pa piešachodnym tuneli — akazałasia, što tunel z darohi prosta niabačny. Ahułam ad zapisu ŭ błohu i da vierdyktu prajšło 4 hady.

Achviary ciažka pryznacca ŭ spraŭlenym nad joj hvałcie jašče i tamu, što jana ŭ lubym vypadku ŭ słabiejšym stanoviščy. Bo kali dakaža — to i tak usio nanoŭ pieražyvie, a kali nie dakaža — to jašče i za paklop pacierpić. A dakazać praz 20 i bolej hod choć niešta — składana. Šansy ŭ jaje niaroŭnyja z hvałtaŭnikom. Tamu dla mianie apryjory vaha słovaŭ taho, chto zajaŭlaje pra hvałt, była bolšaja za vahu słovaŭ taho, kaho vinavaciać — prosta pavodle bałansu prybytkaŭ i strataŭ. Naprykład, ja adrazu bolej pavieryła Hucu, bo ryzyki dla jaje, kali pačniecca rasśledavańnie ŭ ZŠA, našmat bolšyja, čym dla Ščerby. I vieryła da taho momantu, pakul taja nie ŭziała svaje słovy nazad.

A Korbut nie ryzykuje ničym, jaje bałans čotka plusavy. Usie my vydatna viedajem, i, samaje hałoŭnaje, viedaje Korbut — što nichto nikoli nie budzie rasśledavać jaje abvinavačańni. Nichto nie raspytaje jaje ŭ jak maha padrabiaznych detalach, što kankretna adbyłosia, nichto nie pravieryć hetyja detali, nichto nie padymie dakumienty ź Jubilejnaj, ci jany tam naahuł spynialisia, nie apytaje ŭdzielnikaŭ zbornaj i spartovych daktaroŭ, nichto nie budzie šukać jaje miedyčnyja daviedki. A Knyš ad 1999-ha, ad momantu, kali jana jaho ŭpieršyniu abvinavaciła — tolki i robić, što apraŭdvajecca i tłumačyć, amal 20 hod jon žyvie ŭ hetym.

Paklop rujnuje žyćcio taksama, jak jaho rujnuje hvałt. Ale my nikoli nie viedajem ci majem dačynieńnie z hvałtam ci z paklopam — pakul nie pravierym fakty. «Kab takoje bolš nie paŭtarałasia» pakarańnie za hvałt nie musić być spravaj tolki pryvatnaha abvinavačańnia. Publičnaja zajava pra hvałt, kali b jon ni byŭ ździejśnieny — u ideale pavinnaja aŭtamatam uklučać niezacikaŭlenuju sistemu śledstva. I pakarańnie jak za hvałt, tak i za paklop maje być adnolkava balučym. 

Moža, nieŭzabavie tak i budzie, bo ad chłuśnii nichto nie zastrachavany — pryčym i žančyny taksama. A pakul musiać pracavać praviły hihijeny: u taho, chto abvinavačvaje — niama prezumpcyi davieru, jak niama prezumpcyi viny ŭ taho, kaho abvinavacili.

• 0
• 0
• 0
• 0
• 0
• 0
• 0
• 0